Concorde Ta Pasa pa Historia

DI UN ESCRITOR DI SPIERTA! NA FRANCIA

Despues di 27 aña di servicio, Concorde—“e unico avion supersonico di pasahero na mundo”—a baha cu pension. Mencionando aumento di gasto y reduccion di pasahero como motibo, British Airways a saca e ultimo Concorde di su flota di shete for di servicio comercial na october 2003. Cinco luna prome Air France a stop di bula su cinco avionnan. Air France tawata e unico otro compania cu a uza e tipo di avion aki, cu su halanan unico forma di triangulo.

Di e manera aki a sera un capitulo di historia di aviacion cu a cuminsa na 1962, tempo cu ingenieronan Britanico y Frances a uni forsa pa desaroya un avion supersonico cu por bula distancia largo. E modelonan original a haci nan buelo inaugural na 1969, y transporte supersonico comercial a bira realidad na januari 1976, cu buelonan pa Bahrain (Golfo Persico) y Rio de Janeiro.

Nan ta bisa cu Concorde tawata un exito tecnologico, pero un fracaso comercial. E crisisnan petrolero den decada di 1970 tawata dificil pa absorba, ya cu e avion tawata guli mas cu 25.600 liter di combustibel pa ora—tres biaha e cantidad di combustibel pa pasahero cu un avion normal ta gasta. Otro desbentahanan di Concorde tawata cu e no por a bula mas leu cu 7.000 kilometer y por a carga un maximo di 100 pasahero so. Pues, e no tawata rendable pa e companianan di aviacion. Un otro obstaculo pa e expansion di Concorde tawata e restriccionnan gubernamental cu a ser imponi na principio ora cu Concorde a cuminsa bula pa Merca, supuestamente pasobra algun hende tawata precupa pa e bochincha cu e avion ta haci.

Prijs di pasashi tawata un otro problema. Pasashi tawata costa miles di dollar. Pues ta masha poco pasahero por a afford di bula cu Concorde. Cu su menu sofistica di shampaña, paté de foie y caviar, Concorde “tawata e miho experencia di biahe cu un hende por tawatin den su bida”, segun un comerciante. “E bentaha di mas importante tawata e tempo cu bo ta spar. E no ta e buelo di mas comodo. Pero e tawata e sintimento di mas maraviyoso.”

Mas Lihe cu Solo?

E avionnan di Concorde a transporta en total casi cuater miyon pasahero durante nan carera. Pero esei no ta realmente hopi hende, si bo tuma na cuenta cu e flota mundial di Boeing 747 ta transporta e mesun cantidad ei den apenas un par di siman. Pues anto, ta kico a haci Concorde un avion asina remarcabel?

Considera esaki: Un avion Concorde a bula como promedio 2.150 kilometer pa ora—dos biaha e velosidad di zonido, pesei e ta supersonico—na un haltura di 18.000 meter. E tawata bula asina lihe cu durante buelo e avion di 62 meter largo de echo a rek bira te cu 24 centimeter mas largo debi na e cayente produci door di e friccion entre e avion y e presion djafo. Un buelo regular di Paris pa New York cu Concorde a dura solamente 3 ora cu 55 minuut, casi mitar di e tempo di un buelo convencional. E avion tawata bula asina lihe cu debi na e diferencia di ora, pasaheronan cu biaha for di Paris pa New York, ta descubri ora nan yega New York cu e ora local ta mas tempran cu e ora cu nan a sali for di Paris!

Tawatin un solo accidente fatal cu a tacha e carera di Concorde. Dia 25 di juli 2000, un avion di Air France a cai durante despegue for di Aeropuerto Charles de Gaulle na Paris, matando 113 persona, incluso 4 hende riba tera. Despues di varios cambio na e avion pa mas siguridad, nan a reanuda servicio un aña despues. Pero al final motibonan financiero a prevalece y e avionnan a stop di bula.

E avionnan di Concorde no tawatin rival ni susesor, y lo pasa nan pension bon mereci den museonan di aviacion rond mundo. Jean-Cyril Spinetta, presidente di Air France, a remarca: “Concorde lo no echt stop di bula pasobra semper lo e keda den hende su imaginacion.”

[Plachinan na pagina 26]

Ariba: Sirbiendo shampaña

Meimei: Piloto principal den cockpit

Abou: Modelo original di Concorde, Francia, 1968

[Reconocemento]

Tur potret excepto e modelo original: NewsCast; modelo original: AFP/Getty Images