Loke Bijbel Ta Siña Ta Duna Nos Speransa

Dios Lo Caba cu Hende Malbado

“Ora e malbado spruit manera yerba, y tur cu ta haci inikidad florece, ta pa nan wordo destrui pa semper.”—SALMO 92:7.

Manera nos a mira den e articulo anterior, maldad ta sigui aumenta. Esey no ta sorprende nos, pasobra Bijbel ta bisa na 2 Timoteo 3:1-5 cu durante “e ultimo dianan” hende lo comporta nan masha malo mes. E ultimo dianan di kico? E ultimo dianan di hende cu ta scoge pa desobedece Dios. Pronto, Dios lo caba cu tur hende cu no kier stop di haci loke ta malo. E ora ey, ta hende cu ta obedece Dios so lo tin riba Tera. “E hustonan lo hereda e Tera, y lo biba den dje pa semper.” —Salmo 37:29.

Dios Lo Destrui Satanas

“E Dios cu ta duna paz, pronto lo e aplasta Satanas.”—ROMANONAN 16:20.

Ora Dios caba cu Satanas, e demoñonan y mal hende, lo tin paz riba henter Tera. Nos Creador ta haci e siguiente promesa: “Ningun hende lo no spanta [bo].”—Mikeas 4:4.

Dios Lo Caba cu Maleza y Morto

“E tent di Dios lo ta cu humanidad ... Y lo e seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas.”—REVELACION 21:3, 4.

Nos lo no sufri ni bira malo mas, pasobra Dios lo drecha tur e daño causa pa Satanas, Adam, Eva y nos mes imperfeccionnan. Como resultado, “lo no tin morto mas.” Hende cu ta stima y obedece e Creador lo biba pa semper. Pero na unda nan lo biba?

Nos Creador Lo Haci Tera Bira un Paradijs

“Tera seco y desierto lo ta contento, y Araba lo regociha y floria manera rosa.”—ISAIAS 35:1.

Ora Dios caba cu e malbadonan, Tera lo bira un paradijs. Lo tin hopi parke y hofi bunita y lo tin cuminda na abundancia. (Salmo 72:16) Lama, lago y riu lo bira limpi, y nan lo ta yen di bida atrobe. Hasta e palabra “polucion” lo disparce for di nos vocabulario! Hende lo traha nan mes cas y biba den dje. Nunca mas lo no tin hende ta biba riba caya, hende cu hamber of hende pober.—Isaias 65:21, 22.

Dios Lo Lanta Hende Cu A Muri for di Morto

“Lo bay tin un resureccion.”—ECHONAN 24:15.

Lo bo tin gana di mira bo sernan keri cu a muri atrobe? Dios Todopoderoso lo lanta nan bek for di morto, of resucita nan, pa biba den Paradijs riba Tera. Abo lo reconoce nan y nan lo reconoce bo. Imagina con feliz boso tur lo ta! Con nos por tin sigur cu Dios lo lanta nos sernan keri for di morto? Bijbel ta duna ehempel di tanto adulto como mucha cu a ser reuni cu nan famia despues cu nan a ser resucita for di morto. Ademas, hopi hende a mira Hesus lanta hende for di morto.—Lucas 8:49-56; Juan 11:11-14, 38-44.