E Bishe di Oro

AYAYAI! Kico e pueblo ta haciendo awor? Nan ta haci oracion na un bishe! Pakico nan ta haci esei?

Ora cu Moises a keda pa hopi tempo riba e sero, e pueblo a bisa: ‘Nos no sa kico a pasa Moises. Pues, ban traha un dios pa hiba nos for di e tera aki.’

Aaron, ruman homber di Moises, a bisa: ‘Ta bon. Kita tur boso renchi di horeanan di oro y trece nan pa mi.’ Ora e pueblo a haci esei, Aaron a smelt nan y a traha un bishe di oro. Despues e pueblo a bisa: ‘Esaki ta nos Dios cu a saca nos for di Egipto!’ Anto e Israelitanan a tene un fiesta grandi y a adora e bishe di oro.

Ora Jehova a mira esei, el a bira masha rabia. P’esei el a bisa Moises: ‘Haci lihe bo baha. E pueblo ta haciendo cos masha malo. Nan a lubida mi lei y ta buig pa un bishe di oro.’

Moises ta baha pura for di e sero. Y ora e yega cerca, esei ta loke e ta mira. E pueblo ta canta y balia rond di e bishe di oro! Moises ta bira asina rabia cu e ta tira e dos tablanan di piedra di e leinan na suela, y nan ta kibra na pida pida. Anto Moises ta cohe e bishe di oro y dirtie. Despues e ta garn’e na stof.

E pueblo a haci un cos masha malo. P’esei Moises ta bisa varios homber pa cohe nan spada. ‘E mal hendenan cu a adora e bishe di oro tin cu muri’, Moises a bisa. P’esei e hombernan cu spada ta mata 3.000 hende! Esei no ta mustra cu nos tin cu tene cuidou pa no adora diosnan falso, sino Jehova so?