Un Burico A Papia

BO A yega di tende di un burico cu a papia? Lo bo bisa: ‘No, bestia no por papia.’ Pero Bijbel ta conta di un burico cu a papia. Laga nos mira con esei a sosode.

E Israelitanan tabata casi cla pa drenta e tera di Canaan. Balak, Rei di Moab, tabatin miedo di e Israelitanan. P’esei el a manda busca un homber sabi cu yama Balaam pa e bin maldiciona e Israelitanan. Balak a priminti cu lo e duna Balaam hopi placa, y p’esei Balaam a subi riba su burico y a bai cerca Balak.

Jehova no tabata kier pa Balaam maldiciona Su pueblo. P’esei el a manda un angel cu un spada largo pa para den caminda pa stroba Balaam. Balaam no por a mira e angel, pero su burico si a mir’e. P’esei e burico a keda purba hala pa e angel, y finalmente el a djis cai drumi riba caminda. Balaam a bira masha rabia y a suta su burico cu un palo.

Anto Jehova a haci Balaam tende su burico papia cu ne. E burico a puntra: ‘Kico mi a haci bo, pa bo ta suta mi?’

‘Bo a laga mi keda manera hende kens’, Balaam a contesta. ‘Si mi tabatin un spada, lo mi a mata bo!’

‘Mi a yega di trata bo asina antes?’ e burico a puntra.

Balaam a contesta: ‘No.’

Anto Jehova a laga Balaam mira e angel cu e spada para den caminda. E angel a puntra: ‘Pakico bo ta suta bo burico? Mi a bini pa sera e caminda, pasobra bo no mag bai pa maldiciona Israel. Si bo burico no a hala for di mi, lo mi a dal abo mata, pero lo mi no a haci bo burico nada.’

Balaam a bisa: ‘Mi a peca. Mi no tabata sa cu bo ta para den caminda.’ E angel a laga Balaam pasa, y Balaam a bai cerca Balak. Toch el a purba maldiciona Israel, pero en bes di esei Jehova a hacie bendiciona Israel tres bes.