Yudansa y Proteccion pa Hobennan

TA MASHA tristo ora un hobensita—kende e mes ainda ta un mucha—ta sali na estado anto e no tin casa. Sinembargo, embaraso hubenil ta tur caminda, y ta afecta tur hende den un manera of otro. E tragedia di embaraso hubenil ta djis un prueba mas cu ta na su luga cu Dios a manda pa “hui for di inmoralidad.”—1 Corintionan 6:18.

No obstante, de bes en cuando, un hobensita cu a ser instrui den e caminda di Dios ta scohe pa no haci caso of ta rechasa loke e sa. E ta comete inmoralidad sexual y ta sali na estado. Con cristiannan berdadero ta reacciona? Ora un mucha asina cu a coi mal caminda duna prueba cu el a repenti, su mayornan y otro miembronan di e congregacion cristian amorosamente mester dun’e un man y sosten’e.

Considera atrobe e caso di Nicole. Su mayornan tawata cri’e pa bira un Testigo di Yehova. Pues tawata hopi doloroso ora cu el a sali na estado sin ta casa. Sinembargo, Nicole ta corda: “Rumannan cristian tawata bin mi cas y purba anima mi pa studia Bijbel y keda serca di Yehova.”

Esaki no ta nifica cu Testigonan di Yehova ta aproba inmoralidad sexual. Pero nan ta reconoce cu door di aplica principionan biblico, malechornan por ser “transforma.” (Romanonan 12:2) Nan ta kere firmemente cu Dios ta pordona malechornan cu arepenti. (Efesionan 1:7) Tambe nan ta reconoce cu asta si un yiu a ser consebi pafo di matrimonio, e yiu no a haci nada malo. Pesei en bes di marca e yiu, miembronan di e congregacion cristian ta mustr’e e mesun tierno cariño, compasion y bondad cu nan lo a mustra na cualkier otro yiu entre nan.—Colosensenan 3:12.

Por ehempel, un mama soltero a cuminsa studia Bijbel cu Testigonan di Yehova. El a reacciona masha lihe riba e mensahe di Bijbel y a haci cambionan grandi den su bida. El a bisa di e Testigonan: “Nan tur a demostra berdadero interes den ami cu mi yiunan. Nan a duna mi cuminda y paña ora tawata necesario y tambe yudansa financiero. Ora mi a cualifica pa sali den sirbishi di veld cu Testigonan di Yehova, nan tawata wak mi yiunan pa mi. Nan a haci tur loke nan tawata por pa yuda mi cultiva berdadero amor pa Yehova.”

Con pa Preveni

Pero, ta hopi mas miho pa yuda hobennan pa asina nan no tin nodi cai mes den tal problema. Pesei Testigonan di Yehova ta purba percura pa nan yiunan lanta den un ambiente di famia caminda tin amor y cariño. En bes di djis purba spanta nan yiunan cu e peliger di haya AIDS of asta di sali na estado, Testigonan ta purba inculca un berdadero amor pa Yehova Dios y pa su leinan den hobennan. (Salmo 119:97) Nan ta kere cu mester duna yiunan informacion exacto tocante sex. Mas importante, nan ta haya cu for di infancia mester siña yiunan e principionan moral cu tin den Bijbel. (2 Timoteo 3:15) Na Salonnan di Reino local di Testigonan di Yehova nan ta ricibi instruccion formal. Sinembargo, mayornan Testigo ta haya e animacion tambe pa studia Bijbel cu nan yiunan riba un base personal. Tin literatura produci pa yuda mayornan duna nan yiunan guia moral, manera por ehempel e buki Loke hovenan sa puntra—Contesta práctica.a

Siguiendo e normanan moral stricto di Bijbel ta bai contra e ola di inmoralidad cu ta asota e mundo. Pero e ta un estilo di bida cu lo por spar miyones di mucha mohe di e tragedia di embaraso hubenil.

[Nota]

[Plachi na pagina 12]

Cristiannan berdadero ta trata mamanan soltero cu bondad y consideracion