E Punto di Bista Biblico

Lanta Yiu den e Disiplina di Dios

“Con pa Establece Reglanan Cu Bo Yiunan Lo No Kibra”

“Cinco Norma y Balor Cu Bo Mester Siña Bo Yiu di Cinco Aña”

“Cinco Habilidad Emocional Cu Tur Mucha Mester Tin”

“Cinco Indicacion di Cu Bo Ta Tolerando Demasiado”

“E Poder di Un Minuut di Disiplina”

SI TAWATA facil pa disiplina mucha, lo no tawatin masha interes den articulonan di revista manera esnan menciona ariba. E avalancha di buki tocante lantamento di yiu lo a caba na nada. Sinembargo, nunca tawata facil pa lanta yiu. Asta miles di aña pasa, un homber a bisa cu “un yiu bobo ta tristesa pa su tata, y amargura pa esun cu a pon’e na mundo.”—Proverbionan 17:25.

Awe, apesar di e gran cantidad di conseho riba e tema aki, hopi mayor no sa con nan tin cu disiplina nan yiunan. Ki yudansa Bijbel ta ofrece?

E Berdadero Nificacion di Disiplina

Bijbel ta defini bon cla ki papel mayornan tin den dunamento di disiplina. Por ehempel, Efesionan 6:4 ta bisa: “Boso, tatanan, no proboca [“irita”, NW] boso yiunan na rabia, ma lanta nan den e disiplina y instruccion di Señor.” E texto aki ta menciona e tata en particular como esun principal cu mester percura pa su yiunan. E mama, naturalmente, ta coopera cu su casa.

Riba e topico aki The Interpreter’s Dictionary of the Bible ta bisa: “Nos ta mira den Bijbel cu di un banda disiplina ta estrechamente liga cu educacion, instruccion y conocemento, y di otro banda, e ta liga tambe cu reprendemento, coreccion y castigo. Por lo general, e ta ser aplica riba e tereno di educa yiu.” Cu otro palabra, disiplina ta bai hopi mas aleu cu djis scual un yiu; e ta inclui tur e educacion cu un yiu tin mester pa e desaroya bon. Pero con mayornan por evita di proboca of irita nan yiunan?

Trata Nan cu Comprension

Kico ta irita un yiu? Pensa riba e siguiente situacion. Bo tin un colega di trabou cu semper tin mal beis y cu no tin pasenshi. E no gusta bo ni un tiki. E ta piki pieu riba tur loke bo bisa of haci. Hopi bes e ta rechasa bo trabou y ta pone bo sinti manera un hende cu no ta sirbi pa nada. Esei lo no irita bo y kibra bo?

Mescos por sosode cu un mucha ora cu su mayornan ta teima cu ne constantemente of ta corigie cu rabia. Berdad cu de bes en cuando mucha mester di coreccion y Bijbel ta autorisa mayornan pa duna esei. Sinembargo, un mayor cu ta irita un mucha door di trat’e severo y sin cariño por causa daño emocional, spiritual y asta fisico.

Bo Yiunan Merece Bo Atencion

Mayornan mester aparta tempo pa nan yiunan. Deuteronomio 6:7 ta bisa tatanan relaciona cu Dios su instruccionnan: “Siña nan cu tur diligencia na bo yiunan, y papia di nan ora bo ta sinta den bo cas, ora bo ta cana riba caminda, ora bo ta bai drumi y ora bo ta lanta.” Yiunan ta nace cu e necesidad di sinti cu nan mayornan ta interesa profundamente den nan. Papia cu bo yiunan tur dia na un manera trankil; esei lo por yuda bo compronde nan sintimentonan. Door di esei por bira mas facil tambe pa alcansa nan curason cu principionan di Bijbel y motiva nan pa “teme Dios y warda su mandamentonan.” (Eclesiastes 12:13) Esaki ta parti di e disiplina di Dios.

Si nos compara lantamento di yiu cu construccion di un cas, anto disiplina ta un di e hermentnan di construccion. Ora mayornan uz’e na e manera corecto, nan por edifica cualidadnan deseabel den e personalidad di nan yiunan y prepara nan pa enfrenta e retonan di bida. Proverbionan 23:24 y 25 ta describi e resultado: “Tata di e husto lo tin gran goso, y esun cu engendra un yiu sabi lo tin delicia den dje. Laga bo tata y bo mama ta contento, y laga esun cu a haya bo regociha.”

[Cuadro/Plachi na pagina 27]

E “INSTRUCCION DI SEÑOR”

Efesionan 6:4 ta menciona e “instruccion di Señor.” E palabra original na Griego pa e expresion “instruccion” ta ser traduci den algun Bijbel como “ser conciente”, “conseho” y “spiertamento.” Tur e terminonan aki ta indica cu mayornan no mester limita nan na djis lesa Bijbel cu nan yiunan of pasa hunto cu nan riba e informacion den un publicacion pa studia Bijbel na un manera rutinario. Nan tin cu haci sigur cu nan yiunan ta compronde e nificacion di e Palabra di Dios, e importancia di obediencia, e amor cu Yehova tin pa nan y e proteccion cu e ta duna nan.

Con nan por logra esaki? Judy, mama di tres yiu, a mira e necesidad pa bai mas aleu cu djis recorda su yiunan constantemente riba principionan di Dios. “Mi a mira cu nan no tawata gusta ora mi ta ripiti e mesun cosnan den e mesun manera bes tras bes. Mi a cuminsa busca diferente manera pa mi siña nan. Un manera tawata pa busca articulonan den e revista Spierta! cu a presenta e puntonan ei for di un otro angulo. Asina mi a siña e muchanan corda riba cierto cosnan necesario sin irita nan.”

Angelo, kende su famia a pasa den un tempo dificil, ta conta con el a siña su yiu mohenan medita riba e Palabra di Dios: “Nos tawata lesa Bijbel hunto, y despues mi tawata selecta cierto frasenan y splica con esakinan a aplica na e situacion cu mi yiu mohenan tawata aden. Despues, ora nan tawata lesa Bijbel riba nan mes, mi tawata mira nan pensa profundamente, meditando riba e nificacion cu esaki tawatin pa nan.”