Abraham—Un Amigo di Dios

UN LUGA unda hende a bai biba despues di Diluvio tabata yama Ur. El a bira un stad importante cu bon cas den dje. Pero e hendenan ei tabata adora dios falso. Asina nan tabata haci na Babel tambe. E hendenan di Ur y Babel no tabata manera Noe y su yiu Sem, cu a sigui sirbi Jehova.

Finalmente, 350 aña despues di e diluvio, fiel Noe a muri. Dos aña so despues di esei e homber cu bo ta mira riba e plachi a nace. E tabata un persona masha special pa Dios, yama Abraham. El a biba cu su famia den e stad Ur.

Un dia Jehova a bisa Abraham: ‘Bandona Ur y bo famia, y bai biba den un tera cu lo mi mustra bo.’ Abraham a obedece Dios y laga atras tur e bon bida na Ur? Si, el a hacie. Y pa motibo cu Abraham semper a obedece Dios, el a yega di ser yama amigo di Dios.

Algun miembro di famia di Abraham a bai hunto cu ne ora el a bandona Ur. Su tata Tare a bai cu ne. Su subrino Lot tambe. Y naturalmente, su esposa Sara tambe a bai cu ne. Cu tempo nan tur a yega Haran, unda Tare a muri. Nan tabata leu for di Ur.

Despues di un tempo Abraham y su famia di cas a bandona Haran y a yega na e tera yama Canaan. Ei Jehova a bisa: ‘Esaki ta e tera cu lo mi duna bo yiunan.’ Abraham a keda na Canaan y a biba den tent.

Dios a cuminsa yuda Abraham di tal manera cu el a haya tou grandi di carne y otro bestia y cientos di cria. Pero Abraham cu Sara no tabatin yiu di nan mes.

Ora Abraham tabatin 99 aña di edad, Jehova a bis’e: ‘Mi ta priminti bo cu lo bo bira tata di hopi nacion di pueblo.’ Pero, con esei por a sosode? Abraham cu Sara tabata mucho bieu caba pa haya yiu.