Dicon Nos Ta Sufri, Bira Bieu y Muri?

Nos Ta Sufri pa Motibo di Loke Nos Prome Mayornan A Haci

“Pa medio di un hende pica a drenta mundo, y morto pa medio di pica, y asina morto a pasa pa tur hende.”—ROMANONAN 5:12.

Dios a crea Adam cu Eva, nos prome mayornan, cu mente y curpa perfecto. El a pone nan den un bunita paradijs riba Tera cu yama e hofi di Eden. El a bisa nan cu nan por a come di tur e palonan den e hofi cu excepcion di uno. Sinembargo, Adam cu Eva a scoge pa come fruta di e palo cu Dios a bisa nan pa no come di dje. Ora nan a haci esey, nan a peca. (Genesis 2:15-17; 3:1-19) Despues cu nan a desobedece, Dios a saca e pareha ey for di e hofi y bida a bira duro pa nan. Cu tempo nan a haya yiu y bida tabata duro pa nan yiunan tambe. Nan tur a bira bieu y muri. (Genesis 3:23; 5:5) Nos ta bira malo, bira bieu y muri, pasobra nos tur ta bin for di Adam cu Eva.

Spirito Malbado Tambe Ta Pone Nos Sufri

“Henter mundo ta den poder di e Malbado.”—1 JUAN 5:19.

“E Malbado” cu e texto ey ta papia di dje yama Satanas. E ta un angel cu a rebeldia contra Dios. (Juan 8:44; Revelacion 12:9) Despues, mas angel a sigui tras di Satanas. Nan ta yama demoño. E angelnan malbado ey ta uza nan poder pa gaña hende y pa stroba nan di sirbi nan Creador. E angelnan malbado ta influencia hopi hende pa haci cos malo. (Salmo 106:35-38; 1 Timoteo 4:1) Satanas y e demoñonan tin hopi placer den mira hende sufri.

Tin Ora Nos Mes Ta Causa Nos Sufrimento

“Kico cu un hende sembra, esey lo e cosecha tambe.”—GALATIONAN 6:7.

Hopi bes nos ta sufri pa motibo di e pica cu nos a hereda di Adam cu Eva y pa motibo di e influencia cu Satanas tin riba mundo. Pero tin ora hende mes ta causa nan sufrimento. Con asina? Ora nan haci cos malo of tuma mal decision, hopi bes nan tin cu trata cu e consecuencianan. Di otro banda, ora hende haci cos bon, nan lo beneficia di e bon resultadonan di nan accionnan. Por ehempel, un esposo y tata honesto cu ta traha duro y ta stima su famia lo beneficia di e bon resultado di su trabou y lo haci su famia feliz. Pero un esposo y tata cu ta floho, ta gusta hunga wega di placa of ta bebe di mas, por pone su mes y su famia cay den pobreza. Pues, ta sabi di nos banda pa scucha nos Creador. E kier pa nos haya e beneficionan cu ta bin di tuma bon decision. Por ehempel, nos lo por disfruta di “paz” abundante.—Salmo 119:165.

Nos Ta Sufri Pasobra Nos Ta Bibando den “e Ultimo Dianan”

“Den e ultimo dianan ... hende lo stima nan mes, stima placa; nan lo ta ... desobediente na mayornan, ... sin dominio propio, feroz, sin amor pa loke ta bon.”—2 TIMOTEO 3:1-5.

Awe, hopi hende ta comporta nan mes precies manera e texto ey ta bisa. E manera cu nan ta comporta nan mes ta duna nos mas prueba cu nos ta bibando den “e ultimo dianan” di e mundo aki. Bijbel ta bisa tambe cu den e ultimo dianan lo tin guera, scarsedad di cuminda, temblor grandi y maleza. (Mateo 24:3, 7, 8; Lucas 21:10, 11) E cosnan aki por causa hopi sufrimento y morto.