Na Ki Tempo e Reino di Dios Lo Goberna Mundo?

KI SUCESONAN HESUS A BISA CU LO TUMA LUGA?

Hesus a bisa: “Nacion lo lanta contra nacion y reino contra reino, y lo tin temblor grandi, y den un luga tras di otro lo tin pest y scarsedad di cuminda.” (Lucas 21:10, 11) Mescos cu e liñanan riba bo dede ta forma un fingerprint, asina tur e sucesonan aki hunto ta forma un señal bon cla. Y mescos cu un fingerprint ta yuda identifica un hende, asina e sucesonan aki, cu lo tuma luga den e mesun tempo, lo indica cu “e Reino di Dios ta cerca.” Acaso e sucesonan ey ta tumando luga na e mesun tempo rond mundo? Laga nos wak.

1. GUERA

Na 1914, un guera a cuminsa cu a afecta mas hende y mas luga cu nunca prome. Historiadornan hopi biaha ta bisa cu aña 1914 a cambia historia pasobra e aña ey tabata e prome biaha cu un guera mundial a tuma luga. Durante e guera ey, tabata prome biaha cu nan a uza un cantidad grandi di tanki di guera, bomba aereo, mitrailleur, gas venenoso y otro armanan mortal. Despues un di dos guera mundial a tuma luga y nan a inventa y uza bomba atomico pa prome biaha. Desde 1914 padilanti, hopi guera a tuma luga den un luga tras di otro, y e gueranan ey a mata miyones di hende.

2. TEMBLOR

E enciclopedia Britannica Academic ta bisa cu tur aña mas o menos 100 temblor cu ta suficiente fuerte pa causa “daño considerabel” ta tuma luga. Y e Servicio Geologico di Merca ta bisa cu “na harmonia cu registronan (desde 1900) por spera alrededor di 16 temblor grandi tur aña.” Aunke cu algun cientifico ta bisa cu e cantidad di temblor a aumenta door cu por detecta temblor mas mihor, echo ta cu temblornan grandi ta causa mas sufrimento y morto cu antes.

3. SCARSEDAD DI CUMINDA

Scarsedad di cuminda hopi bes ta consecuencia di guera, corupcion, problema economico grandi, mal maneho riba tereno di agricultura y falta di planeamento pa enfrenta desaster natural. E rapport di 2018 di e Programa Mundial di Alimentacion ta bisa: “Rond mundo, 821 miyon hende ta pasa hamber y 124 miyon ta core peliger di muri.” Y tur aña, desnutricion ta causa morto di mas o menos 3,1 miyon mucha. Na aña 2011, esaki a causa casi mitar di e mortonan infantil rond mundo.

4. MALEZA Y EPIDEMIA

Un publicacion di e Organisacion Mundial di Salud ta bisa: “Ya caba yen di epidemia grandi a tuma luga den siglo 21. Malezanan bieu manera, colera, morto preto y keintura gel a lanta cabes. Y malezanan nobo a presenta, manera SARS, influenza cu ta afecta hopi hende, MERS, ebola y zika.” Ultimo, nos a haya nos cu e pandemia di COVID-19 tambe. Aunke cientificonan y dokternan a descubri hopi cos tocante maleza, nan no a logra haya cura pa tur enfermedad.

5. UN OBRA MUNDIAL DI PREDICACION

Hesus a papia tambe riba un otro aspecto di e señal. El a profetisa: “E bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.” (Mateo 24:14) Mientras cu mundo ta experencia problemanan hopi grandi, mas cu ocho miyon hende di tur nacion ta declara e bon noticia di e Reino di Dios den mas cu 240 pais y na mas cu 1.000 idioma. Nunca prome esey no a yega di sosode den historia.

KICO E SEÑAL TA NIFICA PA NOS?

E sucesonan cu ta forma parti di e señal cu Hesus a duna ta tumando luga awor. Dicon nos mester sa esey? Pasobra Hesus a bisa: “Ora boso mira e cosnan aki sosode, boso por ta sigur cu e Reino di Dios ta cerca.”—Lucas 21:31.

E señal cu Hesus a duna hunto cu calculacion basa riba Bijbel ta yuda nos compronde cu Dios a establece su Reino den cielo na aña 1914.a E aña ey, el a instala su yiu, Hesucristo, como Rey. (Salmo 2:2, 4, 6-9) Pronto, e Reino di Dios lo cuminsa goberna mundo, elimina tur gobierno humano y comberti Tera den un paradijs caminda hende por biba pa semper.

Pronto, e palabranan di e oracion modelo cu Hesus a siña nos lo cumpli: “Laga bo Reino bin. Laga bo boluntad sosode, mescos cu den cielo, tambe riba Tera.” (Mateo 6:10) Pero kico e Reino di Dios ta haciendo desde cu el a cuminsa goberna na aña 1914? Y kico nos por spera ora e Reino goberna mundo? Ban wak esey den e siguiente articulo.