E Gosonan y e Dificultadnan di Adolecencia

ADOLECENCIA por ta un periodo maraviyoso di bida. De echo, pa hopi hoben e ta esei. Y hopi adulto tin dushi recuerdo di nan hubentud.

Pero na mesun tempo nos tin cu admiti cu nos ta bibando den “temponan trabahoso”, dificil pa trata cu ne. (2 Timoteo 3:1) Esaki ta pone extra presion riba hobennan; anto un presion distinto for di loke generacionnan anterior a experencia. Podise ta pesei Sabrina Solin Weill, hefe di redaccion di un revista pa hobennan, a bisa cu loke adolecentenan ta experencia ta masha dificil mes. Ta como si fuera bo ta cana riba un cabuya gespan na halto, sin nada bou di dje pa fango bo si bo cai. En berdad, adolecencia—cu ta un periodo turbulento di bida—por ta yen di sintimentonan di ansiedad y confusion. Tambe lo bo por sinti bo torpe of cu bo tin dos man links. Sra. Weill a skirbi: “Durante e temporada di nan bida cu nan ta entre infancia y edad adulto, teenagernan tin cu trata cu e aspectonan mas indeseabel di tanto infancia como di edad adulto.”

Si bo ta un adolecente, con bo por trata cu exito cu e dificultadnan cu bo ta enfrenta? Si bo ta un mayor di un yiu adolecente, kico por yuda bo corda con e añanan turbulento ei tawata, y asina bo por compronde miho kico bo yiu homber of yiu mohe ta pasando aden? Den e serie aki nos ta invita tanto hobennan como adultonan pa analisa e topico di adolecencia mas a fondo. Esaki lo yuda hobennan no solamente pa sobrevivi e periodo ei sino tambe pa nan tin exito.