David y Goliat

E FILISTEONAN a bini atrobe pa bringa contra Israel. E tres rumannan mas grandi di David ta den ehersito di Saul awor. P’esei un dia Isai a bisa David: ‘Hiba grano y pan pa bo rumannan. Wak con ta bai cu nan.’

Ora David a yega e campamento di e ehersito, el a core bai na e campo di bataya pa busca su rumannan. E gigante Filisteo Goliat a sali pa tene mofa di e Israelitanan. El a haci esei tur mainta y tur atardi pa 40 dia caba. E tabata grita: ‘Scohe un di boso hombernan pa bringa contra mi. Si e gana y mata mi, nos ta bira boso esclabo. Pero si ami gana y mata e, boso ta bira nos esclabo. Mi ta reta boso pa scohe un hende pa bringa contra mi.’

David a puntra algun solda: ‘Kico e hende cu mata e Filisteo y libra Israel di berguensa ta gana?’

Un solda a bisa: ‘Saul lo dun’e hopi rikesa. Y lo e dun’e su mes yiu muher como esposa.’

Pero tur e Israelitanan tabatin miedo di Goliat pasobra e tabata asina grandi. E tabata rond di tres meter halto, y un otro solda tabata carga su escudo p’e.

Algun solda a bai y a bisa Rei Saul cu David kier bringa contra Goliat. Pero Saul a bisa David: ‘Bo no por cu e Filisteo aki. Bo ta djis un mucha, y e ta un solda henter su bida.’ David a contesta: ‘Mi a mata un oso y un leon cu a bai cu carne di mi tata. Y e Filisteo aki lo bira mescos cu nan. Jehova lo yuda mi.’ P’esei Saul a bis’e: ‘Bai, y Jehova sea cu bo.’

David a baha den un rooi y a cohe cinco piedra lizo y a pone nan den su tas. Despues el a cohe su slinger y a sali bai pa contra cu e gigante. Ora Goliat a mir’e, e no por a kere. El a pensa cu lo ta facil pa mata David.

‘Hala mas cerca’, Goliat a bisa ‘y lo mi duna bo curpa na e parhanan y bestianan pa come.’ Pero David a bisa: ‘Bo ta bini cerca mi cu spada y lansa, pero ami ta bini cerca bo den nomber di Jehova. Awe mes Jehova lo entrega bo den mi man y lo mi derota bo.’

Cu esei David a core bai den direccion di Goliat. El a saca un piedra for di su saco, pon’e den su slinger, y a tir’e cu tur su forsa. E piedra a drenta den cabes di Goliat, y el a cai abou morto! Ora cu e Filisteonan a mira cu nan campion a cai, nan tur a hui. E Israelitanan a core tras di nan y a gana e bataya.