Jacob Ta Bai Haran

BO SA ken e hombernan cu ta papia cu Jacob ta? Despues di a cana hopi dia, Jacob a topa cu nan banda di un pos. Nan tabata cuida nan carnenan. Jacob a puntra nan: ‘Di unda boso ta?’

Nan a bisa: ‘Di Haran.’

Jacob a puntra nan: ‘Boso conoce Laban?’

Nan a contesta: ‘Si. Mira, su yiu muher Raquel ta bini cu su tou di carne.’ Bo ta mira Raquel ei biniendo djaleu?

Ora Jacob a mira Raquel cu e carnenan di su omo Laban, Jacob a bai y a hala e piedra for di e pos pa e carnenan por a bebe. Anto Jacob a duna Raquel un sunchi y a bis’e ken e ta. Raquel a alegra masha y a bai cas y a conta su tata Laban.

Laban a keda masha contento pa laga Jacob keda cerca dje. Y ora Jacob a pidi pa Raquel como su esposa, Laban a keda contento. Sinembargo, el a pidi Jacob pa traha den su cunucu shete aña como pago pa Raquel. Dor cu Jacob a stima Raquel asina tanto, el a haci esei. Pero, ora e tempo a yega pa e casamento, bo sa kico a sosode?

Laban a duna Jacob su yiu muher mayo, Lea, en bes di Raquel. Ora Jacob a cumbini pa traha pa Laban shete aña mas, Laban a dun’e Raquel tambe como su esposa. Na e tempo ei Dios a permiti homber tin mas cu un esposa. Pero awor, segun Bijbel, un homber mester tin un esposa so.