Obesidad Realmente Ta un Problema?

“Obesidad serca adolecentenan ta manera un epidemia.”—S. K. Wangnoo, specialista principal di endocrinologia, Hospital Indraprastha Apollo, Delhi, India.

MANERA e comentario ariba ta indica, hopi famia di clase medio na India a cambia pa un estilo di bida cu ta causa obesidad serca teenagernan. E epidemia aki ta plamando den hopi nacion segun cu mas y mas hende ta haci menos ehercicio y ta bira adicto na junk food. Un specialista riba tereno di medicina pa adolecente a declara: “E siguiente generacion [na Gran Bretania] lo ta . . . esun mas obeso den historia di humanidad.” E corant Guardian Weekly a informa: “Un tempo obesidad tawata principalmente un problema di hende adulto. Awor Gran Bretania tin un generacion hoben kende nan custumber di come y nan estilo di bida di sinta, ta hibando nan na problemanan cu a presenta pa prome bes na Merca. Obesidad riba largo plaso ta pone cu nan tin mas chens di desaroya enfermedadnan manera diabetes, malesa di curason y cancer.”

E escritornan di e buki Food Fight (Bringa cu Cuminda) ta declara: “Come y bebe di mas a tuma e luga di desnutricion como mundo su problema principal di cuminda.” Don Peck a skirbi den The Atlantic Monthly: “Aworaki tin un nuebe miyon Mericano cu ‘obesidad cu por hiba na enfermedad’, locual kiermen cu nan tin un exceso di peso di 45 kilo of mas.” Problemanan di salu relaciona cu peso ta hiba na un 300.000 morto prematuro pa aña na Merca, “mas cu cualkier otro cos cu excepcion di humamento.” Peck a conclui: “Djis aki, obesidad kisas ta surpasa tanto hamber como malesa contagioso y ta bira e problema mas urgente relaciona cu salu general di e poblacion mundial.” Pues, acaso nos por permiti nos mes e luho di pasa por halto di e menasa di obesidad? Dr. Walter C. Willett a skirbi den e buki Eat, Drink, and Be Healthy (Come, Bebe y Sea Salu) cu “tin dos factor di mas importante cu lo afecta bo salu den futuro: na prome luga, si bo ta huma of no. Na di dos luga, e cifra cu bo ta mira ora bo subi bo balansa den baño.” Aki e palabra clave ta bo salu den futuro.

Con Bo Ta Defini Obesidad?

Ki ora nan ta considera cu un persona ta obeso (of, demasiado gordo) y cu no ta simplemente un tiki peso di mas e tin? E Clinica Mayo na Rochester (Minnesota, Merca) ta declara: “Basicamente, un persona ta obeso ora cu e tin demasiado sobrepeso debi na mucho vet di curpa.” Pero con bo ta determina ki ora un persona tin sobrepeso? Tin tabelnan cu ta indica peso a base di estatura, y nan por duna hende un idea si ta djis sobrepeso nan tin of cu nan a yega na e nivel di ta obeso. (Wak e tabel na pagina 5.) Sinembargo, e tabelnan aki no ta tene cuenta cu diferencianan den composicion di curpa. Clinica Mayo ta bisa: “Vet di curpa, en bes di solamente e peso di un persona ta un miho indicacion di su salu.” Por ehempel, un atleta probablemente tin mas peso debi cu e tin hopi musculo of weso pisa. Kico ta e causanan basico di sobrepeso of di obesidad? E siguiente articulo lo trata e pregunta ei.