Moises A Dal e Baranca

AÑANAN a pasa—10 aña, 20 aña, 30 aña, 39 aña! Y e Israelitanan ta den desierto ainda. Pero durante tur e añanan ei Jehova a cuida su pueblo. El a alimenta nan cu mana. El a guia nan den dia cu un pilar di nubia, y durante anochi cu un pilar di candela. Y durante tur e añanan ei nan paña no a gasta ni nan pia no a haci dolor.

Awor a yega e prome luna di e di 40 aña desde cu nan a sali for di Egipto. E Israelitanan ta den campamento atrobe na Kades. Ei nan tabata ora cu e 12 spionnan a ser manda pa spiona e tera di Canaan casi 40 aña prome. Miriam, ruman muher di Moises, a muri na Kades. Y mescos cu prome, nan tabatin dificultad einan.

E pueblo no por a haya awa. P’esei nan a keha contra Moises: ‘Mihor nos a muri caba. Pakico bo a trece nos for di Egipto na e luga teribel aki caminda nada no ta crece? No tin trigo, ni figo, ni druif, ni granatapel. Ni sikiera tin awa pa bebe.’

Ora cu Moises y Aaron a drenta den e tabernakel pa haci oracion, Jehova a bisa Moises: ‘Reuni e pueblo. Anto dilanti nan tur, papia cu e baranca ei. Suficiente awa lo sali for di dje pa e pueblo y pa tur nan animalnan.’

P’esei Moises a reuni e pueblo, y a bisa nan: ‘Scucha, boso cu no tin ningun confiansa den Dios! Ta for di e baranca aki ami cu Aaron tin cu saca awa pa boso?’ Anto Moises a dal e baranca dos bes cu un bara, y masha awa a cuminsa basha for di e baranca. Tabatin suficiente awa pa tur hende y bestia bebe.

Pero Jehova a rabia cu Moises y Aaron. Bo sa pakico? Pasobra Moises y Aaron a bisa cu ta nan lo bai saca awa for di e baranca. Pero realmente ta Jehova a hacie. Y dor cu Moises y Aaron no a papia e berdad tocante esei, Jehova a bisa cu lo e castiga nan. ‘Boso lo no hiba mi pueblo na Canaan’, Dios a bisa.

Pronto e Israelitanan a bandona Kades. Despues di poco tempo nan a yega na e Sero Hor. Ei, riba top di e sero, Aaron a muri. E tabatin 123 aña di edad ora el a fayece. E Israelitanan a keda masha tristo, y p’esei pa 30 dia tur e pueblo a yora Aaron. Su yiu Eleazar a bira e siguiente sumo sacerdote di e nacion di Israel.