Salomon A Traha e Tempel

PROME cu David a muri, el a duna Salomon e mapa di Dios pa traha e tempel di Jehova. Durante e di cuater aña di su reinado, Salomon a cuminsa traha e tempel, y a dura shete aña y mei pa cab’e. Decenas di miles di hende a traha riba e tempel y el a costa masha hopi placa mes, dor cu masha hopi oro y plata a wordo uza den dje.

E tempel tabatin dos sala principal, mescos cu e tabernakel. Pero e dos salanan tabata dos bes mas grandi cu esnan di e tabernakel. Salomon a laga pone e arca di pacto den e sala interior di e tempel, y e otro cosnan cu tabata warda den e tabernakel nan a pone den e prome sala.

Ora nan a caba e tempel, tabatin un celebracion grandi. Salomon a hinca rudia dilanti di e tempel y a resa, manera bo por mira riba e plachi. Salomon a bisa Jehova: ‘Ni sikiera shelo mes no por contene bo, pues, con e tempel aki por? Pero, o mi Dios, por fabor, scucha bo pueblo ora nan haci oracion cu cara pa e tempel.’

Ora Salomon a caba su oracion, candela a baha for di shelo. E candela a kima e sacrificio di animal cu nan a ofrece. Y un lus briyante di Jehova a yena e tempel. Esei a mustra cu Jehova tabata scucha y cu el a gusta e tempel y e oracion di Salomon. Awor e tempel, en bes di e tabernakel, a bira e luga caminda e pueblo tabata bini pa adora.

Pa hopi tempo Salomon a reina cu sabiduria, y e pueblo tabata felis. Pero Salomon a casa cu hopi hende muher di otro tera cu no a adora Jehova. Bo ta mira uno di nan ta adora dilanti di e imagen? Finalmente nan a logra pone Salomon tambe adora otro dios. Bo sa kico a sosode ora Salomon a haci esei? E no a trata e pueblo cu bondad mas. El a bira cruel y e pueblo no tabata felis mas.

Esei a haci Jehova rabia cu Salomon, y el a bis’e: ‘Lo mi kita e reino for di bo y dun’e na otro hende. Mi no ta bai haci esei durante bo bida, ma durante e reinado di bo yiu. Pero lo mi no kita tur e pueblo di bo reino for di bo yiu.’ Laga nos mira con esei a sosode.