Con Moises A Scapa na Baby

WAK e baby cu ta yora y ta tene dede di e juffrouw. Esei ta Moises. Bo sa ken e juffrouw bunita ta? E ta un princesa Egipcio, yiu muher di Farao mes.

E mama di Moises a sconde su yiu te ora el a haci tres luna, pasobra e no tabata kier pa e Egipcionan mata Moises. Pero e tabata sa cu nan lo por haya Moises, y p’esei esaki ta loke el a haci pa scap’e.

El a tuma un macutu y a fur’e di manera cu awa no por drent’e. Anto el a pone Moises den dje y a pone e macutu den yerba halto na canto di Riu Nilo. El a manda Miriam, ruman muher di Moises, para eicerca y mira kico lo sosode.

Un poco despues e yiu muher di Farao a baha na Riu Nilo pa baña. Diripiente el a mira e macutu den e yerba halto. El a bisa un cria: ‘Bai cohe e macutu ei pa mi.’ Ora e princesa a habri e macutu, ki un baby bunita el a mira! E yiuchi Moises tabata yora, y e princesa a sinti duele di dje. E no tabata kier pa nan mat’e.

Anto Miriam a acerca nan. Bo por mir’e riba e plachi. Miriam a puntra e yiu muher di Farao: ‘Mi mag bai yama un mama Israelita pa cria e baby pa juffrouw?’

‘Si, por fabor’, e princesa a contesta.

P’esei Miriam a core bai lihe pa bisa su mama. Ora cu e mama di Moises a yega cerca e princesa, e princesa a bis’e: ‘Tuma e mucha aki y cri’e pa mi, y lo mi paga bo.’

Asina e mama di Moises a cria su mes yiu. Despues ora Moises tabata basta grandi, e mama a hib’e pa e yiu muher di Farao, kende a adopt’e como su yiu. Ta p’esei Moises a lanta den e cas di Farao.