E Famia Grandi di Jacob

WAK e famia grandi ei. Eseinan ta e 12 yiu hombernan di Jacob. Pero e tabatin yiu muher tambe. Bo sa nomber di e yiunan? Ban siña algun di nan.

Lea a duna lus na Ruben, Simeon, Levi y Juda. Ora Raquel a mira cu e no ta haya yiu, el a bira masha tristo. P’esei el a duna Jacob su cria Bilha, y Bilha a haya dos yiu, Dan y Neftali. Anto Lea tambe a duna su cria Zilpa na Jacob, y Zilpa a duna lus na Gad y Aser. Finalmente Lea a haya dos yiu mas, Isacar y Zabulon.

Porfin Raquel por a haya un yiu. El a yam’e Jose. Despues nos lo siña hopi mas tocante Jose, pasobra el a bira un persona masha importante. Eseinan tabata e 11 yiunan di Jacob cu a nace ora e tabata biba cerca Laban, tata di Raquel.

Jacob tabatin algun yiu muher tambe, pero Bijbel ta menciona e nomber di un di nan so. Su nomber tabata Dina.

E tempo a yega ora Jacob a dicidi di bandona Laban y regresa Canaan. P’esei el a reuni su famia grandi y su tou grandi di carne y di baca, y el a cuminsa e biahe largo.

Despues cu Jacob y su famia a establece nan mes na Canaan pa un tempo, Raquel a duna lus na un otro yiu homber. Esei a sosode mientras cu nan tabata di biahe. Raquel tabatin problema pa haya yiu, y finalmente a muri hayando yiu. Pero e baby a nace bon. Jacob a dun’e e nomber Benjamin.

Nos kier corda nomber di e 12 yiunan di Jacob pasobra tur e nacion di Israel a bini di nan. De echo, e 12 tribunan di Israel ta carga nomber di dies yiu di Jacob y dos yiu di Jose. Isaak a keda biba hopi aña despues cu tur e muchanan ei a nace, y e mester a keda masha contento pa haya asina tanto nieto. Pero, laga nos mira kico a sosode cu su nieta, Dina.