Con Nos Por Sa Cu Armagedon Ta Serca

BO SA kico un señal ta, toch?— Na Capitulo 46 nos a lesa di e señal cu Dios a duna pa nos por sa cu nunca mas e no ta bai caba cu mundo door di un dilubio. E apostelnan tambe a pidi un señal pa nan por a sa ki ora Hesus a bolbe, y ki ora e fin di mundo ta serca.—Mateo 24:3.

Hesus lo tawata invisibel ora e cuminsa goberna den shelo. Door di esei hende lo tawatin mester di un señal cu nan por a mira, pa nan sa cu el a cuminsa goberna. Pesei Hesus a bisa su disipelnan pa nan paga tino y mira ki ora cierto cosnan lo sosode aki na tera. Ora e cosnan ei sosode, esei lo kiermen cu el a bolbe y a cuminsa goberna den shelo como Rei.

Hesus a siña su disipelnan cu ta hopi importante pa nan keda vigila. El a bisa nan: “Wak e palo di figo y tur e palonan; asina cu nan ta saca blachi, boso ta mira esei y lo sa pa boso mes cu awor zomer ta serca.” Hende ta ripara ora zomer ta serca. Ta mescos cu ora bo mira solo baha bo sa cu ta bai bira anochi. Asina tambe, ora bo mira cu e cosnan cu Hesus a papia di dje ta sosode, bo por sa cu Armagedon ta serca.—Lucas 21:29, 30.

Riba e pagina aki y esun despues di dje nos ta bai wak un par di plachi. Riba e plachinan nos por mira e cosnan cu Hesus a bisa cu ta parti di e señal di cu e Reino di Dios ta serca. Ora tur e cosnan aki pasa, e Reino di Dios cu Cristo como Gobernante ta bai garna tur otro gobierno, manera nos a lesa na Capitulo 46.

Pesei, paga bon tino na e plachinan riba e dos paginanan prome cu esun aki, anto nos lo papia riba nan. Na Mateo 24:6-14 y Lucas 21:9-11 bo por lesa tocante e cosnan cu bo ta mira riba e plachinan aki. Anto paga tino riba e number chikito cu tin riba cada plachi. Bo ta haya e mesun number ei na cuminsamento di e paragraf cu ta splica e plachi. Awor, laga nos ban wak si e diferente partinan di e señal cu Hesus a duna ta cumpliendo awendia.

(1) Hesus a bisa: “Boso lo tende di gueranan y rumornan di gueranan; . . . nacion lo lanta contra nacion, y reino contra reino.” Abo a yega di tende noticia di guera?— E prome guera mundial a sosode di 1914 te 1918. Despues a bin Segundo Guera Mundial, di 1939 pa 1945. Nunca prome no a yega di tin un guera mundial! Ma awor tin guera hopi caminda na mundo. Ta parce manera cos cu ta tur dia nos ta tende of lesa di guera na television, na radio y den corant.

(2) Tambe Hesus a bisa: “Na varios luga lo tin hamber.” Kisas bo sa cu no ta tur hende tin suficiente cuminda pa nan come. Miles di hende ta muri tur dia door cu nan no tin suficiente cuminda.

(3) Ademas Hesus a bisa: ‘Lo tin pestilencia na varios luga.’ Abo sa kico ta un pestilencia, of un pest?— Esei ta un malesa of enfermedad cu ta mata hopi hende. Malesa di kabouter ta un di e pestnan hopi grandi cu a yega di tin. El a mata rond di 20 miyon hende, anto den mas o menos un aña so. Awendia, casi sigur asta mas tanto hende ta bai muri di AIDS. Y tin yen di otro enfermedad, manera cancer y malesa di curason, cu ta mata miles di hende tur aña.

(4) Esaki ta un otro parti di e señal cu Hesus a duna: “Na varios luga lo tin . . . temblor.” Abo sa kico ta temblor?— Temblor ta ora tera sagudi. Cas ta basha abou, y hopi bes hende ta muri. For di aña 1914 tin hopi temblor tur aña. Abo a yega di tende di temblor?—

(5) Hesus a bisa cu un otro parti di e señal ta cu lo tin ‘mas y mas maldad.’ Ta pesei tin asina tanto hortamento y violencia. Tur caminda hende tin miedo pa un hende purba drenta den nan cas. Nunca prome no tawatin asina tanto crimen y violencia na tur parti di mundo manera tin awor.

(6) Hesus a duna un parti hopi importante di e señal ora el a bisa: ‘E bon noticia aki di e reino lo wordo predica den henter mundo como un testimonio pa tur nacion, y e ora ei e fin lo yega.’ (Mateo 24:14) Si bo ta kere den ‘e bon noticia aki’, bo mester papia di dje cu otro hende. Asina bo tambe por cumpli cu e parti aki di e señal.

Tin biaha hende ta bisa cu e cosnan cu Hesus a bisa cu lo bai pasa ta cosnan cu semper tawata sosode caba. Pero nunca prome tur e cosnan ei no a yega di sosode na asina tanto parti di mundo, anto pareu. Bo ta compronde kico e señal ta mustra nos?— E ta mustra nos cu, si nos mira tur e cosnan aki sosode, ta falta poco tempo pa e mundo malo aki caba y pa e mundo nobo di Dios bin na su luga.

Ora Hesus a duna e señal aki, el a papia di un temporada di aña special tambe. El a bisa: “Haci oracion pa boso huida no sosode den winter.” (Mateo 24:20) Kico bo ta kere cu e tawata kiermen?—

Wel, kico lo por sosode si un hende mester scapa di un desaster den winter, ora mal weer ta pone cu ta dificil of asta peligroso pa hende biaha?— Si e logra scapa mes, lo e mester pasa den yen di cos. Lo no ta tristo si un hende muri den un mal tempo di winter djis pasobra e tawata mucho druk cu otro cos, anto no a cuminsa su biahe mas prome?—

Bo a compronde kico Hesus tawata kiermen ora el a bisa cu nos no mester warda te ora winter yega pa nos hui?— El a mustra nos cu, ya cu nos sa cu Armagedon ta serca, no ta bon pa nos tarda pa tuma accion pa mustra cu nos ta stim’e door di sirbi Dios. Si nos tarda, por bira mucho laat pa nos sirbie. E ora ei nos lo ta mescos cu e hendenan cu a biba tempo di e gran Dilubio. Nan a tende Noe su spiertamento, pero nan no a drenta e arca.

Awor, ban papia riba con cos lo ta despues cu e gran guera di Armagedon pasa. Nos ta bai siña kico Dios tin prepara pa nos tur cu ta stim’e y sirbie awor.