E Homber Mas Fuerte

BO SA con yama e homber mas fuerte cu a yega di biba? Esei tabata un hues cu yama Samson. Jehova ta esun cu a duna Samson su forsa. Asta prome cu Samson a nace, Jehova a bisa su mama: ‘Pronto lo bo haya un yiu homber. E lo hiba delantera den salba Israel for di e Filisteonan.’

E Filisteonan tabata mal hende cu tabata biba na Canaan. Nan tabatin hopi homber di guera, y nan a haci e Israelitanan hopi daño. Un biaha ora Samson tabata bayendo caminda e Filisteonan tabata biba, un leon grandi a sali ta gruña contra dje. Pero Samson a mata e leon cu su man bashi. Tambe el a mata cientos di mal Filisteo.

Despues, Samson a enamora di un muher yama Dalila. E hefenan Filisteo a priminti cu cada un lo duna Dalila 1.100 pida plata pa e bisa nan ta kico a haci Samson asina fuerte. Dalila tabata kier e placa. E no tabata un berdadero amiga di Samson, ni di e pueblo di Dios. P’esei el a keda puntra Samson kico a hacie asina fuerte.

Finalmente Dalila a logra haci Samson bis’e e secreto di su forsa. Samson a bisa: ‘Mi cabei no a ser corta nunca. For di tempo cu mi a nace Dios a scohe mi pa ser un sirbidor special p’e yama Nazareo. Si mi pela, mi ta perde mi forsa.’

Wel, ora Dalila a tende esei, el a haci Samson drumi riba su scochi. Anto el a yama un homber pa e drenta y corta su cabei. Ora Samson a lanta for di soño, ya el a perde su forsa. Anto e Filisteonan a drenta y a coh’e. Nan a saca su wowonan, y a hacie nan esclabo.

Un dia e Filisteonan a tene un fiesta grandi pa adoracion di nan dios Dagon, y nan a saca Samson for di prizon pa nan tene mofa di dje. Mientrastanto, Samson su cabei a crece bek. Samson a bisa e mucha homber cu tabata gui’e na man: ‘Laga mi fula e pilarnan cu ta wanta e edificio.’ Anto Samson a pidi Jehova dun’e forsa, y el a gara e dos pilarnan. El a grita: ‘Laga mi muri hunto cu e Filisteonan.’ Tabatin 3.000 Filisteo na e fiesta, y ora Samson a pone forsa contra e dos pilarnan, e edificio a cai y a mata tur e mal hendenan.