Un Mal Rei A Goberna Egipto

E HOMBERNAN aki ta forsa hende traha. Mira e homber cu ta suta un trahado cu zwiep! E trahadonan ta di e famia di Jacob, y ta ser yama Israelita. Y e hombernan cu ta forsa nan traha ta Egipcio. E Israelitanan a bira esclabo di e Egipcionan. Con esei a sosode?

Pa hopi aña e famia grandi di Jacob a biba trankil na Egipto. Jose, cu tabata e homber di mas importante na Egipto despues di Farao e rei, a cuida nan. Pero cu tempo Jose a muri. Y un Farao nobo, cu no tabata gusta Israelita, a bira rei di Egipto.

P’esei e mal Farao aki a haci e Israelitanan esclabo. Y el a pone hombernan malo y cruel pa manda riba nan. Nan a forsa e Israelitanan traha masha duro den construccion di stad pa Farao. Pero toch e Israelitanan a sigui aumenta na cantidad. Despues di un tempo e Egipcionan a haya miedo cu e Israelitanan lo por bira mucho hopi y mucho fuerte.

Bo sa kico Farao a haci? El a papia cu e parteranan cu tabata yuda mamanan Israelita haya yiu, y a bisa nan: ‘Boso tin cu mata tur yiu homber cu nace.’ Pero e parteranan tabata bon hende, y nan no a mata e yiu hombernan.

P’esei Farao a duna e mandamento aki na henter su pueblo: ‘Tuma e yiu hombernan di e Israelitanan y mata nan. Laga e yiu muhernan so biba.’ Esei no tabata un cos teribel pa exigi? Laga nos mira con un yiu homber a scapa.