Moises Hende of Mito?

MOISES a nace na un tempo cu morto tawata menasa. Su pueblo tawata un grupo di famianan nomada cu a bai establece nan mes na Egipto hunto cu nan tata Yacob (of Israel) pa nan no muri di hamber. Pa decadanan largo nan a biba na pas banda di nan biciñanan Egipcio. Pero na dado momento a surgi un cambio menasante. Un informe historico respeta ta bisa: “Y a lanta un rei nobo na Egipto . . . Y el a bisa su pueblo: ‘Mira, e pueblo di e yiunan di Israel ta mas tanto y mas poderoso cu nos. Ban, laga nos trata nan cu sabiduria pa nan no multiplica.’” Kico tawata su plan? Frena e poblacion Israelita door di haci nan catibo y “amarga nan bida cu trabou pisa”, y despues door di ordena e parteranan Hebreo pa mata tur yiu homber cu nace. (Exodo 1:8-10, 13-16) Pero debi na e curashi di e parteranan, kendenan a nenga di obedece e ordo, e Israelitanan a sigui multiplica toch. Pesei e rei di Egipto a decreta: “Tur yiu homber cu nace boso mester tira den [riu] Nijl.”—Exodo 1:17, 22.

Amram cu Jocabed, un pareha Israelita, “no a tene miedo di e decreto di rei.” (Hebreonan 11:23) Jocabed a duna lus na un yiu homber cu despues a ser describi como “bunita den bista di Dios.”a (Echonan 7:20) Podise nan a ripara di un manera of otro cu e yiu aki tawata special pa Dios. En todo caso, nan a nenga di entrega nan yiu pa e ser mata. Riscando nan propio bida, nan a dicidi di scond’e.

Despues di tres luna, Moises su mayornan no por a scond’e mas. Ya cu nan no tawatin mas opcion, nan a dicidi di actua. Jocabed a pone e baby den un macutu di riet y a lag’e drif riba Riu Nijl. Sin cu e tawata sa, Jocabed asina a inicia susesonan cu lo a cambia historia!—Exodo 2:3, 4.

E Susesonan Aki Ta Creibel?

Awe tin hopi academico cu ta rechasa e susesonan aki y ta considera nan como fantasia. Segun e revista Christianity Today: “Echo ta cu hende no a haya ni un solo evidencia arkeologico pa [e añanan] cu e yiunan di Israel a biba temporalmente na Egipto.” Aunke kisas no tin prueba fisico direct, tin bastante evidencia indirect cu e relato biblico ta creibel. Den su buki Israel in Egypt (Israel na Egipto), James K. Hoffmeier, un experto riba tereno di asuntonan di antiguo Egipto, a bisa: “Datonan arkeologico ta demostra bon cla cu e pueblonan di e region Levant [paisnan situa na parti oost di Mediteraneo] tawatin custumber di bai Egipto, specialmente debi na problemanan di clima cu a resulta den secura . . . Pues, durante un periodo aproximadamente di aña 1800 pa 1540 prome cu nos era, Egipto tawata un luga atractivo pa bai biba pa e hendenan di abla Semitico di parti west di Asia.”

Ademas, pa hopi tempo expertonan a reconoce cu Bijbel su descripcion di e sclabitud na Egipto tawata exacto. E buki Moses—A Life ta informa: “Parce cu e relato biblico di e opresion di e Israelitanan ta ser confirma door di un pintura hopi copia for di un graf di antiguo Egipto, caminda bo ta mira detayadamente con un grupo di catibo ta traha baksteen di klei.”

Bijbel su descripcion di e macutu chikito cu Jocabed a uza tambe ta parce berdad. Bijbel ta bisa cu e tawata traha di riet, locual segun e buki Commentary di Cook, “e Egipcionan tawata uza normalmente pa traha boto liviano y rapido.”

Sinembargo, lider di un nacion lo a duna ordo pa mata baby cu sanger friu? Esei no ta un cos dificil pa kere? Erudito George Rawlinson ta recorda nos: “Matamento di baby . . . ta algo cu a reina extensamente na diferente tempo y luga, y a ser considera como un asunto insignificante.” En berdad, nos no tin cu bai masha leu pa haya ehempelnan mesun spantoso di asesinato masal den tempo moderno. E relato di Bijbel kisas ta perturbador, pero lamentablemente e ta masha creibel.

Adopta den Famia di Farao

Jocabed no a laga loke lo bai pasa cu su yiu na casualidad. El “a pone [e macutu] meimei di e richinan canto di Nijl.” Probablemente esaki tawata un sitio caminda el a spera cu un hende lo a haya e macutu. Aki ta caminda e yiu mohe di Farao sa bin baña, kisas riba un base regular.b—Exodo 2:2-4.

Umbes nan a descubri e macutu chikito. “Ora cu [e yiu mohe di Farao] a habrie, el a mira e mucha, y at’e mucha tawata yora. Y el a haya duele di dje y a bisa: ‘Esaki ta un di e muchanan Hebreo.’” Anto e princes Egipcio a dicidi di adopt’e. E nomber cu su mayornan a dun’e originalmente a pasa pa olvido. Awe e ta conoci rond mundo pa e nomber cu su mama adoptivo a dun’e—Moises.c—Exodo 2:5-10.

Sinembargo, lo no ta manera un cuenta di ada pa kere cu un princes Egipcio lo a tuma un mucha asina? No, pasobra religion di Egipto a siña hende cu obranan di bondad tawata un rekisito pa bai shelo. Pa loke ta trata e adopcion riba su mes, arkeologo Joyce Tyldesley a comenta: “Mohe Egipcio a logra igualdad cu homber Egipcio. Nan tawata disfruta di e mesun derechonan huridico y economico, por lo menos teoreticamente, y . . . hende mohe por a adopta yiu.” Un antiguo documento di adopcion de echo ta documenta con un mohe Egipcio a adopta su catibonan. Pa loke ta e asunto di paga e mama di Moises pa fungi como mama di lechi, The Anchor Bible Dictionary ta bisa: “E asunto di paga Moises su mama natural pa e dun’e pecho . . . ta recorda nos di areglonan identico describi den contractnan di adopcion di Mesopotamia.”

Unabes nan a adopta Moises, nan lo a sconde e echo cu e ta un Hebreo for di dje como un secreto desagradabel? Algun pelicula di Hollywood ta laga parce cu ta asina. Pero e Scritura ta indica otro. Moises su ruman mohe, Miriam, na un manera sabi ta haci areglo pa Moises su propio mama, Jocabed, dun’e pecho. Ta sigur cu e mohe temeroso di Dios aki lo no a sconde e berdad pa su yiu! Y como cu den tempo di antiguedad nan tawata duna yiu pecho pa varios aña, Jocabed tawatin hopi oportunidad pa siña Moises tocante ‘e Dios di Abraham, Isaak y Yacob.’ (Exodo 3:6) E fundeshi spiritual ei a yuda Moises bon, pasobra despues cu nan a entrega Moises na e yiu mohe di Farao, “Moises a wordo educa den tur e siñansa di e Egipcionan.” Segun historiado Yosefo, Moises a subi te na rango di general den un guera contra Etiopia, pero no tin confirmacion di esei. Sinembargo, Bijbel ta bisa cu Moises “tawata un homber di poder den palabra y echo.”d—Echonan 7:22.

Na edad di 40 aña, Moises probablemente tawata cla pa bira un lider Egipcio prominente. Lo e por a haya poder y rikesa si el a keda den e famia di Farao. Anto algo a sosode cu a cambia su bida.

Exilio na Madian

Un dia Moises “a mira un Egipcio ta bati un Hebreo, un di su rumannan.” Pa añanan, Moises a disfruta di e bentaha di ta Hebreo y e bentaha di ta Egipcio. Pero ora el a mira un Egipcio ta bati un Israelita—podise casi pa mat’e—esei a motiva Moises pa tuma un decision dramatico. (Exodo 2:11) El “a nenga di wordo yama yiu di Farao su yiu mohe, scohiendo pa mas bien sufri maltrato hunto cu e pueblo di Dios.”—Hebreonan 11:24, 25.

Moises a actua lihe y irevocablemente: “El a dal e Egipcio mata y a scond’e den santo.” (Exodo 2:12) Esaki no tawata un acto di un persona “inclina na atakenan repentino di rabia”, manera un critico a pretende. Esaki tawata probablemente un acto di fe—aunke mal dirigi—den Dios su promesa cu Israel lo ser libra for di Egipto. (Genesis 15:13, 14) Podise Moises a kere inocentemente cu su accion lo a curasha su pueblo pa rebela. (Echonan 7:25) Pero, pa su decepcion, e Israelitanan a nenga di reconoce su liderato. Ora cu noticia di e asesinato a yega na horea di Farao, Moises a hay’e obliga di hui bai den exilio. El a establece su mes na Madian, y a casa cu Sefora, yiu mohe di Jetro, hefe di un tribu nomada.

Pa 40 aña largo, Moises a biba como un simpel wardado di carne, su speransa di ser un libertado a keda destrosa. Pero un dia el a hiba e tou di bestia di Jetro na un sitio serca di Sero Horeb. Einan, e angel di Yehova a aparece na Moises den un mata na candela. Imagina bo e esena. Dios ta ordena Moises: “Saca mi pueblo, e yiunan di Israel, for di Egipto.” Pero e Moises cu ta contesta ta un homber indeciso, timido, insigur di su mes. E ta argumenta: “Ta ken mi ta pa mi lo a bai serca Farao y saca e yiunan di Israel for di Egipto?” E ta asta revela un defecto personal cu algun trahado di pelicula no ta trece dilanti: Evidentemente e tawatin un defecto den su abla. Moises ta hopi distinto for di e heroenan di mito- y leyendanan di antiguedad. E 40 añanan cu el a traha como wardado di carne a hacie mas humilde. Aunke Moises tawata insigur di su mes, Dios si tawatin e confiansa cu e ta apto como lider!—Exodo 3:1–4:20.

Liberacion for di Egipto

Moises ta bandona Madian y presenta dilanti di Farao, exigiendo pa e libra e pueblo di Dios. Ora cu e monarca cabesura ta nenga di haci esei, dies plaga devastador ta asota Egipto. E di dies plaga ta resulta den morto di tur yiu primogenito di Egipto, y tur aplasta Farao finalmente ta laga e Israelitanan bai.—Exodo, capitulo 5-13.

Mayoria lector ta bon na haltura di e susesonan aki. Pero nan ta historia real? Tin hende ta argumenta cu como cu Bijbel no ta menciona nomber di e Farao, e relato mester ta ficticio.e Sinembargo, Hoffmeier, cita anteriormente, a comenta cu hopi biaha escribanan Egipcio deliberadamente tawata laga nomber di enemigonan di Farao afo. E ta argumenta: “Historiadonan sigur lo no nenga cu e campaña na Meguido di Tutmosis III tawata un realidad historico djis pasobra e relato no a skirbi nomber di e reinan di Kades y Meguido.” Hoffmeier ta indica cu posiblemente nomber di e Farao ei no ta ser menciona pa “bon motibonan teologico.” Un di e motibonan ta cu door di keda sin menciona nomber di e Farao, e relato ta hala atencion na Dios y no na Farao.

Pero asina mes, criticonan ta rechasa e idea di un exodo masal di Hudiu for di Egipto. Erudito Homer W. Smith ta rasona cu un movemento masal asina “sigur lo tawata bon documenta den historia Egipcio y Sirio . . . Ta mas probabel cu e leyenda di e exodo ta un relato bruha y imaginario di e huida di un cantidad relativamente chikito di miembro for di Egipto pa Palestina.”

Ta berdad cu historiadonan no a haya un registro Egipcio di e suseso. Pero no tawata algo straño pa e Egipcionan cambia registronan historico ora cu e berdad tawata mucho bergonsoso of tawata contra di nan interesnan politico. Tempo cu Tutmosis III a bin na poder, el a purba elimina tur recuerdo di su predecesor, Reina Hatsheupsut. Segun John Ray, experto riba tereno di asuntonan di antiguo Egipto: “Nan a kita [Hatsheupsut] su inscripcionnan, lanta muraya rond di su pilarnan, y a lubida su monumentonan. Bo no ta haya su nomber den analnan mas despues.” Intentonan similar pa cambia of sconde echonan bergonsoso a tuma luga asta den tempo moderno.

Pa loke ta e falta di evidencia arkeologico di e Israelitanan su estadia den desierto, nos tin cu corda cu e Hudiunan tawata nomada, es decir, nan tawata biba den tent y biaha di un luga pa otro. Nan no a traha stad; ni nan no a planta. Nos por asumi cu nan a laga atras solamente marca di pia. Pero toch den Bijbel mes nos por haya prueba combencente di nan estadia den desierto. E buki sagrado ei ta referi cu frecuencia na esaki. (1 Samuel 4:8; Salmo 78; Salmo 95; Salmo 106; 1 Corintionan 10:1-5) Un cos importante ta cu Hesucristo tambe a duna testimonio cu e susesonan den desierto a tuma luga.—Huan 3:14.

Indudablemente anto, e relato biblico di Moises ta creibel y berdad. Sinembargo, el a biba hopi tempo pasa. Ta ki impacto Moises por tin riba bo bida djawe?

[Nota]

[Cuadro/Plachi na pagina 5]

E Rescate di Moises—Un Leyenda Pagano?

Criticonan ta bisa cu e rescate di Moises for di Riu Nijl ta zona sospechosamente paresido na e antiguo leyenda di Rei Sargon di Akkad, un historia cu algun hende ta bisa tawat’ei prome cu e historia di Moises. E historia di Rei Sargon tambe ta conta di un baby den un macutu cu ta ser rescata for di un riu.

Sinembargo, den historia tin masha hopi coinsidencia. Y ponemento di un baby den un riu kisas no tawata algo asina straño manera lo por parce. Segun Biblical Archaeology Review: “Nos mester tuma nota cu tanto Babilonia como Egipto ta culturanan cu ta biba canto di riu. Pesei ponemento di e baby den un macutu waterproof lo por ta un manera un tiki mas satisfactorio pa deshaci di un baby cu bent’e na un luga di tira sushi, locual tawata mas comun. . . . E historia di e yiu bandona pa su mayornan cu ta subi na un puesto prominente kisas ta un tema central den folclor, pero esei siguramente ta pasobra e ta algo cu ta sosode bes tras bes den bida real.”

Den su buki Exploring Exodus (Explorando Exodo), Nahum M. Sarna ta comenta cu aunke tin algun similaridad, e historia di e nacemento di Moises ta diferencia for di “E Leyenda di Sargon” den “hopi maneranan importante.” Pues anto, e pretencionnan cu e relato biblico ta saca for di un leyenda ta falta credibilidad.

[Cuadro/Plachi na pagina 8, 9]

Ken A Skirbi e Prome Cinco Bukinan di Bijbel?

Tradicionalmente, Moises ta ser acredita como autor di e prome cinco bukinan di Bijbel, yama Pentateuco. Kisas Moises a saca algun di su informacion for di fuentenan historico di mas prome. Sinembargo, hopi critico ta kere cu no ta Moises a skirbi e Pentateuco. Spinoza, un filosofo di siglo 17, a declara cu firmesa: “Pues ta mas cu claro cu e Pentateuco no tawata skirbi door di Moises.” Den e ultimo parti di siglo 19, e erudito Aleman Julius Wellhausen a popularisa e teoria di “documentario”, esta, cu e bukinan skirbi door di Moises ta un combinacion di documentonan di varios autor of teamnan di autor.

Wellhausen a bisa cu un autor consistentemente a uza e nomber personal di Dios, Yehova. Un otro autor a yama Dios “Elohim.” Un otro supuestamente a skirbi e reglanan di e servicio sacerdotal den Levitico, y un otro mas a skirbi Deuteronomio. Aunke algun academico a acepta e teoria aki pa decadanan, e buki The Pentateuch (E Pentateuco) di Joseph Blenkinsopp ta yama e hipotesis di Wellhausen un teoria “den crisis.”

E buki Introduction to the Bible (Introduccion pa Bijbel), di John Laux, ta splica: “E Teoria di Documentario ta basa riba declaracionnan cu ta sea arbitrario of absolutamente falso. . . . Si e Teoria stricto di Documentario tawata berdad, e Israelitanan lo tawata victima di un engaño absurdo ora cu nan a permiti e carga pisa di e Lei ser imponi riba nan. Esei lo tawata e engaño di mas grandi hamas cometi den historia di mundo.”

Un otro argumento ta cu e diferencianan di estilo di skirbi cu tin den e Pentateuco ta prueba di multiple autor. Sinembargo, K. A. Kitchen a comenta den su buki Ancient Orient and Old Testament (Antiguo Oriente y Testament Bieu): “Diferencianan den estilo di skirbi no ta nifica nada, y ta refleha e diferencianan di e topico en particular.” Tambe nos por haya variacionnan similar di estilo di skirbi “den manuscritonan di antiguedad di cua nan unidad literario ta fuera di tur duda.”

E argumento cu uzo di diferente nomber y titulo pa Dios ta prueba cu tawatin varios autor, ta un argumento hopi suak. Den un solo porcion chikito di e buki di Genesis, Dios ta ser yama “e Dios Haltisimo”, “Creador di shelo y tera”, “Señor Soberano Yehova”, “Dios cu ta mira”, “Dios Todopoderoso”, “Dios”, “e Dios berdadero” y “e Hues di henter mundo.” (Genesis 14:18, 19; 15:2, NW; 16:13; 17:1, 3, 18, NW; 18:25) Ta diferente autor a skirbi cada un di e textonan aki di Bijbel? Of kico di Genesis 28:13 (NW), caminda Bijbel ta uza e palabranan “Elohim” (Dios) y “Yehova” hunto? Ta dos autor a colabora pa skirbi e solo versiculo ei?

Si nos aplica e rasonamento aki na un obra skirbi den nos tempo nos lo mira con suak e rasonamento ei ta. Den un buki resien tocante Segundo Guera Mundial, nan ta yama e cansiyer di Alemania “Führer”, “Adolf Hitler”, y simplemente “Hitler” den transcurso di un par di pagina. Lo tin un hende cu lo tribi bisa cu esaki ta proba cu e buki tawatin tres diferente autor?

No obstante, masha hopi variacion riba e teorianan di Wellhausen ta sigui lanta. Entre nan tin e teoria cu dos academico a presenta relaciona cu e autor cu consistentemente a uza e nomber personal di Dios, Yehova. Nan no solamente ta nenga cu e autor tawata Moises sino tambe ta declara cu “e autor aki tawata un hende mohe.”

[Plachi]

Humildemente Moises a skirbi con el a faya di duna Dios gloria

[Plachi na pagina 7]

Pintura den un graf Egipcio di catibonan trahando bloki

[Reconocemento]

Erich Lessing/Art Resource, NY