UN MUNDO TURBULENTO

2 | Proteha Bo Medio di Biba

DICON E TA IMPORTANTE?

Hopi hende ta lucha duro tur dia djis pa tene cabes riba awa. Lamentablemente, e calamidadnan den mundo awe por haci esey hasta mas dificil. Dicon?

Ora tin calamidad, costo di bida ta subi, incluso cuminda y vivienda.
Crisis por pone hende perde trabou of forsa nan traha pa menos placa.
Desaster natural por destrui of causa daño na hende su negoshi, cas of otro propiedad, loke por hiba na hopi pobreza.

Loke Ta Bon pa Bo Sa

Si bo sa maneha bo placa bon, lo bo ta mihor prepara pa un crisis.
Djis pasobra bo ta bon para financieramente awor, no kiermen cu esey lo ta asina pa semper. Corda cu e placa cu bo ta gana of spaar y bo propiedadnan por perde nan balor.
Tin cos cu placa no por cumpra, manera felicidad y union den famia.

Loke Bo Por Haci Awor

Bijbel ta bisa: “Si nos tin cuminda, paña y un dak riba nos cabes, nos lo keda contento cu e cosnan aki.”—1 Timoteo 6:8.

Keda contento cu loke bo tin ta nifica limita loke bo tin gana di dje y keda satisfecho si tur dia bo haya loke bo tin mester di dje. Esey ta importante specialmente ora bo entrada bay atras.

Pa bo ta contento cu loke bo tin, kisas bo mester cambia bo estilo di bida. Si bo ta biba for di bo forsa financiero, lo bo haya bo den mas problema.

LOKE BO POR HACI—Algun Sugerencia Practico

Loke bo por haci pa proteha bo medio di biba den tempo di crisis y calamidad

BAHA BO GASTONAN

Baha bo gastonan

No gasta placa riba cos cu bo no tin mester di dje. Puntra bo mes: ‘Mi echt tin mester di un auto? Mi por cuminsa planta?’
Prome cu bo cumpra algo, puntra bo mes: ‘Mi echt tin mester di dje? Mi por afford e?’
Aplica pa yudansa di gobierno of otro organisacion si esakinan ta disponibel.

“Nos a sinta hunto como famia y analisa nos estilo di bida. Nos a limita e cantidad di placa cu nos ta gasta na entretenimento y recreo. Ademas, nos a cuminsa prepara cuminda cu ta costa menos placa.”—Gift.

TRAHA UN BUDGET

Traha un budget

Bijbel ta bisa: “No tin duda: Plan di hende diligente ta duna bon resultado; di otro banda, hende cu ta haci cos ansha ta cay den pobreza.” (Proverbionan 21:5) Un budget por yuda bo haci sigur cu bo gastonan no ta pasa bo entrada.

Prome, skirbi cuanto placa lo bo tin na entrada pa luna.
Di dos, traha un lista di tur cos cu bo famia ta gasta tur luna na dje y analisa bon na unda e placa ta bay.
Despues, compara bo gastonan cu loke bo ta haya na entrada y haci sigur cu bo tin suficiente placa pa paga pa tur e cosnan cu bo tin mester di dje. Y si ta necesario, wak ki gastonan por baha of elimina pa bo keda den bo budget.

“Tur luna, nos ta traha un lista di nos entrada y di nos gastonan. Nos ta purba di pone un tiki placa un banda pa emergencia y pa cos cu nos ta bay tin mester di dje den futuro. Nos ta preocupa menos ora nos haci esey, pasobra nos sa di antemano con nos ta bay uza nos entrada.”—Carlos.

EVITA DEBE / SPAAR PLACA

Evita debe / spaar placa

Traha un bon plan pa bo baha bo debenan. Si ta posibel, evita tur debe. Mas bien, purba di spaar pa bo cumpra loke bo tin mester.
Pone un tiki placa un banda tur luna pa gasto cu bo sa cu lo bin den futuro of pa cos inespera cu por presenta.

TRAHA DURO / MANTENE BO TRABOU

Bijbel ta bisa: “Trabou duro ta trece beneficio.”—Proverbionan 14:23.

Traha duro / mantene bo trabou

Purba di tin un punto di bista positivo di bo trabou. Hasta si bo trabou no ta loke echt bo tabatin gana di haci, e ta yuda bo pa bo tin un entrada.
Purba di ta un trahador balente cu hende por conta cu ne. Esey por yuda bo mantene bo trabou. Pero si bo perde bo trabou mes, lo ta mas facil pa bo haya un otro trabou.

“Mi ta tuma cualkier trabou cu ta disponibel, hasta si mi no ta gusta e trabou of e no ta paga mes tanto cu mi a spera. Semper hende por conta cu mi. Mi ta haci mi trabou bon, comosifuera ta pa mi mes mi ta traha.”—Dmitriy.

Si bo ta buscando trabou ...

Tuma iniciativa. Tuma contacto cu negoshinan cu por tin trabou cu bo por haci, hasta si nan no a saca aviso cu nan ta buscando hende. Bisa bo famia- y amigonan cu bo ta buscando trabou.
Sea flexibel. Muy probablemente lo bo no haya un trabou cu ta cumpli cu tur loke abo ta desea.