Jehova Ta Duna Su Lei

ROND di dos luna despues cu e Israelitanan a sali for di Egipto, nan a yega na Sero Sinai, cu ta ser yama Horeb tambe. Esei ta e mesun luga caminda Jehova a papia cu Moises for di e mata na candela. E pueblo a lanta un campamento y a keda ei pa un tempo.

Mientras cu e pueblo tabata spera abou, Moises a subi e sero. Na halto riba top di e sero, Jehova a bisa Moises cu E kier pa e Israelitanan obedec’e y bira Su pueblo special. Ora Moises a baha for di e sero, el a bisa e Israelitanan loke Jehova a bisa. Y e pueblo a bisa cu nan lo obedece Jehova, pasobra nan kier bira su pueblo.

E ora ei Jehova a haci un cos straño. El a laga huma sali for di top di e sero, y a laga strena zona duro. Tambe el a papia cu e pueblo y bisa: ‘Mi ta Jehova boso Dios kende a saca boso for di Egipto.’ Anto el a duna nan e mandamento: ‘Boso no mag adora ningun otro Dios fuera di mi.’

Dios a duna e Israelitanan nuebe otro mandamento, of lei. E pueblo a sinti masha miedo. Nan a bisa Moises: ‘Abo papia cu nos, pasobra nos tin miedo cu si Dios papia cu nos, nos por muri.’

Despues Jehova a bisa Moises: ‘Subi bin cerca mi riba e sero. Lo mi duna bo dos tabla di piedra riba cua mi a skirbi e leinan cu mi kier pa e pueblo warda.’ P’esei Moises a subi e sero atrobe. El a keda ei pa 40 dia y 40 anochi.

Dios tabatin masha hopi lei pa su pueblo. Moises a skirbi nan tur. Dios a duna Moises e dos tablanan di piedra tambe. Riba nan Dios mes a skirbi e 10 leinan cu el a bisa henter e pueblo. Nan ta ser yama e Dies Mandamentonan.

E Dies Mandamentonan ta leinan importante. Pero e cantidad di otro leinan cu Dios a duna e Israelitanan tambe ta importante. Un di e leinan ei ta bisa: ‘Bo tin cu stima Jehova bo Dios cu tur bo curason, cu tur bo mente, cu tur bo alma y cu tur bo forsa.’ Y un otro ta bisa: ‘Bo tin cu stima bo prohimo mescos cu bo mes.’ Hesucristo, e Yiu di Dios, a bisa cu eseinan ta e dos leinan mas grandi cu Jehova a duna su pueblo Israel. Mas despues nos lo siña hopi cos tocante e Yiu di Dios y su siñansa.