E Beneficionan di Lesa pa Mucha

DI UN ESCRITOR DI SPIERTA! NA POLONIA

E organisadonan di e campaña anual “Henter Polonia Ta Lesa pa Mucha” ta bisa: “Lesamento ta e yabi tanto pa conocemento como pa habilidad intelectual. . . . E ta habri e porta pa yega na e tesoro di pensamento y conocemento humano.” Si esaki ta berdad, pakico hopi adulto y mucha ta considera lesamento djis un obligacion desagradabel?

E personanan cu a lansa e campaña aki ta declara: “Ta den infancia mester cultiva e custumber di lesa y un amor pa buki.” Nan ta bisa mayornan: “Si bo kier pa bo yiunan ta sabi y bai bon na scol y den bida, lesa pa nan na bos halto tur dia pa 20 minuut.”

Tambe nan ta anima mayornan pa no pospone lesamento pa nan yiunan sino pa “cuminsa mas pronto posibel.” Na ki tempo? Nan ta urgi mayornan: “Laga nos lesa pa nos baby, ten’e den nos brasa, wak e cu ternura, y lanta su interes pa medio di nos bos. Den e manera aki nos ta forma un conexion duradero entre lesamento y un sintimento di siguridad, placer y intimidad. Ademas, esei ta stimula su desaroyo mental.”

E organisadonan di e campaña ta enfatisa cu “aworaki lesamento pa mucha ta mas importante cu nunca prome”, y nan ta mustra riba mas beneficio. Lesamento na bos halto ta siña mucha pensa, “ta yuda nan compronde otro hende, mundo y nan mes, . . . ta lanta interes, ta desaroya imaginacion, ta stimula desaroyo emocional, ta cultiva comprension y sintimento pa otro hende, ta siña nan balornan moral, . . . ta edifica balor propio.” Sin duda, manera e lidernan di e campaña aki ta termina bisando, e ta “e antidoto contra influencianan indeseabel . . . cu ta menasa mente y curason di mucha.”

Pa lesamento duna miho resultado ainda, ta bon pa uza publicacionnan cu ta curasha mucha pa hala serca nan Creador celestial. E miho buki cu por yuda nos hala serca Dios ta Bijbel. E ta bisa cu “for di infancia [e hoben Timoteo] a conoce e scrituranan santo.” (2 Timoteo 3:15) Den un programa di lesamento na bos halto pa yiu, mayornan por inclui bukinan basa riba Bijbel manera Mi buki di relato bíblico y Siña for di e Gran Maestro, skirbi specialmente pa mucha y publica door di Testigonan di Yehova.