Crusando Lama Cora

MIRA kico ta sosode! Esei ta Moises cu su bara saca riba Lama Cora. E hendenan hunto cu ne riba tera seco ta e Israelitanan. Pero Farao y tur su ehersito ta hoga den lama. Laga nos mira con esei a sosode.

Manera nos a siña caba, Farao a bisa e Israelitanan bandona Egipto despues cu Dios a manda e di 10 plaga riba e Egipcionan. Rond di 600.000 homber Israelita a bai, y tambe hopi hende muher y mucha. Ademas, un gran cantidad di otro hende cu a cuminsa kere den Jehova a bai hunto cu e Israelitanan. Nan tur a bai cu nan carne- y cabrito- y bacanan.

Pero prome cu nan a bai, e Israelitanan a pidi e Egipcionan duna nan paña y cos traha di oro y plata. E Egipcionan tabatin masha miedo debi na e ultimo plaga cu a dal nan. P’esei nan a duna e Israelitanan tur loke nan a pidi.

Despues di poco dia e Israelitanan a yega Lama Cora. Nan a sosega ei. Mientrastanto Farao y su hendenan a cuminsa sinti duele cu nan a manda e Israelitanan bai. Nan a sclama: ‘Nos a laga nos esclabonan bai!’

P’esei Farao a cambia di idea atrobe. El a prepara lihe su garoshi di guera y su ehersito. Anto el a cuminsa core tras di e Israelitanan cu 600 garoshi special, y tambe tur e otro garoshinan di Egipto.

Ora e Israelitanan a mira Farao y su ehersito biniendo tras di nan, nan a haya masha miedo. No tabatin caminda pa hui. Lama Cora tabata na un banda di nan, y ata e Egipcionan tabata bin for di e otro direccion. Pero Jehova a pone un nubia entre su pueblo y e Egipcionan. P’esei e Egipcionan no por a mira e Israelitanan pa ataca nan.

Anto Jehova a bisa Moises pa e saca su bara riba Lama Cora. Ora Moises a haci esei, Jehova a haci un biento fuerte supla di oost. E awa di lama a parti, y e awa a keda wanta na cada banda.

Anto e Israelitanan a cuminsa marcha dor di e lama riba tera seco. A dura hopi ora pa e miyones di hendenan cu tur nan bestianan pasa dor di e lama y yega sano y salvo na e otro banda. Finalmente e Egipcionan por a mira e Israelitanan atrobe. Nan esclabonan tabata scapa! P’esei e Egipcionan a core lihe drenta lama tras di nan.

Ora nan a haci esei, Dios a pone cu e wielnan di nan garoshinan a kita. E Egipcionan a bira masha spanta y a cuminsa grita: ‘Jehova ta bringa na fabor di e Israelitanan contra nos. Ban bandona e luga aki!’ Pero tabata lat caba.

Esei ta ora cu Jehova a bisa Moises pa e saca su bara riba Lama Cora, manera bo a mira riba e plachi. Y ora Moises a haci esei, e murayanan di awa a cuminsa bin bek y tapa e Egipcionan y nan garoshinan. Henter e ehersito cu a sigui tras di e Israelitanan a resulta den lama. Y ni sikiera un Egipcio a scapa!

Ki felis henter e pueblo di Dios a keda cu nan a scapa! E hombernan a canta gradicimento na Jehova, bisando: ‘Jehova a gana un victoria glorioso. El a tira cabai y nan hinete den lama.’ Miriam, ruman muher di Moises, a tuma su tamborin, y tur hende muher a siguie cu nan tamborin. Y baliando cu goso, nan a canta e mesun cantica cu e hombernan tabata canta: ‘Jehova a gana un victoria glorioso. El a tira cabai y nan hinete den lama.’