Con Bo Por Ta un Bon Tata

UN ARTICULO den e revista Economist tocante e deterioro di bida di famia a cuminsa cu e declaracion interesante aki: “Pa traha yiu ta facil, pa ser un bon tata si no ta facil.”

Aunke tin hopi cos dificil den bida, un di e cosnan di mas dificil—y a la bes mas importante—ta ser un bon tata. Tur tata lo mester kier ta un bon tata, ya cu e bienestar y felicidad di nan famia ta den wega.

Pakico E No Ta Facil

Den poco palabra, un di e motibonan principal pakico no ta facil pa ser un bon tata ta imperfeccion hereda—tanto di mayornan como di nan yiunan. Bijbel ta bisa: “E intencion [“inclinacion”, NW] di curason di hende ta malo for di su hubentud.” (Genesis 8:21) Pesei un escritor di Bijbel a reconoce: “Den pica mi mama a consebi mi.” (Salmo 51:5; Romanonan 5:12) E inclinacion pa haci malo debi na pica hereda ta solamente un di e obstaculonan cu ta pone cu ta dificil pa ser un bon tata.

E mundo aki mes tambe ta un obstaculo grandi. Pakico? Pasobra, manera Bijbel ta splica, “henter mundo ta bou di control di e malbado”, kende ta ser identifica como “Diabel y Satanas.” Tambe Bijbel ta yama Satanas “e dios di e mundo aki.” No ta nada straño anto cu Hesus a bisa cu su siguidonan ‘no mester ta parti di mundo,’ mescos cu e no ta parti di mundo.—1 Huan 5:19; Revelacion 12:9; 2 Corintionan 4:4; Huan 17:16.

Pa bo ta un bon tata ta importante pa bo ta semper conciente di bo imperfeccion hereda, di Satanas e Diabel y di e mundo bou di su control. E obstaculonan aki no ta cosnan imaginario. Nan ta real! Pero unda un hende homber por bai siña con pa vence nan y con pa bira un bon tata?

Ehempelnan Dibino

Pa un tata haya yudansa pa vence e obstaculonan menciona ariba, e por acudi na Bijbel. Den dje nos ta haya ehempelnan estupendo. Hesus a identifica e miho ehempel cu tin ora el a siña su siguidonan resa: “Nos Tata cu ta den shelo.” Bijbel ta describi nos Tata celestial door di bisa simplemente: “Dios ta amor.” Kico e ehempel di amor aki mester motiva un tata humano pa haci? Apostel Pablo a anima cristiannan pa “sea imitadonan di Dios . . . y cana den amor.”—Mateo 6:9, 10; 1 Huan 4:8; Efesionan 5:1, 2.

Si bo ta un tata, considera kico bo por siña for di un ehempel so caba di e manera cu Dios a trata su Yiu, Hesus. Mateo 3:17 ta bisa nos cu ora Hesus a batisa, Dios a declara for di shelo: “Esaki ta mi Yiu stima, den kende mi tin goso.” Kico nos por siña for di esaki?

Na prome luga, ora un tata bisa un otro hende orguyosamente, ‘Esaki ta mi yiu’, pensa ki efecto esei tin riba e yiu. Hobennan ta desaroya bon ora nan ricibi atencion di nan mayornan, specialmente reconocemento positivo. Probablemente un mucha lo sinti su mes motiva pa traha mas duro ainda pa proba cu e ta digno di reconocemento faborabel.

Na di dos luga, Dios a expresa su sintimentonan pa cu Hesus, referiendo na dje como “mi Yiu stima.” E expresion di cariño ei for di su Tata lo mester a alegra Hesus su curason. Bo yiunan tambe lo sinti nan anima si bo mustra mediante bo palabranan—y tambe mediante bo tempo, atencion y interes—cu bo ta echt stima nan.

Na di tres luga, Dios a bisa su Yiu: “Den bo mi tin goso.” (Marco 1:11) Esaki tambe ta hopi importante pa un tata haci, esta, bisa su yiunan cu e ta masha contento cu nan. Ta berdad cu hopi bes un mucha ta faya. Nos tur ta faya. Pero como tata, bo ta busca oportunidad pa expresa bo satisfaccion pa e bon cosnan cu bo yiunan ta haci of bisa?

Hesus a siña bon for di su Tata celestial. Tempo cu e tawata riba tera, el a demostra cu palabra y ehempel ki sintimento su Tata tawatin pa cu Su yiunan riba tera. (Huan 14:9) Asta ora cu Hesus tawata ocupa y bou di tension, el a saca tempo pa sinta y papia cu mucha. El a bisa su disipelnan: “Laga e muchanan bin serca mi; no stroba nan.” (Marco 10:14) Boso cu ta tata por sigui e ehempel di Yehova Dios y di su Yiu mas plenamente?

Bon Ehempel Ta Importante

Ta sumamente importante pa bo pone un bon ehempel pa bo yiunan. Si abo mes no ta somete bo na e disiplina di Dios y lag’e guia bo, probablemente bo esfuersonan pa “lanta nan den e disiplina y instruccion di Señor” lo tin masha poco efecto. (Efesionan 6:4) Pero, cu yudansa di Dios, bo por vence cualkier obstaculo pa cumpli cu su mandamento pa cuida bo yiunan.

Considera e ehempel di Viktor Gutschmidt, un Testigo di Yehova di exUnion Sovietico. Na october di 1957, el a ser sentencia na 10 aña di prizon pa motibo cu el a papia tocante su fe. El a laga dos yiu mohe chikito atras hunto cu su esposa, Polina. Den prizon, nan a permitie skirbi carta na su famia pero a prohibie di bisa cualkier cos tocante Dios of di un topico religioso. Asta ora el a haya su mes den e dificultad aki, Viktor tawata determina pa ta un bon tata, y e tawata sa cu tawata sumamente importante pa siña su yiunan tocante Dios. Kico el a haci anto?

Viktor a conta: “Mi a haya informacion den e revistanan Sovietico Young Naturalist y Nature. Mi tawata pinta plachi di bestia y hende riba postkaart y inclui un storia of un experencia relaciona cu naturalesa.”

Polina a bisa: “Manera nos a ricibi e postkaartnan aki, mesora nos tawata relaciona nan cu temanan di Bijbel. Por ehempel, ora tawata trata di e bunitesa di naturalesa, selva- of riunan, mi tawata lesa Isaias capitulo 65”, cu ta splica tocante e promesanan di Dios pa comberti tera den un paradijs.

E yiu mohe di Viktor, Yulia, a conta: “Despues Mama tawata haci oracion cu nos, y nos tawata yora. E postkaartnan aki a hunga un papel importante den nos criansa.” Polina a bisa cu door di esei, “for di nan infancia e muchanan tawata stima Dios masha.” Con e situacion di e famia ei ta awor?

Viktor a splica: “Awor mi dos yiu mohenan ta casa cu ancianonan cristian, y tur dos tin famianan spiritualmente fuerte cu yiunan cu ta sirbiendo Yehova fielmente.”

Pa bo pone un bon ehempel no solamente bo mester ta creativo sino tambe bo tin cu haci hopi esfuerso. Probablemente bo yiunan lo sinti nan conmovi ora nan mira nan tata haci su best. Un yiu cu a dedica hopi aña den sirbishi di tempo completo, yen di aprecio a bisa di su tata: “Tin biaha Tata tawata bini asina cansa for di trabou cu apenas e por a tene su wowonan habri, pero con cu el a haci, nos tawatin nos studio di Bijbel, y esaki a yuda nos mira e seriedad di e studio di famia.”

Ta bisto anto cu pa bo ta un bon tata, ta masha importante pa bo pone un bon ehempel—cu palabra y accion. Bo tin cu haci esei pa bo mira e siguiente proverbio biblico cumpli: “Instrui un mucha den e caminda cu e mester cana, y asta ora cu e bira bieu e lo no aparta su mes for di dje.”—Proverbionan 22:6.

Pues corda, no ta solamente loke bo ta bisa ta conta; ta specialmente loke bo ta haci—e ehempel cu bo ta pone. Un experto Canades riba tereno di educa mucha for di infancia a skirbi: “E miho manera pa logra pa nos yiunan comporta nan mes [manera nos kier] ta door di demostra e comportacion desea nos mes.” En berdad, si bo kier pa bo yiunan duna balor na cosnan spiritual, ta esencial pa abo mes tambe haci esei.

Traha Tempo pa Nan!

Bo yiunan mester mira bo bon ehempel. Esei ta nifica cu bo tin cu dedica tempo na nan—hopi tempo, no djis un tiki aki un tiki aya. Sigui e conseho di Bijbel pa ‘cumpra tempo’, esta, laga cosnan menos importante pa bo por ta hunto cu nan. (Efesionan 5:15, 16, NW) Realmente, kico ta mas importante cu bo yiunan? Un television pantaya grandi, un set profesional di palo di golf, un cas bunita, bo trabou?

Si tatanan no dedica tempo na nan yiunan pa cria nan ora nan ta chikito, nan lo tin cu paga caro despues. Tatanan cu a mira nan yiunan cai den inmoralidad of asta perde tur interes den cosnan spiritual hopi bes tin remordimento profundo. Nan ta lamenta cu tempo nan yiunan chikito realmente tawatin mester di nan, nan no a dedica suficiente tempo na nan.

Corda, e tempo pa pensa tocante e consecuencianan di bo decisionnan ta ora bo yiunan ta chikito. Bijbel ta yama bo yiunan “un herencia di Señor”, algo cu Dios mes a confia den bo man. (Salmo 127:3) Pues nunca lubida cu bo tin cu duna cuenta na Dios pa nan!

Yudansa Ta Disponibel

Un bon tata ta ansioso pa ricibi yudansa cu lo beneficia su yiunan. Despues cu un angel a bisa e esposa di Manoa cu e tawata bai haya un yiu, Manoa a resa na Dios: “Pa fabor, laga e homber di Dios cu bo a manda bin serca nos atrobe, pa e siña nos kico nos mester haci pa e mucha cu mester nace.” (Huesnan 13:8, 9) Mescos cu mayornan djawe, ki clase di yudansa Manoa tawatin mester? Laga nos mira.

Brent Burgoyne, un docente na e Universidad di Kaapstad, Sur Africa, a remarca: “Un di e regalonan di mas precioso cu bo por duna un yiu ta pa siñ’e un set di norma y balor.” Un informe den Daily Yomiuri di Japon ta mustra cu en berdad mucha mester siña un set di norma y balor. E corant a bisa: “[Un] encuesta ta mustra cu 71 porshento di mucha Japones nunca no a ser siña pa nan tata cu nan no tin mag di gaña.” Esei no ta un situacion lamentabel?

Ken por percura pa un set di norma y balor confiabel? E mesun persona cu a duna Manoa guia: Dios mes! Pa Dios duna yudansa, el a manda su Yiu stima, Hesus, como Maestro—manera nan tawata yam’e comunmente. E buki Siña for di e Gran Maestro, cu ta saca les for di siñansanan di Hesus, ta disponibel awor den hopi idioma pa bo uza ora bo ta instrui bo yiunan chikito.

Siña for di e Gran Maestro no solamente ta splica norma- y balornan basa riba e Palabra di Dios sino tambe ta ilustra e texto skirbi cu mas cu 160 plachi cu tin preguntanan al caso. Por ehempel, den capitulo 22 cu e titulo “Pakico Nos No Mester Gaña”, tin e plachi cu tin na pagina 32 di e revista aki. E texto riba e pagina caminda e plachi aki ta aparece ta bisa: “Laga nos bisa cu un mucha homber ta bisa su tata: ‘No, mi no a scop bala den cas.’ Pero kico awor si el a hacie toch? Ta malo si e bisa cu e no a hacie?”

Otro lesnan motivador nos por haya den capitulonan titula “Obediencia Ta Scapa Bo”, “Nos Tin Cu Resisti Tentacion”, “Un Les Tocante Bondad”, “Nunca Bira Ladron!”, “Dios Ta Haya Tur Fiesta Bon?”, “Con pa Haci Dios Contento” y “Pakico Nos Mester Traha”, djis pa menciona algun di e 48 capitulonan den e buki aki.

E prologo di e buki ta conclui bisando: “Loke mucha tin mester di dje principalmente ta pa bo dirigi nan na e Fuente di tur sabiduria, nos Tata den shelo, Yehova Dios. Esei ta loke Hesus e Gran Maestro a haci semper. Nos ta spera sinseramente cu e buki aki lo yuda abo y bo famia dirigi boso bida di tal manera cu boso ta agrada Yehova, cu bendicion eterno como resultado.”a

Ta bisto anto cu ser un bon tata ta encera pone un bon ehempel pa bo yiunan, dedica hopi tempo na nan, y yuda nan biba segun e normanan di Dios cu el a revela den Bijbel.

[Nota]

[Plachi na pagina 8]

Aunke Viktor Gutschmidt tawata den prizon, el a logra ser un bon tata

[Plachinan na pagina 8, 9]

Tempo cu Viktor tawata encarsela pa motibo di su fe, el a pinta e plachinan aki pa e instrui su yiunan

[Plachi na pagina 9]

Yiunan di Viktor na 1965

[Plachi na pagina 10]

Tatanan mester ta activamente envolvi den siña nan yiunan