E Famia A Bai Biba na Egipto

JOSE no por a domina su emocion mas. El a bisa tur su crianan pa nan bandona e sala. Ora cu e tabata su so cu su rumannan, Jose a cuminsa yora. Nos por imagina ki un sorpresa esei tabata pa su rumannan, pasobra nan no tabata sa pakico Jose ta yora. Finalmente Jose a bisa nan: ‘Mi ta Jose. Mi tata ta na bida ainda?’

Su rumannan a keda asina sorprendi cu nan no por a papia. Nan tabatin miedo. Pero Jose a bisa: ‘Por fabor, bini mas cerca.’ Ora nan a hala cerca, el a bisa: ‘Mi ta boso ruman Jose, cu boso a bende manda Egipto.’

Jose a sigui papia cu bondad: ‘No culpa boso mes dor cu boso a bende mi pa bini aki. Realmente ta Dios a manda mi Egipto pa salba bida di hende. Farao a haci mi gobernante di henter e pais. Pues, boso bai bek lihe cerca mi tata y cont’e esaki. Y bis’e bin biba na Egipto.’

Anto Jose a pone su mannan rond di su rumannan y a brasa y sunchi cada un. Ora Farao a tende cu e rumannan di Jose a bini, el a bisa Jose: ‘Laga nan hiba garoshi y busca nan tata y nan famia y bin bek aki. Lo mi duna nan e mihor tera den henter Egipto.’

Esei ta loke nan a haci. Riba e plachi bo por mira Jose brasando su tata ora el a yega Egipto cu henter su famia.

E famia di Jacob a bira masha grandi. Nan tabata un total di 70 hende ora nan a bai biba na Egipto, incluyendo Jacob, su yiunan y su nietonan. Pero tambe nan tabatin esposa, y probablemente hopi cria cu nan. Nan tur a bai biba na Egipto. Nan a ser yama Israelita, pasobra Dios a cambia nomber di Jacob pa Israel. E Israelitanan a bira un pueblo masha special pa Dios, manera nos lo mira despues.