Kico Bijbel A Profetisa Tocante Temblor Grandi?

Tur aña miles di temblor ta tuma luga. Mayoria temblor ta chikito, pero temblor grandi por causa hopi destruccion, sufrimento y morto. Tin biaha, temblor asina ta causa tsunami, ta destrui area canto di costa, y ta kita bida di hopi hende cu ta biba eynan. Bijbel a profetisa tocante e temblornan aki?

Den e articulo aki:

• Bijbel a profetisa tocante temblor?

• E temblornan den nos tempo ta cumplimento di profecia di Bijbel?

• Kico profecia di Bijbel tocante temblor ta nifica pa nos?

• Idea robes tocante profecia di Bijbel y temblor

Bijbel a profetisa tocante temblor?

Bijbel ta papia di temblor den un profecia cu Hesus a menciona. Nos por lesa loke el a bisa tocante temblor den e siguiente tres bukinan di Bijbel:

“Nacion lo lanta contra nacion y reino contra reino, y lo tin scarsedad di cuminda y temblor den un luga tras di otro.”—Mateo 24:7.

“Nacion lo lanta contra nacion y reino contra reino; den un luga tras di otro lo tin temblor; lo tin scarsedad di cuminda.”—Marco 13:8.

“Lo tin temblor grandi, y den un luga tras di otro lo tin pest y scarsedad di cuminda.”—Lucas 21:11.

Pues, Hesus a bisa cu lo tin “temblor grandi” den “un luga tras di otro” y na mes momento lo tin guera, scarsedad di cuminda y pest. Ora tur e cosnan ey tuma luga hunto, nos lo sa sigur cu nos ta bibando den un periodo den historia humano cu yama “conclusion di e era aki” of “e ultimo dianan.” (Mateo 24:3; 2 Timoteo 3:1) Di acuerdo cu cronologia di Bijbel, nos a mira cu “e ultimo dianan” a cuminsa na 1914 y no a caba ainda.

E temblornan den nos tempo ta cumplimento di profecia di Bijbel?

Si. Loke Hesus a profetisa, incluyendo loke el a bisa tocante temblor, ta cuadra cu e sucesonan cu nos ta mira ta tuma luga den nos tempo. For di 1914, tabatin mas cu 1.950 temblor grandi cu a causa morto di mas cu dos miyon hende.a Wak algun ehempel di e ultimo decadanan.

2004—Ocean Indico. Un temblor di un magnitud di 9.1 a causa un tsunami cu a asota mas cu 10 pais y a mata mas o menos 225.000 hende.

2008—China. Un temblor di un magnitud di 7.9 a destrui varios pueblo y ciudad, y segun calculo 90.000 hende a perde nan bida. Ademas, alrededor di 375.000 hende a ser herida y miyones di hende a perde nan cas.

2010—Haiti. Un temblor di un magnitud 7.0, sigui pa diferente temblor leve a mata mas cu 300.000 persona y a laga mas cu un miyon hende sin cas.

2011—Japon. Un temblor di un magnitud 9.0 y e tsunaminan cu el a causa a resulta den morto di mas o menos 18.500 hende y miles di hende mester a bandona nan cas. E planta di coriente na Fukushima a sufri daño, y como resultado tabatin un accidente nuclear grandi. Dies aña despues, mas o menos 40.000 hende cu tabata biba cerca di e planta ainda no por bay nan cas bek debi na e nivel halto di radiacion.

Kico profecia di Bijbel tocante temblor ta nifica pa nos?

Profecia di Bijbel tocante temblor ta spierta nos tocante loke lo tuma luga den futuro cercano. Hesus a bisa: “Ora boso mira e cosnan aki sosode, boso por ta sigur cu e Reino di Dios ta cerca.”—Lucas 21:31.

Bijbel ta splica cu e Reino di Dios ta un gobierno real den cielo cu Cristo Hesus como rey. E Reino aki ta esun cu Hesus a siña su siguidornan pidi p’e den oracion.—Mateo 6:10.

Ora e Reino di Dios goberna Tera, Dios lo haci sigur cu desaster natural, manera temblor, no haci daño na hende. (Isaias 32:18) Ademas, Dios lo cura e daño fisico y emocional cu temblor a causa. (Isaias 65:17; Revelacion 21:3, 4) Pa haya sa mas, lesa e articulo: “Kico e Reino di Dios Lo Haci?”