Jose A Test Su Rumannan

JOSE kier a sa si ainda su 10 ruman hombernan mas grandi tabata mal hende y a falta bondad. P’esei el a bisa: ‘Boso ta spion. Boso a bini pa haya sa unda nos pais ta suak.’

‘No, nos no ta spion’, nan a contesta. ‘Nos ta hende honrado. Nos tur ta ruman. Nos tabata 12. Pero nos a perde un ruman homber, y esun di mas chikito ta na cas cerca nos tata.’

Jose a pretende di no kere nan. El a sera su ruman homber cu yama Simeon den prizon, y a laga e otronan tuma cuminda y bai cas. Pero el a bisa nan: ‘Ora boso bini bek, boso mester trece boso ruman homber di mas chikito cu boso.’

Ora nan a regresa Canaan, e rumannan a conta nan tata Jacob tur loke a sosode. Jacob a keda masha tristo. ‘Nos a perde Jose’, el a sclama, ‘y awor nos a perde Simeon. Mi no ta laga boso hiba mi yiu homber di mas chikito Benjamin.’ Pero ora cu nan cuminda a cuminsa caba, Jacob a keda obliga di laga nan hiba Benjamin Egipto pa nan por a haya mas cuminda.

Awor Jose a mira su rumannan ta bini. El a keda masha contento pa mira su ruman di mas chikito, Benjamin. Naturalmente, ningun di nan no tabata sa cu e homber importante ei ta Jose. Awor Jose a haci algo pa test su 10 mitar rumannan.

El a manda pa su crianan yena tur nan saconan cu cuminda. Pero, sin laga nan sa, el a manda pa pone su copa special di plata den saco di Benjamin. Despues cu nan tur a bai y no tabata mucho leu riba caminda, Jose a manda su crianan nan tras. Ora cu e crianan a yega cerca nan, e crianan a puntra: ‘Pakico boso a horta e copa di plata di nos doño?’

Tur e rumannan a contesta: ‘Nos no a horta su copa. Si boso haya e copa den poder di un di nos, laga e persona ei muri.’

P’esei e crianan a ristra tur e saconan, y nan a haya e copa den e saco di Benjamin, net manera bo ta mira riba e plachi ei. E crianan a bisa: ‘Boso tur por bai, pero Benjamin tin cu bai bek cu nos.’ Kico e 10 mitar rumannan a haci e ora ei?

Nan tur a bai bek cu Benjamin na cas di Jose. Jose a bisa su rumannan: ‘Boso tur por bai cas, pero Benjamin mester keda aki como mi esclabo.’

Awor Juda a papia, y a bisa: ‘Si mi bai cas sin e mucha, mi tata lo muri pasobra e ta stim’e masha hopi. P’esei, por fabor, tene ami aki como bo esclabo, pero laga e mucha bai cas.’

Jose por a mira cu su rumannan a cambia. Awor nan no ta mal hende sin bondad mas. Laga nos mira kico Jose a haci e ora ei.