LOKE BO POR HACI ORA PRIJS SUBI

Uza Bo Placa na un Manera Sabi

Ora e prijsnan subi, cos ta bira dificil pa nos tur. Pero, no desespera. Bo por haci algo pa mehora bo situacion.

DICON ESEY TA IMPORTANTE?

Si bo no haci esfuerso pa uza bo placa na un manera sabi, bo por haya mas problema financiero. Y como consecuencia, bo ta haya preocupacion y stress. Hasta si bo no tin hopi cen, toch tin cos cu bo por haci pa drecha bo situacion.

LOKE BO POR HACI

No cumpra cos si bo no tin placa pa pag’e. Si bo haci esey, lo bo ta mas trankil y lo bo tin placa si algo inespera pasa.

Pa bo no gasta mas di loke bo tin, lo ta bon pa bo traha un budget. Esaki ta un lista di tur bo entradanan y tur bo gastonan. Despues cu bo traha bo budget, cumpra solamente loke bo mester y haci bo maximo esfuerso pa tene bo mes na bo budget. Y ahusta bo budget si prijs subi of si bo entrada cambia. Anto, si bo ta casa, consulta cu bo casa prome cu bo tuma cualkier decision.

Purba esaki: En bes di cumpra cos riba credit, cumpra cu placa cu bo tin. Algun hende ta haya cu di e manera aki, nan ta maneha nan placa mas mihor y hasta ta evita debe. Ademas, tuma tempo pa controla bon e documentonan di banco cu ta mustra cuanto cen bo a deposita y cuanto placa bo a gasta durante e luna. Lo bo tin menos stress ora bo sa cuanto placa bo tin.

Tin biaha por ta dificil pa no gasta demasiado cen. Pero si bo traha bo budget bon, esey lo por yuda bo. Y lo bo ta menos preocupa tocante placa.

“Calcula e gastonan.”—Lucas 14:28.

Traha duro pa keda cu bo trabou. Kico ta algun cos cu bo por haci pa keda cu bo trabou? Ata algun sugerencia: Yega na ora. Enfoca riba e cosnan positivo di bo trabou. Tuma iniciativa y traha duro. Mustra respet. Tene bo mes na regla y purba di mehora bo habilidadnan.

No gasta placa na cos innecesario. Puntra bo mes: Mi ta gasta mucho placa na cos cu mi no tin mester of hasta na cos cu no ta bon pa mi? Por ehempel, hopi hende ta gasta nan cen na cos malo, manera droga, gamblemento, humamento of bebemento di mas. E bicionan ey por hasta daña nan salud y pone nan perde nan trabou.

“Hende cu ta busca pa sa con nan por adkiri sabiduria ... ta feliz. Ta mihor bo busca sabiduria cu bo busca plata.”—Proverbionan 3:13, 14.

Spaar pa un emergencia. Si bo por, pone un poco placa un banda pa gasto inespera of pa emergencia. E placa ey cu bo a aparta por duna bo un grado di siguridad si diripiente abo of un miembro di bo famia bira malo, perde trabou of si cualkier otro cos inespera sosode.

“Tur hende por haya nan un ora pa otro cu un situacion dificil of cu suceso inespera.”—Eclesiastes 9:11.

Algun Sugerencia pa Spaar Placa

Cushina mas tanto na cas.

Si bo tin custumber di cumpra co’i bebe y co’i come afo, bo ta gasta hopi mas tanto placa. Ta berdad cu ta tuma tempo y esfuerso pa prepara cuminda na cas, pero bo por spaar hopi cen. Ademas, lo bo tin mas control riba loke bo ta come.

Cumpra cos na un manera sabi.

Traha un lista di compras y tene bo mes na dje. Purba di no cumpra cos cu bo no a plania pa cumpra.
Si ta posibel, cumpra cos na cantidad grandi ora tin descuento. Pero, si bo tin comestibel cu ta daña lihe, trata di warda nan bon pa no dispidi cuminda.
Wak si bo por cumpra cos mas barata, pero di bon calidad.
Si caminda bo ta biba, bo por shop online, kisas ta algo cu bo por purba? Shop online por yuda bo evita di cumpra cos cu bo no a plania y lo bo ta mas consciente con bo ta gasta bo placa.
Probecha ora tin descuento, y si tin coupon, haci bon uzo di nan. Compara prijs, incluso ora ta trata di e servicionan manera airco, gas, internet of telefon.

Pensa prome cu bo cumpra cos nobo.

Compania cu ta traha telefon y otro productonan cada bes ta traha model nobo pa nan haci mas ganashi. Pues, puntra bo mes: Di berdad mi tin cu cumpra un aparato nobo? Si mi tin cu cumpra un nobo, mi mester cumpr’e awor? Y di berdad mi mester cumpra e ultimo modelo?

Drecha y bolbe uza loke bo tin.

Cuida bo aparatonan manera frishider y stoof, y si nan daña, purba di drecha nan si esey ta sali mas barata. Ademas, bo por spaar placa si bo cumpra cos segunda mano.

Purba planta.

Bo por purba planta bo propio fruta y berdura den cura? Di e manera ey, lo bo gasta menos placa na cuminda y lo bo tin algo pa cambia, pa bende of pa parti cu otro hende.

“Plan di hende diligente ta duna bon resultado.”—Proverbionan 21:5.

“Nos ta wak prijs di e cosnan cu nos sa cumpra regularmente, y nos ta tene cuidou con hopi nos ta uza credit card.”—Miles, Inglatera.

“Prome cu nos haci compras, ami cu mi famia semper ta traha un lista di e cosnan cu nos tin mester.”—Jeremy, Merca.

“Tur ora bay nos ta haci sigur cu nos por afford loke nos a plania pa cumpra, y nos ta spaar placa pa gasto inespera.”—Yael, Israel.

“Nos a siña nos yiunan pa laga drecha loke cu daña en bes di cumpra cos nobo. Esey ta inclui nos auto y e cosnan cu tin den cas. Ademas, ami cu mi casa ta purba di no cumpra e model di mas nobo.”—Jeffrey, Merca.

“Mi a baha mi gastonan pasobra mi ta planta mi mes berduranan y mi ta cria algun galiña. Y hasta mi por duna otro hende algun di mi berduranan.”—Hono, Myanmar.