Riba Sero di Oleifi

ESEI ta Hesus riba Sero di Oleifi. E cuater hombernan hunto cu ne ta su apostelnan. Nan ta Andres cu Pedro, cu ta ruman di otro, y Santiago cu Juan, cu tambe ta ruman di otro. Bo por mira e tempel di Dios na Jerusalem leu aya.

A pasa dos dia desde cu Hesus a drenta Jerusalem riba un burico jong. Awor ta diamars. Mas tempran den dia Hesus tabata den e tempel. Einan e sacerdotenan a purba gara Hesus pa mat’e. Pero nan tabatin miedo di haci esei pasobra e pueblo tabata gusta Hesus.

Hesus a yama e lidernan religioso ei ‘colebra y yiu di colebra!’ Anto Hesus a bisa cu Dios lo castiga nan pa e mal cosnan cu nan ta haci. Despues di esei Hesus a subi Sero di Oleifi y e cuater apostelnan a cuminsa hacie pregunta. Bo sa kico nan ta puntra Hesus?

E apostelnan ta puntr’e tocante cosnan di futuro. Nan sa cu Hesus lo pone fin na tur maldad riba Tera. Pero nan kier sa na ki tempo esei lo sosode. Na ki tempo Hesus lo bini atrobe pa reina como Rei?

Hesus sa cu e siguidonan di dje riba Tera lo no por mir’e ora e bini atrobe. Esei ta pasobra e lo ta den shelo y nan lo no por mir’e ei. P’esei Hesus a bisa su apostelnan algun di e cosnan cu lo sosode riba Tera ora e ta reinando como Rei den shelo. Cua ta algun di e cosnan ei?

Hesus a bisa cu lo tin guera grandi, hopi hende lo bira malo y hopi lo tin hamber, crimen lo empeora y lo tin temblor grandi. Hesus a bisa tambe cu e bon nobo tocante e reino di Dios lo ser predica den henter mundo. Nos ta mira cu e cosnan ei ta sosode den nos tempo? Si! Anto p’esei nos sa sigur cu Hesus ta reina awor den shelo. Pronto lo e pone fin na tur maldad riba Tera.