Hesus A Cura Hende Enfermo

MIENTRAS cu Hesus a biaha dor di e pais, el a cura hende enfermo. Noticia di su milagernan a plama na tur parti den e pueblonan y stadnan. P’esei hende tabata trece cerca dje esnan coho y ciego y sordo, y hopi otronan enfermo. Y Hesus a cura nan tur.

Mas cu tres aña a pasa desde cu Juan a batisa Hesus. Y Hesus a bisa su apostelnan cu pronto e tin cu bai Jerusalem unda nan lo mat’e, pero cu Dios lo lant’e for di morto. Entretanto Hesus a sigui cura hende enfermo.

Un dia Hesus tabata siña hende riba dia di sabat. Sabat ta e dia di descanso di Hudiunan. E señora cu bo ta mira ei tabata hopi malo. Pa 18 aña el a cana dobla sin por para recht. P’esei Hesus a pone su man riba dje y el a stret su curpa. El a cura!

Esei a pone e lidernan religioso rabia. Un di nan a grita e multitud: ‘Tin seis dia pa nos traha. Bini pa curacion durante e dianan ei y no riba sabat!’

Pero Hesus a contesta: ‘Boso ta mal hende. Cualkier un di boso lo los su burico y hib’e pa bebe awa riba sabat. Pues, pakico mi no por cura e pober señora aki riba sabat, despues cu el a keda enfermo 18 aña?’ E palabranan di Hesus a brongosa e mal hendenan.

Despues Hesus y su apostelnan a sigui pa Jerusalem. Ora nan a yega net pafo di e stad Jerico, dos limosnero ciego a tende cu Hesus ta pasa. P’esei nan a grita: ‘Hesus, yuda nos!’

Hesus a yama e dos hombernan ciego cerca dje y a puntra nan: ‘Kico boso kier pa mi haci pa boso?’ Nan di: ‘Señor, habri nos wowo.’ Hesus a mishi cu nan wowo y nan a mira di biaha! Bo sa dicon Hesus a haci tur e milagernan ei? Pasobra el a stima hende y e tabata kier pa nan pone fe den dje. P’esei nos por keda sigur cu ora e ta reina como Rei, ningun hende riba Tera lo bira malo atrobe.