Dicon Norma y Balor Ta Cambiando
“Kico ta e cos mas importante den bida?”
Nan a haci e pregunta ei na 50.000 hende den 60 pais. E raport di Gallup ta bisa cu e contesta mas frecuente cu nan a haya na casi tur parti di mundo tawata “un bida di famia felis” y “bon salu.”
NA PROME bista lo por parce cu hende rond mundo ta comparti e mesun norma- y balornan noble. Sinembargo, e situacion no ta dje faborabel ei manera e ta parce. Den pasado, hende su norma- y balornan tawata basa riba principionan religioso y moral tradicional. Pero awor, cos ta cambiando rapidamente. Relaciona cu e situacion na Italia, investigado Marisa Ferrari Occhionero ta bisa: “Hobennan ta manifesta norma y balor cu cada bes tin menos influencia di mayornan, di tradicion y di religion.” Anto lo por bisa mescos di hende di rond parti mundo, tanto di hobennan como di grandinan.
Profesor Ronald Inglehart, cordinado di un proyecto di investigacion cu yama Encuesta Mundial di Norma y Balor, ta bisa: “Un creciente cantidad di evidencia ta indica cu mundialmente tin cambionan profundo ta tumando luga pa loke ta puntonan di bista.” Kico ta causando e cambionan ei? Segun Inglehart: “E cambionan aki ta un refleho di cambionan riba tereno economico y tecnologico.”
Por ehempel, e encuesta di Gallup a revela cu den paisnan rico hende a cualifica empleo “basta abou” entre e cosnan mas importante den bida. Pero den paisnan den desaroyo, un empleo ta e cos di mas importante! Si, ora hende ta pober, e cos di mas importante ta con pa sobrevivi cada dia. Segun cu paisnan ta desaroya economicamente, hende ta cuminsa duna prioridad na cosnan manera salu, bida di famia felis y expresion di nan propio personalidad.
Debi na avancenan tecnologico, e norma- y balornan nobo aki sigur lo bai tin un impacto riba paisnan den desaroyo. E revista The Futurist a remarca: “Loke nos ta mira y tende ta influencia nos creencia- y normanan.” Pues medionan di comunicacion tawatin un enorme impacto riba norma y balor di paisnan Occidental. The Futurist ta bisa: “E medionan di comunicacion aki ta eherciendo influencia mundialmente.”
Pesei, ki cambionan nos ta mirando den hende su actitud y comportacion? Con e cambionan aki den norma y balor ta afecta abo y bo famia?