Hanbok—E Trahe Nacional di Corea

Di un escritor di Spierta! na Republica di Corea

COREANONAN no ta bisti paña solamente pa tapa curpa. Un ehempel di esaki ta e trahe tradicional di Corea cu yama hanbok.

Un Diseño Unico

E trahe hanbok ta consisti di un blusa estilo di bolero y un saya largo, di proporcion unico.a Den algun caso, e saya ta cuater biaha mas largo cu e blusa. Door di esei, asta un mohe cortico cu tin e bisti ta mustra mas halto cu e ta.

E trahe hanbok casi no tin plooi y ta simpel cosi. E manganan di e blusa ta habri manera hala, mientras cu e saya ta span bai abou for di haltura di pecho y baha elegantemente te na suela. Nan ta mara un tipo di streki inusual cu ta para net riba pecho. E dos puntanan di e streki cu ta sali for di e conopi y baha bai abou parti dilanti di e blusa ta asina largo cu nan ta yega casi na enkel. Hopi hanbok tin tambe diseñonan floral y motiefnan di liña masha bunita borda rond di e manganan y e kraag di e blusa y tambe riba e saya. Si, e midinan, e manera cu e ta cosi y e colornan di e hanbok tur ta combina pa hacie un trahe berdaderamente elegante.

Un Trahe Util

E diseño practico di hanbok ta resalta su bunitesa. Siendo cu e trahe aki por lo general ta traha di fibra natural, ta facil pa bistie henter aña. Por ehempel, un hanbok cu ta traha di fibra di mata manera ramie of hennep tin bon ventilacion, locual ta yuda esun cu tin e bisti keda fresco durante zomer, aunke e hanbok ta tapa casi henter curpa. Otro tipo di material ta yuda conserva e cayente di curpa, locual ta haci nan mas adecuado pa winter.

Hanbok ta confortabel tambe. E caracteristica aki no tin nada di aber cu moda pero el a desaroya como un necesidad practico cu a existi hopi siglo pasa tempo cu e hendenan tawata haci hopi uzo di cabai den e area aki. E revista Culture & I ta bisa: “Nan a traha paña cu por a adapta na e clima friu, cu a permiti nan yag y move di un luga pa otro.” Pesei, hinetenan Coreano a evita cualkier tipo di paña cu a stroba nan di move bon. Si, e Coreanonan cu ta gusta bisti hanbok awe mester ta gradicido na nan antepasadonan pa e comodidad fisico cu e ta duna!

Un otro caracteristica interesante di hanbok ta e tradicion di antaño di uza color pa propositonan simbolico. Den pasado, hopi bes e gremio di e hendenan na poder tawata bisti colornan bunita, mientras cu hende comun tawata bisti principalmente na blanco. Tambe, bo por a identifica un mohe soltera na su combinacion di bisti geel cu cora. Despues cu e casa, e color di su hanbok a refleha e nivel social di su casa. Awendia, na un fiesta di casamento mama di e bruid lo mester tin un trahe ros, mientras cu por lo general mama di e bruidegom ta bisti na blou. Door di e custumber aki ta masha facil pa identifica nan.

Hanbok Djawe

Despues di e Guera Coreano (1950-53) a bini un campaña di modernisacion. Door di esei, den e decada di 1970 hanbok a bai for di moda y na su luga a bini e estilonan di paña di e mundo Occidente. Pues loke un tempo tawata un trahe casual di tur dia a keda den cashi di paña, y tawata sac’e solamente pa casamento, dia di fiesta y otro ocasionnan special.

Sinembargo, den temponan mas resien, hanbok ta haciendo un comeback. Por ehempel, na 1996 nan a haci un esfuerso pa bolbe haci e estilo popular door di proclama e prome diasabra di luna como “e dia pa bisti hanbok.” Fabricanan di paña a bini cu hanboknan nobo specialmente diseña pa atrae hobennan. Aparentemente e idea di bai bek na nan custumbernan tradicional a duna e Coreanonan cierto satisfaccion, pasobra e hanbok moderno a haya un bon aceptacion. Den un era caminda hopi di e ultimo estilonan ta enfatisa sensualidad, hanbok ta un ehempel refrescante di un trahe bunita y decente.—1 Timoteo 2:9.

[Nota]