Cu e Señora na e Pos

HESUS a sinta pa sosega na un pos na Samaria. Su discipelnan a bai na e stad pa cumpra cuminda. E señora cu ken Hesus ta papia a bini pa saca awa. Hesus a bis’e: ‘Duna mi poco awa.’

Esei a sorprende e señora hopi. Bo sa pakico? Pasobra Hesus tabata Hudiu, y e señora tabata Samaritano. Y mayoria Hudiu no tabata gusta Samaritano. Ni sikiera nan tabata papia cu nan! Pero Hesus a stima tur sorto di hende. P’esei el a bisa: ‘Si bo tabata sa ta ken ta pidi bo awa, lo bo pidie y e lo duna bo awa cu ta duna bida.’

E señora a bisa: ‘Señor, e pos ta hundo, y bo no tin ni un emchi. Unda bo ta bai haya awa cu ta duna bida?’

Hesus a bisa: ‘Si bo bebe awa di e pos aki lo bo haya sed atrobe. Pero e awa cu mi ta duna por haci hende biba pa semper.’

E señora a bisa: ‘Señor, duna mi e awa ei! E ora ei mi no tin cu sinti sed nunca mas. Y lo mi no tin cu bini aki pa saca awa atrobe.’

E señora a kere cu Hesus tabata kiermen awa mes. Pero Hesus tabata kiermen e berdad di Dios y su reino. E berdad ei ta manera awa cu ta duna bida. E por hiba hende na bida eterno.

Awor Hesus a bisa e señora: ‘Bai yama bo casa y bini bek.’

El a contesta: ‘Mi no tin casa.’

Hesus a bisa: ‘Bo tin rason. Pero bo tabatin cinco esposo y bo compañero actual no ta bo casa.’

E señora a keda asombra, pasobra tur esei tabata berdad. Con Hesus por a sa tur esei? Si, dor cu Hesus tabata Esun cu Dios a priminti di manda, y Dios a dun’e e informacion. Na e momento ei e discipelnan di Hesus a yega, y nan a keda sorprendi cu Hesus tabata papia cu un señora Samaritano.

Kico nos ta siña di tur esei? Esei ta mustra cu Hesus a trata hende di tur rasa cu bondad. Y nos tin cu haci mescos. Nos no mag pensa cu algun hende ta malo debi na nan rasa. Hesus kier pa tur hende conoce e berdad cu ta hiba na bida eterno. Y nos tambe mester kier yuda hende siña e berdad.