E Sorto di Tata Cu Yiunan Tin Mester

YIUNAN tin mester di un tata cu ta stima nan, cu t’ei pa nan y cu ta haci tur loke ta na su alcanse pa yuda nan crece y bira adultonan responsabel y confiabel. Pero, no ta tur hende ta compronde debidamente cu yiunan tin mester di e tipo di tata aki.

Ta berdad cu ta mama ta duna lus na yiu, y ser un bon mama ta sumamente importante. Pero referiendo na e papel mes importante cu tata ta hunga, The Wilson Quarterly a bisa: “Un di e motibonan principal di e problemanan mas alarmante di comunidad Mericano [y nos por agrega, di e resto di mundo tambe] ta cu mas y mas tata no ta cumpliendo cu nan papel di tata.”

E corant di Brazil Jornal da Tarde ta informa riba un estudio cu a constata cu hopi problema di comportacion di hobennan—manera agresividad, desobediencia, mal punto na scol y apatia—hopi bes ta “pasobra no tin un tata presente.” Y e buki Italiano Gli imperfetti genitori (E Mayornan Imperfecto) di Marcello Bernardi, ta enfatisa cu pa yiunan desaroya bon, preferiblemente nan mester tin dos mayor.

Bida di Famia Por Mehora

Asta si un tata negligente a contribui na e problemanan den e famia of si ta e ta esun principalmente responsabel pa nan, esei no ta nifica cu no por rectifica cosnan y mehora bida di su famia. Con cosnan por mehora? Kico e tata tin cu haci?

Yiunan mester sinti cu tin areglo den famia, y cu esun na cabes tin nan bienestar na pecho. Ora no cumpli cu e necesidad ei, manera ta sosode hopi bes awe, esaki ta afecta bida di e yiunan. Esei no ta nifica si cu ora e tata no ta cumpli cu su papel of ora no tin un tata mes den e famia, no tin speransa pa un situacion. Bijbel ta bisa na Salmo 68:5: “Un tata di huerfano y un hues pa biuda, ta Dios den su habitacion santo.”a

Con pa Haya Yudansa

E situacion describi door di Lidia—e mucha mohe di Polonia, menciona den e articulo anterior—ta mustra cu e yudansa di Dios ta sumamente importante pa logra exito y cu nos por hay’e. Con nan bida di famia tawata? Con e famia a ricibi yudansa di Dios?

Franciszek, tata di Lidia, ta admiti cu tempo su yiunan tawata jong, el a neglisha su famia, manera su yiu mohe a informa. El a bisa: “Mi no tawata interesa pa sa kico nos yiunan tawata haci. Mi no a mustra cariño na nan, y nos no tawatin ningun laso cu otro.” Pues, e no tawata sa mes cu ora Lidia tawatin 14 aña, e cu su ruman homber y ruman mohe mas chikito ya caba tawata core paranda, huma, bebe y bringa riba caya.

Finalmente, Franciszek a bin realisa ta den ki problema su yiunan tawata haya nan mes, y el a spanta asina tanto cu el a dicidi di haci algo tocante esei. El a bisa: “Mi a pidi Dios yuda mi.” Remarcablemente, un poco despues Testigonan di Yehova a pasa na su cas, anto e cu su casa a bai eens pa studia Bijbel. Cu tempo, e mayornan a cuminsa aplica e siñansanan biblico den nan bida. Ki efecto esaki tawatin riba e yiunan?

Franciszek a splica: “Nan a cuminsa nota cu mi a stop di bebe y tawata birando un miho tata. Nan kier a conoce Testigonan di Yehova miho. Nan tambe a cuminsa studia Bijbel y a stop cu nan mal asociacion.” E yiu homber, Rafał, a bisa di su tata: “Mi a cuminsa stim’e manera un amigo.” El a agrega: “Diripiente e gang di caya no tawata importante mas. Nos tawata ocupa cu actividadnan spiritual.”

Actualmente Franciszek ta un anciano cristian den un congregacion di Testigonan di Yehova, y ainda e ta atento na su famia y tin na pecho e crecemento spiritual di cada miembro. Su esposa y Lidia ta pionero, esta, predicado di tempo completo. Rafał y su ruman mohe mas jong, Sylwia, tambe ta studia Bijbel cu entusiasmo, ta comenta na reunionnan cristian y ta papia di nan fe cu otro hende.

El A Practica Loke El A Siña

Considera tambe e caso di Luis, tata di Macarena. Corda cu Macarena ta e mucha mohe di 21 aña di Spaña cu nos a menciona den e prome articulo. Luis a sigui den e pasonan di su tata alcoholico. Manera Macarena a conta, tin biaha e tawata gewoon disparce pa un par di dia cu su amigonan. Ademas, e tawata trata su esposa manera un cria en bes di dun’e balor como su casa. Nan matrimonio tawata a punto di kibra, y Macarena y su dos rumannan mas jong tawata completamente traumatisa.

Sinembargo, cu tempo Luis a bai eens pa studia Bijbel cu Testigonan di Yehova. El a splica: “Mi a cuminsa dedica tempo na mi casa y mi yiunan. Nos tawata papia hunto, come hunto y studia Bijbel hunto. Tambe nos tawata haci trabou di cas hunto y recrea hunto.” Macarena a bisa: “Mi a cuminsa sinti e presencia di un tata cu a mustra berdadero interes den su famia.”

Un punto importante ta cu Luis no solamente a anima su famia pa sirbi Dios sino tambe cu e mes a practica loke el a siña. Macarena a splica cu su tata “a laga un negoshi floreciente un banda, pasobra esaki tawata exigi demasiado tempo y e kier a duna mas atencion na asuntonan di famia.” E efecto tawata notabel. “Su ehempel a siña mi con pa hiba un bida simpel y pa pone cosnan spiritual na prome luga”, segun Macarena. Actualmente Macarena ta sirbi como pionero, y su mama y su dos rumannan chikito ta miembro activo di e congregacion cristian.

E Decision di e Ehecutivo di Compania di Trein

Ta bisto anto cu e tipo di tata cu yiunan tin mester ta uno cu ta tuma decision cu e bienestar di su yiunan na mente. E yiu homber teenager di Takeshi Tamura, e ehecutivo Japones menciona den e articulo anterior, tawatin amistadnan inmoral. Tur cos tawata mustra cu lo el a bai haya su mes cu problema serio. Esei tawata na 1986, e aña cu Takeshi a dicidi di renuncia su puesto di responsabilidad na e Compania di Trein Nacional di Japon. Awe, mas cu 18 aña despues, kico Takeshi ta pensa di su decision?

El a bisa resientemente: “Esei kisas ta e miho decision cu mi a yega di tuma. E echo cu mi a dedica mas tempo na mi yiu y haci cos hunto cu ne, entre otro studia Bijbel cu ne, a surti un efecto notabel. Nos a bira amigo, y el a stop cu su mal asociacion y a laga su mal conducta.”

Algun aña mas prome, e esposa di Takeshi a bira Testigo di Yehova, y su conducta ehemplar a motiva Takeshi pa studia Bijbel y interesa mas den su famia. Cu tempo, tanto Takeshi como su yiu homber y su yiu mohe a bira Testigo. Awor Takeshi y su yiu homber ta sirbi como anciano den nan respectivo congregacionnan, y su esposa y su yiu mohe ta pionero.

Tatanan Tin Mester di Yudansa

Hopi tata, apesar cu nan ta realisa cu nan ta neglisha nan yiunan, no sa kico nan mester haci pa nan. E corant Spaño La Vanguardia tawatin e titular: “42 Porshento di Tatanan [Spaño] Ta Admiti Cu Nan No Sa Con pa Lanta Nan Yiunan Teenager.” Pero mescos ta conta pa tatanan di yiu mas chikito. Contrario na e pensamento di hopi hende, e chikitinnan aki tambe mester di un tata dedica cu t’ei y cu ta duna nan atencion.

Kico mas nos por siña pa bira un bon tata? Kennan ta e miho ehempel pa tatanan, y kico nos por siña for di nan? Nos articulo final lo contesta e preguntanan aki.

[Nota]

[Plachinan na pagina 7]

Tatanan cu a percura loke nan yiunan tawatin mester

Franciszek cu su famia

Luis cu su famia

Takeshi cu su famia