Moises y Aaron A Bishita Farao

DESPUES cu Moises a regresa Egipto, el a conta su ruman Aaron tur cos tocante e milagernan. Y ora Moises y Aaron a mustra e Israelitanan e milagernan, nan tur a kere cu Jehova tabata cu Moises y Aaron.

E ora ei Moises y Aaron a bai pa bishita Farao. Nan a bis’e: ‘Jehova e Dios di Israel a bisa, “Laga mi pueblo bai pa tres dia, pa nan por adora mi den desierto.”’ Pero Farao a contesta: ‘Mi no ta kere den Jehova. Y mi no ta laga Israel bai.’

Farao a rabia pasobra e pueblo tabata kier tempo liber di nan trabou pa nan adora Jehova. P’esei el a forsa e pueblo traha asta mas duro. E Israelitanan a culpa Moises pa e maltrato cu nan a haya, y Moises a sintie tristo. Pero Jehova a bis’e pa e no precupa. ‘Mi ta haci Farao laga mi pueblo bai’, Jehova a bisa.

Moises y Aaron a bai bishita Farao atrobe. E biaha aki nan a haci un milager. Aaron a tira su bara na suela, y el a bira un colebra grandi. Pero e sabionan di Farao tambe a tira nan bara na suela, y colebra a presenta. Pero, mira! E colebra di Aaron a come e colebranan di e sabionan. Toch Farao no a laga e Israelitanan bai.

P’esei e tempo a yega pa Jehova siña Farao un les. Bo sa con Dios a haci esei? Dor di manda 10 plaga, of dificultad grandi, riba Egipto.

Despues di varios di e plaganan, Farao tabata yama Moises y bis’e: ‘Laga e plaga stop y lo mi laga Israel bai.’ Pero cada bes cu e plaga a stop, Farao tabata cambia di idea. E no a laga e pueblo bai. Pero finalmente, despues di e di 10 plaga, Farao a manda e Israelitanan bai.

Bo sa kico cada un di e 10 plaganan tabata? Bira e blachi y laga nos siña tocante nan.