E Punto di Bista Biblico

Con Bo Por Resisti Deseonan Robes?

“Ora mi ta desea di haci loke ta bon, maldad ta presente den mi.”—ROMANONAN 7:21.

KISAS Pablo a traha mas duro cu cualkier otro apostel pa promove e principionan eleva di cristianismo. (1 Corintionan 15:9, 10) Toch, el a admiti na un manera franco loke tin skirbi akiriba. Continuamente e tawata tin un conflicto entre su mente y su deseonan robes. Bo a yega di sinti loke apostel Pablo a experencia? En realidad, como hende imperfecto, cua di nos no a yega di experencia e conflicto interno ei?

Pa hopi hende e bataya pa resisti deseonan robes ta masha fuerte mes. Tin hende ta lucha contra e deseo pa satisface impulsonan sexual inmoral. Otronan ta bicia na wega di placa, tabaco, droga of alcohol. Ora deseonan perhudicial y impuro persisti, con nos por logra resisti nan? Ki yudansa tin disponibel? E bataya contra deseonan robes lo caba un dia?

Amor—E Medio pa Resisti Deseonan Robes

Hesus a indica cua ta e dos mandamentonan mas grandi di e Lei di Moises. E prome tawata: “Stima SEÑOR bo Dios cu henter bo curason, y cu henter bo alma, y cu henter bo mente.” (Mateo 22:37) Si nos ta stima Dios na e manera cu Hesus a indica, nos deseo di mas grandi no mester ta pa agrada E? Si esei ta e caso, e deseo recto ei lo por yuda nos den nos lucha asta contra e deseonan robes di mas dificil pa resisti! Esaki no ta simplemente un teoria irealistico. Tur dia miyones di cristian ta logra resisti deseonan robes. Con bo por logra cultiva un relacion intimo asina cu Dios? Door di medita cu aprecio riba su bondad cu nos ta mira den su creacion, den Bijbel y na e manera cu e ta trata nos personalmente.—Salmo 116:12, 14; 119:7, 9; Romanonan 1:20.

E di dos mandamento mas grandi cu Hesus a menciona tawata: “Stima bo prohimo manera bo mes.” (Mateo 22:39) Apostel Pablo a bisa cu amor “no ta comporta su mes indecente” y “e no ta busca su propio interes.” Kiermen cu e clase di amor sin egoismo aki ta yuda nos evita di haci tur loke por ofende otro hende. (1 Corintionan 13:4-8) Con nos por cultiv’e? Door di pone nos mes den sapato di otro hende y tene cuenta sinseramente cu nan sintimentonan y mustra interes den nan bienestar eterno.—Filipensenan 2:4.

Ki Yudansa Tin Disponibel?

Door cu Dios ta compronde con dificil ta pa nos haci loke ta bon, el pone varios yudansa na nos disposicion. Mediante Bijbel, su Palabra skirbi, Dios ta siña nos pa odia loke ta malo y desaroya un respet saludabel p’e. (Salmo 86:11; 97:10) Den Bijbel tin storianan di bida cu ta mustra con desastroso ta ora un hende ta entrega na deseonan robes. Ademas, Hesus a bisa cu si nos pidi Dios pa Su spirito santo, e forsa mas potente den universo, lo e duna nos esei. (Lucas 11:13) E forsa aki lo por fortalece nos determinacion pa haci loke ta corecto. Un otro yudansa ta e sosten y animacion mutuo cu nos por haya for di otro cristiannan cu tambe ta lucha pa resisti deseonan robes. (Hebreonan 10:24, 25) Ora cu e influencianan positivo aki ta remplasa esnan negativo, nos ta haya e sosten necesario den nos lucha pa haci loke ta corecto. (Filipensenan 4:8) Pero di berdad esei lo yuda?

Ban wak e caso di Fidel, kende tawata conoci den su comunidad como un burache. Na momento cu e tawata bou di influencia di alcohol, e tawata huma, hunga wega di placa y bringa cu otro hende. Loke a yud’e vence e practicanan aki ta su studio di Bijbel y asociacion cu Testigonan di Yehova. Awor e ta gosa di un bida hopi mas miho cu su casa y su dos yiunan.

Algun hende lo por puntra: ‘Pero kico si mi haya un recaida?’ Apostel Huan a mustra con pa trata cu e situacion ei. El a skirbi: “Mi yiu chikitonan, mi ta skirbi boso e cosnan aki pa boso no haci pica. Y si un hende haci pica, nos tin un Abogado serca e Tata, Hesucristo, e husto; y e mes ta e propiciacion pa nos picanan, y no pa di nos so, ma tambe pa esnan di henter mundo.” (1 Huan 2:1, 2) Si, Hesus su sacrificio ta cubri e erornan di un hende cu repenti y cu ta haci esfuerso sinsero pa haci cambio pa agrada Dios. En bista di e areglo ei, ki motibo valido un hende lo por tin pa entrega den e lucha pa haci loke ta bon?

Deseonan Robes Lo Wordo Venci

Si nos cultiva amor pa Dios y pa nos prohimo y haci bon uzo di e yudansa cu Dios ta duna nos, for di awor nos lo por tin exito den nos lucha contra deseonan robes. Ademas, e Palabra di Dios ta sigura nos cu e lucha aki lo no dura pa semper. Esnan cu haci bon uzo di Dios su provisionnan spiritual lo wordo cura completamente, tanto den sentido fisico como spiritual, den futuro cercano. (Revelacion 21:3-5; 22:1, 2) Nan lo haya liberacion for di e carga di pica y di loke cu e ta causa, esta, morto. (Romanonan 6:23) Di otro banda, esnan cu kier sigui cumpli cu deseonan impuro y perhudicial lo no ricibi e bendicionnan ei.—Revelacion 22:15.

Esta un consuelo pa sa cu nos lo no tin cu lucha contra deseonan robes pa semper. Nan lo ser elimina completamente y permanentemente. Ki un alivio esei lo ta!