E Soñonan di Farao

DOS aña a pasa, y Jose ta den prizon ainda. E copero no a corda riba dje. Anto un anochi Farao tabatin dos soño masha special, y el a keda puntra su mes kico nan ta nifica. Bo ta mira Farao na soño ei? Su manece Farao a yama e hombernan sabi cerca dje y a conta nan kico el a soña. Pero nan no por a splic’e nificacion di su soñonan.

Awor porfin e copero a corda riba Jose. El a bisa Farao: ‘Ora mi tabata den prizon, tabatin un homber ei cu por a splica nificacion di soño.’ Farao a laga nan trece Jose di biaha for di prizon.

Farao a conta Jose kico el a soña: ‘Mi a mira shete baca gordo y bunita. Anto mi a mira shete baca masha flaco, cuero cu weso. Y e shete bacanan flaco a come e shete bacanan gordo.

Den mi segundo soño mi a mira shete tapushi di trigo gordo y hecho creciendo na un solo stengel. Despues mi a mira shete tapushi di trigo flaco y seco. Y e shete tapushinan di trigo flaco a cuminsa guli e shete bon tapushinan di trigo.’

Jose a bisa Farao: ‘E dos soñonan ta nifica e mesun cos. E shete bacanan gordo y e shete tapushinan di trigo gordo ta nifica shete aña, y e shete bacanan flaco y shete tapushinan di trigo flaco ta nifica shete aña mas. Lo tin shete aña ora cu hopi cuminda lo ser produci den Egipto. Despues lo tin shete aña ora cu masha poco cuminda lo ser produci.’

P’esei Jose a bisa Farao: ‘Scohe un homber sabi y encarg’e pa colecta cuminda durante e shete bon añanan. Asina e pueblo lo no muri di hamber durante e siguiente shete mal añanan ora cu masha poco cuminda lo ser produci.’

Farao a gusta e idea. Y el a scohe Jose pa colecta cuminda y ward’e. Despues di Farao, Jose a bira e homber di mas importante na Egipto.

Ocho aña despues, durante e scarsedad di cuminda, Jose a mira algun homber ta bini. Bo sa ken nan tabata? Wel, nan tabata su 10 ruman hombernan mas grandi! Nan tata Jacob a manda nan Egipto pasobra cuminda a bira scars na Canaan. Jose a reconoce su rumannan, pero nan no a reconoce Jose. Bo sa pakico? Pasobra Jose a bira mas grandi, y e tabata bisti den otro tipo di paña.

Jose a corda cu ora e tabata mucha, el a soña cu su rumannan lo bini y buig p’e. Bo ta corda cu bo a lesa esei? Asina Jose a compronde cu ta Dios a mand’e Egipto, y pa un bon motibo. Kico bo ta kere cu Jose a haci? Ban mira.