E 10 Plaganan

WAK e plachinan. Cada un ta mustra un plaga cu Jehova a manda riba Egipto. Riba e prome plachi bo por mira Aaron hinca su bara den Riu Nilo. Ora el a haci esei, awa di e riu a bira sanger. E piscanan a muri, y e riu a cuminsa hole stinki.

Siguientemente, Jehova a pone dori sali for di Riu Nilo. Nan tabata tur caminda—den forno, den weya, riba cama di hende—tur caminda. Ora e dorinan a muri e Egipcionan a montona nan den montonnan grandi, y e dorinan morto a haci e tera hole stinki.

Anto Aaron a dal e tera cu su bara y e stof a bira ashibi, insecto chikito cu ta bula y morde hende. E ashibinan tabata e di tres plaga riba e tera di Egipto.

E resto di plaganan a haci daño na e Egipcionan so pero na e Israelitanan no. E di cuater plaga tabata un plaga di musca grandi cu a yena cas di tur e Egipcionan. E di cinco plaga tabata riba bestia. Hopi baca y carne y cabrito di e Egipcionan a muri.

Siguientemente Moises y Aaron a tuma shinishi y a tir’e na laira. Esei a haci mal yaga sali riba hende y bestia. Esei tabata e di seis plaga.

Despues di esei Moises a hisa su man na laira, y Jehova a manda strena cu hagel. Esei tabata e tempestad di hagel di mas malo cu a yega di suta Egipto.

E di ocho plaga tabata un nubia grandi di tiracochi. Nunca prome cu esei ni despues no tabatin asina tanto tiracochi. Nan a come tur loke e hagel no a destrui.

E di nuebe plaga tabata scuridad. Pa tres dia scuridad diki a tapa e tera, pero e Israelitanan tabatin claridad caminda nan tabata biba.

Finalmente, Dios a bisa su pueblo pa spat sanger di lamchi di cabrito of carne riba nan kozijn di porta. Anto e angel di Dios a pasa riba Egipto. Caminda e angel a mira e sanger, e no a mata ningun hende den e cas ei. Pero den tur cas cu no tabatin sanger riba e kozijn di porta, e angel di Dios a mata e primogenito di hende y di bestia. Esei tabata e di dies plaga.

Despues di e ultimo plaga, Farao a bisa e Israelitanan bai. E pueblo di Dios tabata cla y e mesun anochi nan a cuminsa nan marcha for di Egipto.