E Prome Obstaculo Debate Oral Dilanti di Corte Supremo

E FECHA FIHA pa presenta debate oral dilanti di Presidente di Corte Supremo Hues William Rehnquist y e ocho otro miembronan tawata 26 di februari 2002. Tawatin un team di cuater abogado pa defende e interesnan di Testigonan di Yehova.

E abogado principal pa e Testigonan a cuminsa su debate cu un introduccion cu a acapara atencion: “Ta diasabra 11 or di mainta den e Pueblito di Stratton. [Anto el a bati tres biaha riba su stand.] ‘Bon dia. Mirando e susesonan cu a tuma luga resientemente, mi a haci un esfuerso special pa bini serca bo pa papia cu bo tocante e loke Profeta Isaias a menciona como algo miho. Esei ta e bon noticia cu Cristo Hesus a papia di dje, e bon noticia di e Reino di Dios.’”

El a sigui bisa: “Si bo bai di cas pa cas y presenta e mensahe ei den e Pueblito di Stratton sin busca prome un permit serca e autoridadnan, bo ta cometiendo un crimen.”

‘Boso No Ta Pidi Placa?’

Hues Stephen G. Breyer a haci e abogado di e Testigonan algun pregunta hopi al caso. El a puntra: “Ta berdad cu bo clientenan no ta pidi placa, ni un cen preto, y [cu] nan no ta bende Bijbel, ni nada otro, y cu tur loke nan ta haci ta bisa: ‘Mi kier papia cu bo tocante religion’?”

E abogado pa e Testigonan a contesta: “Honorabel Señor Hues, e echonan ta papia pa nan mes, Testigonan di Yehova no a pidi placa den e Pueblito di Stratton. E mesun echonan aki ta mustra cu tin biaha den otro areanan tambe nan sa menciona un donacion boluntario. . . . Nos no ta cana pidi fondo. Simplemente nos ta purba papia cu hende tocante Bijbel.”

Mester di Permit di Gobierno?

Demostrando perspicacia, Hues Antonin Scalia a puntra: “Kiermen, bo posicion ta cu un hende no tin nodi bai serca e alcalde y pidi permit pa papia cu un biciña tocante algo interesante?” E abogado di e Testigonan a contesta: “Nos no ta kere cu e Corte aki mester aproba un lei di Gobierno cu ta rekeri di un ciudadano cu e tin cu busca un permit pa e por pasa na cas di un otro ciudadano pa papia cu ne.”

Cambio di Argumento, Cambio di Ambiente

Awor tawata turno pa Stratton presenta nan caso. Nan abogado principal a splica e ordenansa di Stratton, bisando: “Stratton ta eherciendo su poder hudicial ora e ta purba proteha e privasidad di su habitantenan, ora e ta purba preveni criminalidad. E ordenansa cu ta prohibi hende pa bai riba propiedad priva y pidi sea voto of apoyo of busca hende pa cumpra cos, unicamente ta rekeri pa un hende registra di antemano y cana cu un permit ora e ta bai di cas pa cas.”

Hues Scalia a bai mesora na e punto fundamental di e asunto ora el a puntra e otro huesnan: “Boso sa di cualkier otro caso den cua nos [Corte Supremo] tawatin cu trata un decreto di e alcanse aki, cu ta envolve pidimento, no di placa, ni bendemento di mercancia, sino di algo manera: ‘Mi kier papia tocante Hesucristo’, of ‘Mi kier papia tocante proteccion di medio ambiente?’ Nos a yega di tin un caso asina?”

Hues Scalia a sigui bisa: “Te asina leu cu mi sa, den e ultimo dos siglonan nos no tawatin un caso paresido.” Presidente di Corte Rehnquist a contesta den chansa: “Ta pasobra bo no ta di e bieu ei.” Ata tur hende den sala di corte na harimento. Hues Scalia a sigui cu su argumento: “E alcanse di e cos aki ta algo nobo pa mi.”

Un Bon Idea?

Hues Anthony M. Kennedy a haci un pregunta al caso: “Bo ta kere cu ta un bon idea cu mi tin cu pidi Gobierno permit prome cu mi por bai un par di cas mas leu den mi caya, caminda mi no conoce tur hende, [y] bisa nan, mi kier papia cu boso pasobra mi ta precupa cu e asunto di recohemento di sushi, of pasobra mi ta precupa cu nos representante den Congreso, of algo por estilo? Mi tin cu pidi Gobierno prome cu mi por haci esei?” El a agrega: “Esaki si ta algo nobo pa mi.”

E ora ei Hues Sandra Day O’Connor a drenta den e debate, puntrando: “Wel, kico di muchanan cu ta cana cas pa cas pidi mangel durante Halloween? Nan tambe tin cu busca un permit?” Tanto Hues O’Connor como Scalia a sigui cu e liña di argumento aki. Hues O’Connor a introduci un otro argumento: “Con ta para cu fiamento di un copi di sucu serca bo biciña? Mi tin cu busca un permit pa mi bai busca un copi di sucu serca mi biciña?”

Testigonan di Yehova Ta Cana Pidi Voto of Bende Cos?

Hues David H. Souter a puntra: “Dicon Testigonan di Yehova ta cai bou dje ordenansa? Nan ta cana pidi voto, nan ta cana bende cos, nan ta comerciante ambulante of bendedo pasahero di mercancia of servicio? Nan no ta haci ningun di e cosnan aki toch?” E abogado pa Stratton a cita e ordenansa detayadamente y a bisa cu e corte di districto ta haya cu Testigonan di Yehova tambe ta cai den e categorianan aki. Riba esaki, Hues Souter a contesta: “ Si boso ta inclui Testigonan di Yehova, esei kiermen cu pa boso e categorianan aki ta hopi amplio.”

Hues Breyer e ora ei a cita un diccionario pa mustra cu ningun di e definicionnan aki ta pas pa Testigonan di Yehova. El a agrega: “Mi no a lesa nada den e resumen di boso caso cu ta splica dicon boso ta rekeri di e hendenan aki [Testigonan di Yehova] cu no ta interesa den placa, no ta interesa den bende nada, no ta ni sikiera interesa den voto, pa nan bai stadhuis y registra. Kico Stratton kier logra?”

E “Privilegio” di Comunicacion

Abogado di Stratton e ora ei a argumenta cu “loke Stratton kier logra ta di evita cu hende ta molestia e doñonan di cas.” El a clarifica mas aleu cu esei tawata pa proteha e habitantenan contra fraude y hende criminal. Hues Scalia a cita e ordenansa pa mustra cu e alcalde por exigi mas informacion relaciona cu e persona cu ta registra su mes y su proposito afin di por “describi cu exactitud ki tipo di privilegio e ta desea.” Anto e hues a agrega: “Pues segun e alcalde, pa bo por bai serca bo conciudadanonan pa combence nan tocante un of otro cos ta un privilegio cu e alcalde tin cu otorga bo. Ami gewoon no por compronde cu esei ta un privilegio.”

Hues Scalia a bolbe insisti: “Kiermen, tur hende cu ta primi bel di un porta mester bai stadhuis pa nan cohe su fingerprint prome cu [e] por primi bel di un porta? E posibilidad chikito cu lo por sosode un crimen ta suficiente pa exigi di tur hende cu kier primi bel di un porta pa nan bai registra na stadhuis? Claro cu no.”

E Ordenansa Ta Proteha Habitantenan?

Ora cu e 20 minuut asigna na e abogado di Stratton a vence, el a pasa palabra na e abogado general di estado di Ohio. Esaki a argumenta cu e ordenansa pa no cana di cas pa cas ta proteha e habitantenan contra bishita di un hende desconoci, kende “sigur [ta] un persona cu no a ser invita, [y cu] ta aki riba mi propiedad . . . y mi ta kere cu e pueblito tin derecho di bisa: ‘E tipo di actividad ei tin nos precupa.’”

E ora ei Hues Scalia a declara: “Kiermen, boso ta bisando cu asta pa e hendenan cu si ta ricibi Testigonan di Yehova, cu kisas ta sintando nan so tur solitario y cu tin gana di papia cu un hende tocante kico cu ta, e hendenan aki [Testigonan di Yehova] toch tin cu bai registra serca e alcalde pa haya e privilegio di primi nan bel di porta.”

“Un Restriccion Masha Rasonabel”

Durante e interogacion Hues Scalia a presenta un punto fuerte ora el a bisa: “Nos tur por admiti cu e sosiedadnan di mas safe na mundo ta dictaduranan totalitario. Echo ta cu nan tin masha tiki criminalidad. Libertad tin su prijs y te na cierto grado bo ta core un riesgo mas grandi di actividad ilegal. Pero e pregunta ta si e lei aki ta bai yuda preveni asina tanto actividad ilegal cu ta hustifica pa perde bo derecho di libertad di por primi bel di un hende su porta.” E ora ei e abogado general a contesta cu “esaki ta un restriccion masha rasonabel.” Hues Scalia na su turno a contest’e cu e ta asina rasonabel cu “nos no por haya ni un solo caso di ni un solo municipio cu a yega di decreta e tipo di ordenansa ei. Ami no ta kere cu esei ta rasonabel.”

Al final, bou di presion di un di e huesnan, e abogado general mester a admiti: “Lo mi no kier bisa cu mester pone un prohibicion completo riba primimento di bel y batimento na porta.” Cu e comentario ei, su argumentacion a termina.

Ora tawata turno pa e abogado di e Testigonan bini cu contra-argumento, el a indica cu den e ordenansa no tawatin un manera pa verifica e declaracionnan di un persona. E di: “Mi por bai stadhuis y bisa: ‘Mi ta [tal y tal]’, y haya un permit y bai di cas pa cas.” Tambe el a mustra cu e alcalde tin e autoridad pa nenga di duna permit na un persona cu bisa cu e no ta afilia na un organisacion. “Nos ta kere cu esaki claramente ta bai duna autoridadnan chens di husga na un manera arbitrario”, el a bisa. Despues el a agrega: “Respetuosamente mi kier menciona cu loke nos [Testigonan di Yehova] ta haci, en realidad tin di aber cu e esencia di e Prome Enmienda.”

Djis despues di esaki Presidente di Corte Hues Rehnquist a sera e debate oral, bisando: “[Corte Supremo] ta acepta pa revisa e caso.” Henter e proceso a dura un poco mas cu un ora. E veredicto por escrito cu a keda anuncia na juni, a mustra con importante e un ora ei tawata.

[Plachinan na pagina 6]

Presidente di Corte, Hues Rehnquist

Hues Breyer

Hues Scalia

[Reconocemento]

Rehnquist: Collection, The Supreme Court Historical Society/Dane Penland; Breyer: Collection, The Supreme Court Historical Society/Richard Strauss; Scalia: Collection, The Supreme Court Historical Society/Joseph Lavenburg

[Plachinan na pagina 7]

Hues Souter

Hues Kennedy

Hues O’Connor

[Reconocemento]

Kennedy: Collection, The Supreme Court Historical Society/Robin Reid; O’Connor: Collection, The Supreme Court Historical Society/Richard Strauss; Souter: Collection, The Supreme Court Historical Society/Joseph Bailey

[Plachi na pagina 8]

Interior di sala di corte

[Reconocemento]

Potret di Franz Jantzen, Collection of the Supreme Court of the United States