Hesus Ta Bini Como Rei

POCO despues di a cura e dos limosneronan ciego, Hesus a yega na un pueblo cerca di Jerusalem. El a bisa dos di su discipelnan: ‘Bai na e pueblo y boso lo haya un burico jong. Los e y trec’e pa mi.’

Ora nan a trece e burico, Hesus a sinta riba dje. Anto riba e burico el a bai Jerusalem, cu tabata keda eicerca. Ora el a yega cerca di e stad, un multitud grandi di hende a sali pa ricibie. Mayoria di nan a kita nan mantel y a pone nan riba caminda. Otronan a corta rama di palma y a pone nan tambe riba caminda. Nan a grita: ‘Dios bendiciona e rei cu ta bini den nomber di Jehova!’

Den tempo di antiguedad e reinan nobo di Israel tabata drenta Jerusalem sinta riba burico pa e pueblo mira nan. Esei ta loke Hesus a haci. Y e pueblo a mustra cu nan tabata kier Hesus como nan Rei. Pero no ta tur hende tabata kier e. Nos por mira esei dor di loke a sosode ora Hesus a bai na e tempel.

Na e tempel Hesus a cura hende ciego y mancaron. Ora e muchanan a mira esei, nan a grita alabansa pa Hesus. Pero esei a pone e sacerdotenan rabia, y nan a puntra Hesus: ‘Bo ta tende loke e muchanan ta bisa?’

Hesus a contesta: ‘Si. Boso no a lesa nunca den Bijbel caminda e ta bisa: “Dios ta laga alabansa sali for di boca di mucha?”’ P’esei e muchanan a sigui alaba e rei di Dios.

Nos ta desea di ta manera e muchanan ei, no ta berdad? Algun hende lo por purba stroba nos di papia tocante e reino di Dios. Pero nos ta sigui bisa otro hende tocante e cosnan maraviyoso cu Hesus lo haci pa hende.

Ora Hesus tabata riba Tera no tabata tempo ainda pa e cuminsa reina como rei. Na ki tempo esei lo sosode? E discipelnan di Hesus a puntr’e mescos. Nos lo lesa tocante esei den e siguiente les.