“Tene Cuenta cu e Dios Cu A Crea Bo”

“Tene cuenta cu e Dios cu a crea bo, awor cu bo ta jong. Un dia dianan y añanan malo ta bini cu lo bo bisa: ‘Mi no por gosa mas di bida.’” —Predicador [Eclesiastes] 12:1, “BPK.”

E PASASHI di Bijbel cita ariba ta pone un hende para pensa un rato. Ta un biaha so bo ta jong. Mas despues, lo bo reflexiona riba bo añanan di adolecencia, sea contento y satisfecho of cu hopi duele y dolor. Cua di nan dos lo ta abo su situacion? Con bo por guia e resultado?

Manera ta cita ariba, Bijbel ta urgi bo pa “tene cuenta cu e Dios cu a crea bo.” Con bo por haci esei? Door di pega na Dios su lei- y principionan, cu ta para skirbi den su Palabra, Bijbel. No, esaki no kiermen cu bo tin cu hiba un bida severo di fanatismo religioso, nengando bo mes tur placer. Al contrario, teniendo cuenta cu bo Creador lo duna bo e mayor felicidad posibel. Con por ta?

Un ehempel. Imagina cu un hende a duna bo un auto y un rijbewijs. Bo tin bo dilanti un libertad nobo y emocionante, un libertad cu por duna bo hopi placer. Djis pensa riba tur e luganan cu bo por bai! Sinembargo, e libertad nobo cu bo a haya ta acompaña pa un responsabilidad serio. Segun cu bo ta core auto, bo tin cu obedece e reglanan di trafico y paga tino na lus di trafico, na limite di velosidad y na borchi di spiertamento. Acaso e responsabilidad aki ta stroba bo di gosa di core auto? No! De echo, e ta sirbi como un proteccion. Un accidente no ta nada dushi, toch?

Ta mescos ta conta cu e libertad cu bo Creador, Yehova Dios, a duna bo. Segun cu bo ta crece bira adulto, e ta laga bo scohe con lo bo uza bo bida. (Deuteronomio 30:19; Proverbionan 27:11) Esei ta un privilegio extraordinario! Pero e libertad ei ta acompaña pa responsabilidad serio. Den su Palabra, Yehova a describi ‘reglanan di trafico’, es decir, normanan cu e kier pa bo cumpli cu ne. E normanan aki ta stroba bo felicidad? Definitivamente cu no! Mas bien, nan ta proteha bo di e tristesa y dolor cu asina tanto hoben ta haya nan cu ne awe.

Federico, cu awor tin 30 y pico aña, sa cu esaki ta berdad. Como hoben, el a mira su compañeronan di scol participa den tur tipo di actividad cu e tawata sa cu e mester evita. El a bisa: “Tawata parce manera cu nan tawata pasa hopi bon, pero nunca mi a pensa cu nan tawata echt felis.” Mirando bek riba su hubentud, Federico ta contento cu e tawatin e normanan di Bijbel pa gui’e atrabes di adolecencia. El a bisa: “Claro cu mescos cu cualkier hoben, mi tambe tawatin problemanan pa lucha cu ne. Pero Bijbel di berdad a proteha mi. Y semper tawatin un of otro ruman cristian disponibel pa yuda mi. Door di a sigui principionan biblico mi a haya mas felicidad di loke hamas mi a imagina!”

Yehova Dios kier pa bo ta felis, realmente felis. Esaki ta encera mas cu djis un aparencia superficial di ta contento, pero cu en realidad ta sconde e echo cu bo ta sinti bo malo di paden. Bijbel ta declara: “Gosa di bo hubentud, gosa tanten bo ta hoben ainda.” Pero e mesun versiculo ei di Bijbel ta agrega un spiertamento. E ta bisa: “Pero corda si cu bo mester duna cuenta na Dios.”—Predicador 11:9, BPK.

Corda riba bo Creador y tene cuenta cu ne door di haci uzo sabi di e libertad cu el a duna bo. Si bo haci esei, bo por tin sigur cu bo Creador lo tene cuenta cu abo y lo duna bo e mayor felicidad posibel. Bijbel ta declara: “Ta e bendicion di SEÑOR ta haci rico, y e no ta agrega tristesa na dje.”—Proverbionan 10:22.

Pa yuda hobennan enfrenta e dificultadnan di adolecencia, Testigonan di Yehova a publica un buki di 320 pagina titula Loke hovenan sa puntra—Contesta práctica. Te cu awor nan a imprimi casi 34 miyon ehemplar di e buki aki na 77 idioma. Bo por haya uno door di tuma contacto cu Testigonan di Yehova den bo bicindario.

[Plachinan na pagina 8, 9]

Pa Yuda Bo pa Bo Por Tin Exito Como Adolecente

Tuma tempo pa lesa e Palabra di Dios

Traha duro den sirbishi di veld

Evita mal compania

Mantene bon comunicacion cu bo mayornan

[Reconocemento]

Kaft di e foyeto: Pictorial Archive (Near Eastern History) Est.