E Punto di Bista Biblico

Precupacion Ta Indica un Falta di Fe?

“PRECUPACION TA PROHIBI.” Bou di e tema aki un pasto cu a biba na principio di siglo 20 a skirbi cu precupacion pa cosnan material no ta solamente malo, sino tambe “un pica grave.” Mas resientemente, un comentarista cu a skirbi tocante e tema di vence precupacion a declara: ‘Si nos ta precupa esei ta nifica cu nos no tin confiansa den Dios.’

Den ambos caso e escritornan a basa nan conclusionnan riba e Sermon Riba Sero di Hesus den cua el a bisa: “No precupa.” (Mateo 6:25) Siendo cu hopi hende ta wordo afecta door di precupacion awe, nos lo por puntra: Un cristian mester sintie malo pasobra e ta precupa? Precupacion ta indica un falta di fe?

Dios Ta Compronde Nos Imperfeccionnan

Bijbel no ta indica cu tur precupacion ta debi na falta di fe. Mirando cu nos ta biba den “temponan trabahoso”, ta casi imposibel pa ta completamente liber di precupacion. (2 Timoteo 3:1) Cristiannan fiel ta trata cu precupacion diario causa door di malesa, edad avansa, presion economico, friccion den famia, crimen y otro problemanan. Asta den tempo di antiguedad, e sirbidonan di Dios a sinti miedo y tawatin precupacion.

Considera e relato biblico di Lot. Dios a dun’e instruccion pa hui bai den e seronan pa e no wordo destrui hunto cu Sodoma y Gomora. Sinembargo, Lot a cuminsa precupa. El a bisa: “Ai no, mi señornan [“Yehova”, NW]!” Yen di duda el a sigui: “Mi no por hui bai na e seronan, pa e calamidad no alcansa mi y mi muri.” Dicon Lot tawatin miedo di bai den e seronan? Bijbel no ta bisa. Sea cual sea e motibo, Lot tawatin hopi miedo. Con Dios a reacciona? El a disiplina Lot pasobra el a mustra falta di fe of confiansa den dje? No. Al contrario, Yehova a tene consideracion cu Lot y a permitie hui bai na un stad den cercania.—Genesis 19:18-22.

Tin mas ehempelnan biblico di adoradonan fiel cu a yega di bira masha precupa. Ora nan a menasa profeta Elias cu morto, el a haya miedo y a hui. (1 Reinan 19:1-4) Moises, Ana, David, Habacuk, Pablo y otro homber- y mohenan cu fe fuerte tambe a yega di manifesta ansiedad of precupacion. (Exodo 4:10; 1 Samuel 1:6; Salmo 55:5; Habacuk 1:2, 3; 2 Corintionan 11:28) Apesar di esei, Dios a mustra compasion y a sigui uza nan den su sirbishi, mustrando asina cu e ta compronde hende imperfecto plenamente.

“Pica Cu Ta Mara Nos Asina Facil”

Sinembargo, precupacion continuo por debilita nos fe y pone nos perde nos confiansa den Dios. Apostel Pablo a referi na falta di fe como “e pica cu ta mara nos asina facil.” (Hebreonan 12:1) Door di inclui su mes, probablemente Pablo a admiti cu e mes tambe tin e tendencia di ser ‘mara facil’, esta, cu e sa tin momentonan den cua su fe ta debil.

Podise esaki tawata e caso cu Zacarias ora e no a kere e angel cu a bis’e cu su esposa lo a sali na estado. Tawatin un ocasion cu Hesus su apostelnan no por a cura un persona debi na nan “incredulidad” of poco fe. Toch e personanan aki a sigui gosa di Dios su aprobacion.—Mateo 17:18-20; Lucas 1:18, 20, 67; Huan 17:26.

Di otro banda, den Bijbel tin tambe ehempelnan di hendenan cu a perde confiansa den Dios y cu a sufri consecuencianan serio. Por ehempel, hopi Israelita cu a bandona Egipto no a wordo permiti pa drenta e Tera Priminti pa motibo di nan falta di fe. Na un ocasion nan a papia asta directamente contra Dios. Nan a bisa: “Pakico bo a saca nos for di Egipto pa muri den desierto? Pasobra no tin cuminda ni awa.” Dios a manda colebra venenoso pa castiga nan, mustrando asina cu e no tawata contento cu nan.—Numbernan 21:5, 6.

Door cu e habitantenan di Hesus su stad natal, Nazaret, tawata falta fe, nan no tawatin e privilegio di mira Hesus efectua mas milager den nan teritorio. Ademas, Hesus a condena e generacion malbado di e tempo ei severamente pa motibo di nan falta di fe. (Mateo 13:58; 17:17; Hebreonan 3:19) Pesei ta na su luga cu apostel Pablo a duna e spiertamento cu ta bisa: “Tene cuidou, rumannan, pa no tin den ningun di boso un curason malbado y incredulo [“cu ta falta fe”, NW], door di aleha for di e Dios bibo.”—Hebreonan 3:12.

Si, den casonan extremo falta di fe por resulta den un curason malbado. Pero esei no tawata e caso cu Zacarias ni e apostelnan di Hesus menciona den e ehempelnan anterior. Nan falta di fe tawata pa motibo di un debilidad temporal. Por lo general nan estilo di bida a mustra cu nan tawata “di curason puro.”—Mateo 5:8.

Dios Sa Kico Nos Tin Mester

E Scritura ta yuda nos haci distincion entre precupacion cu ta comun y e pica di falta di fe. Nos no mester confundi e precupacionnan diario of asta un falta di fe temporal debi na debilidad humano cu un falta di fe completo den Dios cu ta ser causa door di un curason malbado y indiferente. Pesei cristiannan no tin nodi sinti nan continuamente culpabel djis pasobra de bes en cuando nan ta precupa.

Sinembargo, nos mester tene cuidou si pa nos no bai precupa asina tanto te cu e sintimento aki ta cuminsa domina nos bida. Pesei e conseho di Hesus a refleha sabiduria ora el a bisa: “No precupa boso mes anto, bisando: ‘Kico nos lo come?’ of ‘Kico nos lo bebe?’ of ‘Kico nos lo bisti?’” Y el a continua cu e siguiente palabranan di consuelo: “Boso Tata celestial sa cu boso tin mester di tur e cosnan aki. Ma busca prome e reino di Dios y Su husticia, y tur e cosnan aki lo wordo añadi na boso.”—Mateo 6:25-33.

[Plachi na pagina 22]

Apostel Pablo a experencia ansiedad