E Bara di Aaron A Floria

MIRA e flornan y e almendranan hecho cu ta crece na e bara of garoti aki. Esei ta e bara di Aaron. E flornan y e almendranan hecho a crece na e bara di Aaron den un solo anochi! Laga nos mira pakico.

E Israelitanan a dual den desierto pa basta tempo caba. Algun hende a kere cu Moises no mester ta nan lider, ni Aaron no mester ta sumo sacerdote. Core ta un di e hombernan cu a pensa asina, y tambe Datan, Abiram y 250 cabesante di e pueblo. Nan tur a bini y a puntra Moises: ‘Pakico bo ta halsa bo mes riba nos tur?’

Moises a bisa Core y e siguidonan di dje: ‘Mañanmainta tuma weyanan-pa-sencia y pone sencia den nan. Anto bini na e tabernakel di Jehova. Nos lo mira ken Jehova lo scohe.’

Su siguiente dia Core y su 250 siguidonan a bini na e tabernakel. Hopi otro hende a bini pa apoya nan. Jehova tabata masha rabia. Moises a bisa: ‘Aleha for di tent di e mal hendenan ei. No mishi cu nada cu ta di nan.’ E pueblo a scucha, y nan a aleha for di e tent di Core, Datan y Abiram.

Anto Moises a bisa: ‘Asin’aki boso lo sa ken Jehova a scohe. Tera lo habri y traga e mal hendenan ei.’

Asina cu Moises a caba di papia, tera a habri. E tent di Core y su pertenencianan, y Datan cu Abiram y nan apoyadonan a cai, y tera a sera riba nan. Ora cu e pueblo a tende e gritamento di esnan cu a cai den tera, nan a sclama: ‘Hui! Pa tera no traga nos tambe!’

Core y su 250 siguidonan tabata cerca di e tabernakel ainda. P’esei, Jehova a manda candela y a kima nan tur. Anto Jehova a bisa Eleazar yiu di Aaron pa tuma e weyanan-pa-sencia di e hendenan cu a muri y uza nan pa fura e altar. E furo di e altar a sirbi como spiertamento pa e Israelitanan cu ningun hende fuera di Aaron y su yiunan por a sirbi como sacerdote dilanti Jehova.

Pero Jehova kier a mustra bon cla cu ta Aaron y su yiunan so el a scohe pa ser sacerdote. P’esei el a bisa Moises: ‘Laga e cabesantenan di cada tribu di Israel trece nan bara. Pa e tribu di Levi, laga Aaron trece su bara. Anto pone tur e baranan den e tabernakel dilanti di e arca di pacto. E bara di e homber cu mi a scohe como sacerdote lo floria.’

Ora cu Moises a bai wak su manece, wel, e bara di Aaron a floria y tabatin almendra hecho saliendo for di dje! Pues, bo ta compronde awor pakico Jehova a haci e bara di Aaron floria?