Tatanan Ausente—Un Problema Creciente

MAS y mas tata ta bandonando nan famia. Na cabamento di decada di 1990, e corant USA Today a cualifica Merca como “e lider mundial den famianan sin tata.” Sinembargo, ausencia di tata ta un fenomeno rond mundo.

Na Brazil, un informe di censo di aña 2000 a revela cu di 44,7 miyon famia, 11,2 miyon tawatin un mohe como cabes di famia. Na Nicaragua, 25 porshento di mucha ta biba cu nan mama so. Na Costa Rica e cantidad di mucha cu no a ser reconoci pa nan tata legitimo a aumenta durante decada di 1990 di 21,1 porshento pa 30,4 porshento.

E estadisticanan di e tres paisnan aki ta djis un muestra di e tendencia mundial. Considera un otro aspecto di e problema di tatanan ausente.

E T’ei Si, Pero No Ta Cumpli cu Su Responsabilidad

Sea asina bon di wak e cuadro “Papi, Ki Dia Papi Ta Bin Bek?” Nao, kende awor tin 23 aña, ta confesa: “Prome cu mi a cuminsa bai scol basico, masha poco mi tawata mira Tata. Un biaha cu e tawata saliendo di cas, mi a rog’e, ‘Papi, bin bek; ta bon Papi?’”

Relacionnan di famia manera esun di Nao cu su tata ta loke a pone e escritor Polaco Piotr Szczukiewicz bisa: “E tata ta manera un factor importante cu no t’ei den e famia.” Nos tin cu admiti cu hopi tata ta biba cu nan famia y ta trece cen cas. Pero, manera e revista Frances Capital a splica, “demasiado tata ta contenta nan mes cu djis percura cuminda; nan no ta percura educacion.”

Hopi bes, e situacion ta cu e tata ta biba na cas pero no ta envolvi den e bida di su yiunan. Su atencion ta otro caminda. E revista Frances Famille chrétienne ta bisa cu “asta si [e tata] ta fisicamente presente, psicologicamente e por ta ausente.” Pakico asina tanto tata awe ta mentalmente y emocionalmente ausente di nan famia?

Manera e revista menciona ariba ta splica, un motibo basico ta cu nan “no ta compronde kico ta e papel di un tata of esposo.” Segun e punto di bista di hopi tata, e papel di un bon tata ta simplemente pa bin cas cu un bon salario. Manera e escritor Polaco Jozef Augustyn a declara, “hopi tata ta kere cu nan ta bon mayor pa motibo cu nan ta trece placa pa e famia.” Pero esei ta djis un parti di e responsabilidad di un tata.

Echo ta cu yiunan no ta midi e balor di nan tata a base di e cantidad di cen cu e ta gana ni a base di con caro e regalonan cu e por duna nan ta. Mas bien, loke yiunan realmente kier—mucho mas cu regalo material—ta e amor, tempo y atencion di nan tata. Eseinan ta e cosnan cu berdaderamente ta conta pa nan.

Tatanan Tin Cu Reexamina Nan Mes

Segun un informe di e Conseho Central pa Educacion na Japon, “tatanan tin cu reexamina nan estilo di bida; nan ta mucho dedica na nan trabou.” Awor e pregunta ta: Un tata lo ta dispuesto pa haci un ahuste pa causa di su yiunan? E corant Aleman Gießener Allgemeine a informa di un investigacion den cua mayoria tata cu nan a entrevista a nenga di pone nan yiunan prome cu nan carera.

Un tata su aparente falta di interes den su yiunan por hurt esakinan profundamente. Lidia, kende awor tin 21 aña, ta corda bon cla con su tata tawata tempo cu Lidia tawata un hobensita na Polonia. El a splica: “Nunca e tawata papia cu nos. Nos cada un tawata biba den un otro mundo. E no tawata sa cu mi tawata pasa mi tempo liber den discoteca.” Di igual manera, Macarena di Spaña, kende awor tin 21 aña, ta bisa cu tempo cu e tawata mucha, su tata “tawata core paranda fin di siman cu su amigonan, y varios biaha e tawata disparce pa un par di dia.”

Fiha e Prioridadnan Corecto

Kisas mayoria tata ta realisa cu nan ta dedica mucho poco tempo y atencion na nan yiunan. Un tata Japones di un yiu homber teenager a bisa: “Mi ta spera cu mi yiu lo compronde mi situacion. Semper mi ta pensa riba dje, asta ora mi ta druk.” Pero, djis desea pa un yiu compronde pakico su tata no t’ei ta soluciona e problema?

Claro cu no. Pa por satisface e necesidadnan di un yiu mester haci un berdadero esfuerso, si, sacrificio. Ta bisto anto cu no ta facil pa duna yiunan loke mas nan tin mester di dje, esta, amor, tempo y atencion. Hesucristo a bisa: “Hende lo no biba di pan [of, cuminda material] so.” (Mateo 4:4) Ta berdad tambe cu cos material so no ta haci yiunan crece y bira adultonan exitoso. Como tata, bo ta dispuesto pa sacrifica loke kisas ta hopi balioso pa bo—bo tempo of posiblemente asta adelanto den bo carera—pa bo haci bo mes disponibel pa bo yiunan?

E corant Mainichi Daily News di 10 di februari 1986 a conta di un tata cu a bin compronde con importante su yiunan realmente tawata. E corant a skirbi: “Un alto ehecutivo di e Compania di Trein Nacional di Japon a prefera di entrega su retiro cu separa for di su famia.” Anto e corant a cita e ehecutivo: “Cualkier otro hende por ocupa e puesto di director general. Pero ami ta e unico tata di mi yiunan.”

En berdad, e prome paso pa bira un bon tata ta pa reconoce e sorto di tata cu yiunan tin mester. Laga nos analisa kico ta encera ser e tipo di tata ei.

[Cuadro na pagina 3]

“Papi, Ki Dia Papi Ta Bin Bek?”

Asina Nao, un hobensita Japones di cinco aña, a puntra su tata un dia ora cu esaki tawata bayendo trabou. Aunke e tata tawata biba na cas, masha poco Nao tawata mir’e. E tawatin custumber di yega cas for di trabou despues cu Nao a bai drumi caba y sali bai traha mainta prome cu Nao lanta.