Tempo Cu e Riu A Core Contrario

RIU Mississippi ta keda manera un liña schuin-duars riba mapa di Merca, cu ta parti e pais den dos. E riu su fuente ta na Minnesota, y einan e ta solamente tres meter hancho. Pero rapidamente e ta bira mas hancho segun cu decenas di otro riu ta bin caba den dje a lo largo di su recorido di 3.700 kilometer bayendo den direccion suit. Serca di New Orleans, Louisiana, e riu ta bira 60 meter hundo y un kilometer hancho. Na e boca di e riu, cu ta forma un delta, 15 miyon liter di awa ta basha den Golfo di Mexico cada seconde. Ora cu e riu ta desborda, esei por aumenta te na mas cu 80 miyon liter pa seconde.

Hende cu ta biba a lo largo di e riu sa kico tur e awa ei por haci. Nan a mira con el a inunda cunucu, kibra dam, lastra casnan bai cu ne y mata hende. Pero poco hende awe por imagina loke a sosode cu e riu ei menos cu 200 aña pasa.

Na december 1811, un forsa invisibel a sera su gara riba e vaye central di Mississippi y keda cu ne teni pa varios siman. Un serie di temblor grandi a pone e fondo di riu subi y baha manera un lama agita. E agitacion tawata asina fuerte, cu dia 7 di februari 1812, un poco mas ariba di New Madrid, Missouri, e poderoso Riu Mississippi a core bai den direccion nort en bes di suit.

Dianan di Miedo y Temblamento

E suseso ei tawata culminacion di un periodo di teror conoci como e temblornan di New Madrid. E prome temblor a tuma luga dos or di marduga, dia 16 di december 1811, caminda awe ta e skina suitost di e estado di Missouri. Cunukeronan y hende den stad a bula lanta ora nan mueblenan a cuminsa hala y nan servies di porselana a spat for di otro riba flur. Casnan tawata hala kita for di nan fundeshi. Hende a core sali pafo y a keda pafo, temblando di friu y di e sagudimento di tera. Nan propio casnan, cu anteriormente tawata un refugio di sosiego y trankilidad, a bira un menasa pa nan.

Suela a sigui sagudi, pero menos fuerte, te cu mainta a cuminsa habri. Rond di 7’or di mainta, un otro temblor severo a tuma luga. Anto serca di 11 or, tawatin un temblor asta mas fuerte ainda. Tera a habri y keda yen di scheur. Lodo, awa y piedra di carbon a spuit sali for di e scheurnan manera fontein spantoso. Gas di sulfur cu a hole stinki tawata sali for di bou di tera y daña e aire. Testigonan ocular a mira miles di parha tur confundi ta bula bai for di e area. Ora cu e temblamento violento a stop, e stad di Little Prairie, Missouri, a keda un ruina.

Un Biahe Turbulento den e Riu

Mientras cu e temblornan tawata tumando luga, e bapor nobo nobo New Orleans tawata nabegando den Riu Ohio rumbo pa Riu Mississippi, cu destinacion New Orleans, Louisiana. E excitacion y alegria di e pasaheronan a cambia den gran precupacion, segun cu e boto a drenta e parti di riu afecta door di temblor. Oriyanan di riu tawata sagudi y basha den e riu. Tronconnan di palo cu tawatin hopi tempo den fondo, a cuminsa drif riba superficie y a menasa di kibra e body di e boto. Olanan grandi tawata sagudi e boto manera un corki. Mapanan di nabegacion cu nan a prepara pa e biahe no tawata sirbi mas, pasobra e temblornan a cambia e curso di e riu. Un biahe agradabel a para bira un biahe di teror.

Dia 19 di december 1811, New Orleans tawata yega serca di New Madrid, y a spera di haya provision. Sinembargo, e stad canto di riu cu anteriormente tawata un stad yen di bida, no tawata den condicion pa duna ningun yudansa. E poco hendenan cu ainda tawata einan, desesperadamente a haci seña pa e boto bin recohe nan for di e ruinanan cu tawata saca huma, ruina di cas y negoshi.

Sinembargo, e bapor a sigui nabega bai suit riba Mississippi, y awor su pasaheronan tawata tembla sinfin. E bapor a pasa e pueblo di Point Pleasant, cu tawata un pueblo bandona. Little Prairie tawata e siguiente stad riba mapa. Pero e boto no a stop ei tampoco, ya cu gran parti di Little Prairie a disparce caba y e edificionan cu a keda tawata tur destrosa.

Mas pa suit, e bapor a haya su caminda sera pa tronconnan di palo cu e temblor a ranca y benta den e riu. Despues cu e tripulacion di New Orleans a habri e caminda cu hacha y forsa, nan a mara e boto pa pasa anochi na Isla #32, serca di caminda awe ta conoci como Osceola, Arkansas. Pero rond di cuat’or y mei di marduga, dia 21 di december, un pasahero a sinti cu e boto tawata trek straño na e cabuyanan cu tawatin e mara. Ora di dia a habri nan a mira loke a pasa. E cabuya tawata strak strak y a bai casi stret abou den awa. Bo no por a mira tera seco. Durante anochi, e fondo di riu a sak y Isla #32 a disparce bou di superficie, un victima mas di e temblornan di New Madrid.

New Orleans a completa su prome biahe sano y salvo, y tawata e prome boto cu a nabega e largura completo di Riu Mississippi riba energia di vapor (stoomkracht). Loke kisas ta e logro asta mas grandi ta e echo cu el a yega su destinacion.

Mas Sagudimento

Temblornan menos fuerte a sigui te den januari 1812. Anto dia 23 di januari, rond di 9’or di mainta, e hendenan a sinti e golpinan spantoso di un otro temblor fuerte. E stad di Point Pleasant, Missouri, cu ya caba a ser sagudi, tawata serca di e epicentro di e temblor, y su habitantenan ya a hui bai. Ora cu algun di nan a regresa na februari 1812, nan a descubri cu no solamente e stad a ser destrui sino tambe cu tur rastro di e stad a disparce. E temblor di 23 di januari a benta Point Pleasant completamente den Riu Mississippi.

Hopi hende den e region ei a teme cu esaki tawata fin di mundo, y pesei nan a cuminsa acudi na religion. Algun pasto a bira contento ya cu esnan resien repenti awor a yena e bankinan di misa cu tawata bashi pa hopi tempo. Otro pastonan no a confia e motivacion di nan tou cu tawata crece rapidamente, y a yama nan cristiannan di temblor. Pasto James B. Finley a duna un predicashi picante citando Revelacion 6:17 for di e version di Bijbel King James cu ta bisa: “Pasobra e dia grandi di su furia a yega, y ken lo por keda para?” Den un sentido fisico mas bien cu spiritual, tawata dificil pa keda para debi na e sagudimento di tera.

E Furia Final

Aunke pastonan a manda hopi suplica shelo, desaster a sigui asota e region. Prome cu mainta a habri dia 7 di februari 1812, e habitantenan di e region ei a bolbe wordo sagudi for di nan soño intrankil door di ondanan enorme di temblor di e epicentro cu tawata bou di nan. E temblor aki, esun mas violento di tur, tawata asina fuerte cu el a basha schoorsteen abou na Cincinnati, Ohio, 650 kilometer leu. El a pone cloknan di misa bati na Boston, Massachusetts, 1.600 kilometer leu. Y te den nort na Montreal, Canada, tayo cu scoter a sagudi riba mesa. Un homber di Kentucky, cu tawata biba 130 kilometer for di e epicentro, a skirbi den su diario di nabegacion: “Si nos no bai for di aki, e tera lo guli nos bibo.” Sinembargo, un parti special di e furia di e temblor tawata reserva pa e stad canto di riu, New Madrid.

E temblornan anterior a causa daño pisa na New Madrid, a mata varios habitante y a core cu mayoria sobreviviente. Pero e temblor di 7 di februari a caba completamente cu e luga. Segun cu e temblor a asota e luga, e resto di e habitantenan a hui bai, y net na ora. E oriya halto caminda e stad tawata situa a garna y basha den Riu Mississippi, caminda e awanan di e riu agita a suta y a bai cu e planki-, bloki- y piedranan di New Madrid. Den poco tempo, no a keda ningun rastro di e stad.

Efectonan Riba e Riu

E temblornan di New Madrid a produci watervalnan temporal den Riu Mississippi serca di New Madrid. Decenas di boto a bolter ora cu nan a pasa riba nan. E temblor di 7 di februari a pone e tera subi y baha, forsando e coriente di riu pa cambia di direccion. Scheurnan grandi a habri den fondo di e riu, creando remolinanan violento cu a destrui mas boto. E temblornan a schuif e canal di e riu y a inunda stad y boerderij. Tambe nan a desvia e awa di e riu, creando Reelfoot Lake, un lago grandi na Tennessee cu no tawata existi prome cu 1812. Palonan cu un tempo tawata para riba tera seco awor ta meimei di Reelfoot Lake, garando tenazmente na e tera bou di awa.

Hende no tin e midi exacto di e magnitud di e temblornan aki, ya cu na 1812 no tawata existi e aparatonan moderno di midi temblor. Cientificonan ta calcula cu por lo menos tres di e temblornan di New Madrid lo a surpasa 8,0 riba e escala di Richter. Esakinan ta e temblornan di mas grandi cu hamas nan a observa riba continente di Estados Unidos y ta entre esnan mas fuerte cu hamas a keda registra riba tera. Aunke e area afecta tawatin masha tiki habitante, decenas di hende—kisas centenares—a muri den e desaster.

Awe Riu Mississippi ta core banda di e skina suitost di Missouri como si fuera nada no a pasa. Pero si e riu por a papia, lo el a conta ke se yama un historia di e tempo cu el a core contrario.

[Mapanan na pagina 18]

(Pa e texto den su formato completo, wak e publicacion)

MISSOURI

Riu Mississippi

New Madrid

[Plachi na pagina 19]

E bapor “New Orleans”

[Reconocemento]

Uza cu permit, State Historical Society of Missouri, Columbia

[Plachi na pagina 20]

E temblornan a crea Reelfoot Lake

[Reconocemento pa Potret na pagina 18]

U.S. Fish & Wildlife Service, Washington, D.C./Dave Menke