Jezabel—Un Reina Malbado

DESPUES di morto di Rei Jeroboam, tur rei cu a goberna e reino di 10 tribu di noord tabata malo. Rei Acab tabata esun piyo. Bo sa pakico? Un di e motibonan principal ta su casa Jezabel, e Reina malbado.

Jezabel no tabata Israelita. E tabata yiu muher di e rei di Sidon. E tabata adora e dios falso Baal, y el a pone Acab y hopi Israelita tambe adora Baal. Jezabel tabata odia Jehova y a mata hopi profeta di dje. Otro profetanan a sconde den cueba pa nan no ser mata. Ora Jezabel tabata kier un cos, e por a asta mata hende pa hay’e.

Un dia Rei Acab tabata sintie masha tristo. P’esei Jezabel a puntr’e: ‘Pakico bo ta tristo awe?’

Acab a contesta: ‘Dor di loke Nabot a bisa mi. Mi kier a cumpra su cunucu di wendruif. Pero el a bisa mi cu mi no por hay’e.’

‘No precupa bo’, Jezabel a bisa. ‘Mi ta percura pa bo hay’e.’

Pues, Jezabel a skirbi algun carta na e hombernan principal di e stad caminda Nabot tabata biba. ‘Busca un par di homber cu no ta sirbi pa nada, pa nan bisa cu Nabot a plega Dios y e rei’, Jezabel a bisa nan. ‘Anto hiba Nabot pafo di e stad y piedr’e mata.’

Asina cu Jezabel a tende cu Nabot tabata morto, el a bisa Acab: ‘Awor bai y tuma su cunucu di wendruif.’ Bo no ta kere cu Jezabel mester a haya castigo pa un cos asina teribel?

Pues, cu tempo, Jehova a manda e homber Jehu pa castig’e. Ora Jezabel a tende cu Jehu ta bini, el a pinta su wowo y a drecha su mes pa e keda bunita. Pero ora cu Jehu a yega y a mira Jezabel sinta den bentana, el a grita e hombernan den e palacio: ‘Tir’e abou!’ E hombernan a obedece, manera bo ta mira riba e plachi. Nan a tir’e abou y el a muri. Esei tabata e fin di e Reina malbado Jezabel.