Hende Homber cu Preocupacion—Con Bijbel Por Yuda?

Ora bo pensa riba un persona cu ta hopi preocupa,a kisas bo ta imagina un persona cu tin asina tanto miedo cu e ta paralisa, un persona cu di baina por lanta for di cama mainta of un persona cu ta papia constantemente tocante su preocupacionnan.

Ta berdad cu algun hende ta reacciona asina ora nan ta trata cu preocupacion. Pero, algun investigacion ta mustra cu otro hende, specialmente hende homber, por reacciona na un manera diferente. Un investigacion ta mustra cu hende homber “hopi biaha ta bebe alcohol of uza droga pa trata cu preocupacion. Pues, tin biaha, ora un hende homber ta bebe di mas, esey kisas ta pasobra e tin hopi preocupacion. Y hopi bes ora un hende homber ta hopi preocupa, e ta rabia of irita mas lihe.”

Claro cu no ta tur hende homber ta reacciona mescos ora nan haya nan cu preocupacion. Pero sin importa con un persona reacciona, preocupacion ta un problema cu ta birando mas grandi den e “temponan critico [aki cu ta] dificil pa trata cu ne.” (2 Timoteo 3:1) Si bo ta bira hopi preocupa, con Bijbel por yuda bo?

Algun Conseho Practico Cu Bijbel Ta Duna pa Trata cu Preocupacion

Bijbel tin hopi conseho cu por yuda nos trata cu preocupacion. Ban wak tres ehempel.

1. 1. “No sea nunca ansha pa e dia di mañan, pasobra e dia di mañan lo tin su mes inkietudnan. Cada dia tin su mes problemanan.”—Mateo 6:34.

   Nificacion: Lo ta mihor pa nos no preocupa demasiado tocante cos cu lo (of lo no) pasa den futuro. Hopi bes, e cosnan cu nos tin miedo cu lo sosode, no ta sosode. Tin biaha cos por hasta resulta mihor di loke nos a pensa.

   Loke bo por haci: Pensa riba algun situacion den pasado caminda bo a pensa cu algo malo lo pasa, pero e no a pasa. Despues, pensa riba bo situacion actual, purba di ta realistico y puntra bo mes: Ki posibilidad tin cu e situacion aki lo bira un problema grandi?

2. 2. “Manera hero ta mula hero, asina un hende ta mula cara di su amigo.”—Proverbionan 27:17.

   Nificacion: Otro hende por yuda nos trata cu nos preocupacion, pero nos mester laga nan yuda nos. Kisas nan por duna nos conseho practico basa riba nan mes experencia. Probablemente, nan por yuda nos mira e situacion for di un punto di bista diferente.

   Loke bo por haci: Pensa riba un hende cu por duna bo bon conseho, manera un amigo cu a pasa den loke abo ta pasando aden. Puntr’e kico a yud’e y kico no a yud’e.

3. 3. “Tira tur boso inkietud [of, “preocupacionnan”, nota] riba dje, pasobra e ta interesa den boso.”—1 Pedro 5:7.

   Nificacion: Dios ta preocupa pa hende cu ta sufri. E kier pa nos haci oracion tocante tur loke ta preocupa nos.

   Loke bo por haci: Traha un lista di tur loke ta pone bo preocupa. Despues, haci oracion tocante cada un di e preocupacionnan ey y pidi Dios yuda bo trata cu nan.

Ora Lo No Tin Preocupacion Mas

Bijbel ta haci mas cu djis duna conseho tocante con pa trata cu preocupacion. E ta priminti cu den futuro tur nos preocupacionnan lo disparce pa semper. Con esey lo tuma luga?

E Reino di Dios lo caba cu tur loke ta causa preocupacion. (Revelacion 21:4) Ademas, ora nos ta biba bou di e gobierno ey, nos lo no corda mes riba e cosnan cu ta causa preocupacion y cu ta pone nos sufri.—Isaias 65:17.

Esaki ta e futuro cu “e Dios cu ta duna paz” kier pa bo. (Romanonan 16:20) E ta bisa nos: “Mi sa e plannan cu mi tin pa boso ... plannan pa paz y no pa calamidad, pa duna boso un futuro y un speransa.”—Jeremias 29:11.