Ruth y Noemi

DEN Bijbel bo por haya un buki cu yama Ruth. E ta un cuenta di un famia cu a biba durante e tempo cu Israel tabatin hues. Ruth tabata un mucha muher di e tera di Moab; e no tabata di Dios su nacion Israel. Pero ora Ruth a siña di e Dios berdadero Jehova, el a cuminsa stim’e masha hopi. Noemi tabata un señora di edad cu a yuda Ruth siña tocante Jehova.

Noemi tabata un Israelita. E cu su casa y su dos yiu hombernan a bai biba na e tera di Moab tempo cu tabatin tiki cuminda pa come na Israel. Anto un dia e casa di Noemi a muri. Despues e dos yiu hombernan di Noemi a casa cu dos mucha muher Moabita yama Ruth y Orfa. Pero rond di 10 aña despues, e dos yiu hombernan di Noemi a muri. Ki tristo Noemi y e dos mucha muhernan a keda! Kico Noemi a haci e ora ei?

Un dia Noemi a dicidi di haci e biahe largo pa e bolbe cerca su pueblo na su tera. Ruth y Orfa kier a keda cerca dje, y p’esei nan a bai cu ne. Pero despues di un poco tempo riba caminda, Noemi a bira wak e dos mucha muhernan y a bisa nan: ‘Bai cas bek y keda cerca boso mama.’

Noemi a duna e dos mucha muhernan sunchi di despedida. E ora ei nan a cuminsa yora, pasobra nan tabata stima Noemi masha hopi. Nan a bisa: ‘No! Nos ta bai cu bo cerca bo pueblo.’ Pero Noemi a contesta: ‘Boso tin cu bai bek, mi yiunan. Boso lo ta mas mihor na cas.’ P’esei Orfa a cuminsa cana pa bai cas. Pero Ruth no a bai.

Noemi a wak e y a bisa: ‘Orfa a bai. Abo tambe bai cas cu ne.’ Pero Ruth a contesta: ‘No purba haci mi bandona bo! Laga mi bai cu bo. Lo mi bai unda cu bo bai, y lo mi biba unda cu bo biba. Bo pueblo lo ta mi pueblo, y bo Dios lo ta mi Dios. Caminda bo muri lo mi muri, y ei lo mi ser dera.’ Ora Ruth a bisa esei, Noemi no a purba mas pa mand’e bai cas.

Finalmente e dos hende muhernan a yega Israel. Nan a establece nan mes pa biba einan. Ruth a cuminsa traha mesora den cunucu, pasobra tabata e tempo di cosecha di sebada. Un homber yama Boaz a lag’e recohe sebada den su cunucu. Bo sa ken tabata mama di Boaz? Esei tabata Rahab di e stad Jerico.

Un dia Boaz a bisa Ruth: ‘Mi a tende tur cos di bo, y cuanto bondad bo a mustra Noemi. Mi sa cu bo a bandona bo tata y bo mama y bo tera y cu bo a bini pa biba entre un pueblo cu antes bo no tabata conoce. Jehova sea bondadoso cu bo!’

Ruth a contesta: ‘Bo ta trata mi cu masha bondad, señor. Bo ta haci mi sinti mas mihor dor di e bon cosnan cu bo a bisa mi.’ Boaz a gusta Ruth masha hopi, y poco tempo despues nan a casa. Ki felis esei a haci Noemi! Pero Noemi a keda asta mas felis ora Ruth cu Boaz a haya nan prome yiu homber, yama Obed. Despues Obed a bira welo di David, di ken nos lo siña hopi mas despues.